တနင်္သာရီတိုင်း၊ ကော့သောင်းခရိုင်၊ ခမောက်ကြီးမြို့၊ ရှမ်းကိုးရွာဒေသမှာ စစ်ကောင်စီတပ်က ဖမ်းဆီးထားတဲ့ ကျေးရွာသားတွေကို ပိုက်ဆံပေးပြီး ပြန်လည်ထုတ်ယူခိုင်းနေတယ်လို့ ဒေသခံတွေဆီက သိရပါတယ်။

ပြီးခဲ့တဲ့ ‌ဧပြီ ၂ဝ ရက်နဲ့ ၂၁ နေ့အတွင်း ရှမ်းကိုးရွာဒေသမှာရှိတဲ့ ကျေးရွာနေပြည်သူ ၇ ဦးကို စစ်ကောင်စီတပ်က စစ်‌ဆေးဖို့ရှိတယ်လို့ဆိုပြီးဖမ်း ဆီးခေါ်ဆောင်သွားခဲ့တာပါ။ ဖမ်းဆီးခံရသူ ၇ ဦးကို စစ်ကောင်စီတပ်က ကျပ်ငွေ ၄ သိန်း အဓမ္မတောင်းကာ ပြန်လည်ထုတ်ယူခိုင်းနေတယ်လို့ သိရပါတယ်။

ဒေသခံတစ်ဦးက"ရွာက ရပ်မိရပ်ဖတွေကနေ ညှိနှိုင်းပြီးတော့ သွားထုတ်တာပါ။ ‌ ပိုက်ဆံနဲ့ ပြန်ရွေးပြီး ထုတ်လိုက်ရတယ်။ တယောက်ပဲ ထုတ်လို့ရသေးတယ်။ ကျန်တဲ့သူတွေကိုလည်း ထုတ်ယူဖို့ ပြောယူရတုန်းပဲ” လို့ ပြောပါတယ်။

ဖမ်းဆီးခံထားရတဲ့ ၇ ဦးနက် အမျိုးသားတယောက်ကို  ‌ကျေးရွာရှိ ရပ်မိရပ်ဖတွေကနေ သွားရောက်ထုတ်ယူခဲ့ရတယ်လို့ သိရပါတယ်။ ဒေသခံ ၂ ဦးကိုတော့ ကော့သောင်းမြို့ရဲစခန်းမှာ ဆက်လက် ထိန်းသိမ်းထားပြီး  ကျန်ရှိတဲ့သူတချို့ကို စစ်ကောင်စီရဲ့ စရဖရုံးမှာလည်း ထိန်းသိမ်းထားပါတယ်။

ခမောက်ကြီးမြို့ ရှမ်းကိုးရွာဒေသကို စစ်ကောင်စီတပ်က မကြာခဏ စစ်ကြောင်းထိုး ဝင်လာပြီး အကြောင်းမဲ့ဖမ်းဆီး စစ်ဆေးနေတဲ့အပြင် ပြီးခဲ့တဲ့ရက်ပိုင်းကလည်း ရွာအနီးရှိ ဥယျာဉ်ခြံအလုပ်သမား ၁ ဦးကိုလည်း စစ်ကောင်စီတပ်က ပစ်သတ်သွားပါတယ်။

တနင်္သာရီတိုင်း ကော့သောင်းခရိုင်၊ ခမောက်ကြီးမြို့၊ ရှမ်းကိုးရွာဒေသရှိ ကျေးရွာတွေမှာ ၂ ရက်အတွင်း စစ်ကောင်စီက ဖမ်းဆီးသွားတဲ့ ကျေးရွာသား ၇ ဦးအထိ ရှိတယ်လို့ ဒေသခံတွက ပြောပါတယ်။

ဧပြီ ၂ဝ ရက်နေ့ မနက်က မာရမ်းကျေးရွာနေ ကိုလွင်ဦးနဲ့ ခမောက်ကြီးမြို့ အမှတ်(၄)ရပ်ကွက်က ကိုဆန်းမင်းဦးတို့ကို စစ်ကောင်စီတပ်သားတွေက စစ်ဆေး မေးမြန်းမလို့ဆိုကာ ဖမ်းဆီးခေါ်ဆောင်သွားခဲ့တယ်လို့ သိရပါတယ်။

ဖမ်းဆီးခံရသူ ၂ ဦးမှာ အသက် ၄ဝ ဝန်းကျင်အရွယ်ရှိပြီးတော့ ဥယျာဉ်ခြံလုပ်ငန်းနဲ့ အသက်မွေးဝမ်းကြောင်းလုပ်ကိုင်နေကြသူတွေလို့ သိရပါတယ်။

ဒေသခံတဦးက "သူတို့ကိုဘာကြောင့်ဖမ်းသွားလဲတော့မသိဘူး။ ဒီမှာက တိုက်ပွဲဖြစ်ရင် မဆီမဆိုင် ရွာသားတွေကို ဝင်ဖမ်းတာပဲ" လို့ ပြောပါတယ်။

နောက်တနေ့  မနက် ၉ နာရီမှာလည်း ဆိပ်ဖူးကျေးရွာက ဦးသောင်းဝင်း အပါအဝင် သားဖြစ်သူ အသက် ၂ဝ ကျော်အရွယ် ကိုကျော်မျိုးဦး နဲ့ ကိုကျော်နိင်ဦး တို့ကို စစ်ကောင်စီ တပ်သားတွေက ဖမ်းဆီးခေါ်ဆောင်သွားခဲ့တယ်လို့ ဆိုပါတယ်။

ကော့သောင်းပြည်သူ့ကာကွယ်ရေးတာဝန်ရှိသူတဦးက "ဒေသတခု တိုက်ပွဲဖြစ်လို့ သက်ဆိုင်သူတွေ လက်နက်ကိုင်တဖက်နဲ့ တဖက်ကြားမှာ ဖမ်းဆီးစစ်ဆေးတာမျိုးက ဖြစ်သင့် ပေမဲ့ မဆိုင်တဲ့ ပြည်သူတွေကို အခုလို ဖမ်းဆီးတာကြတော့ လူ့အခွင့်အရေးချိုးဖောက်တာပါ”လို့  ပြောပါတယ်။

ဒါ့အပြင် လုံးဖောကျေးရွာက အသက် ၃ဝ အရွယ် အမျိုးသမီး ၁ ဦးနဲ့ ခမောက်ကြီးမြို့ နား ကယုဇနဆီအုန်းစိုက်ပျိုးရေးဇုန် ၂ က အသက် ၃ဝ အရွယ် ကိုညီအောင်တို့ကို ထပ်မံ ဖမ်းဆီးခေါ်ဆောင်သွားခဲ့တယ်လို့ သိရပါတယ်။

ဧပြီ ၁၆ ရက်က ဆိပ်ဖူးကျေးရွာမှာ ပျူစောထီးခေါင်းဆောင် ၂ ဦး ရှင်းလင်း ပစ်သတ်ခံရပြီးနောက် စစ်ကောင်စီတပ်ကနေ ရှမ်းကိုးရွာဒေသတွေမှာ ဝင်ရောက်ရှာဖွေပြီး ဖမ်းဆီးစစ်ဆေး‌နေတာလို့ သိရပါတယ်။