ကယား (ကရင်နီ) ပြည်နယ်၊ ရှားတောမြို့မှာ စစ်ကောင်စီတပ် ရှေ့တန်းတပ်စခန်း ဗျူဟာကုန်းကို ရိက္ခာလာပို့တဲ့ စစ်ကောင်စီတပ်ဖွဲ့ ကြားဖြတ်တိုက်ခိုက်ခံရပြီး စစ်သား ၅ ယောက် သေဆုံးခဲ့တယ်လို့ ကရင်နီစစ်တပ်သတင်းအချက်အလက်စင်တာက ထုတ်ပြန်ပါတယ်။

ဖေဖော်ဝါရီ ၂၆ ရက်၊ မနက် ၃ နာရီက ရှားတောမြို့ရဲ့ အရှေ့ဘက် ၉ မိုင်ခန့် အကွာမှာရှိတဲ့ သံလွင်မြစ်ကမ်းခြေ တာတမောစခန်းကနေ ရှားတောမြို့ ဗျူဟာကုန်းကို အိမ်စီးကားတွေနဲ့ ရိက္ခာသယ်ဆောင်နေတဲ့ စစ်ကောင်စီတပ်ဖွဲ့ကို ရှားတောမြို့နဲ့ စလောင်းကျေးရွာကြားက ချောင်းဆုံနားမှာ ကရင်နီတပ်မတော်-KA နဲ့ KNDF ပူးပေါင်းတပ်ဖွဲ့က ကြားဖြတ် တိုက်ခိုက်ခဲ့တာဖြစ်ပါတယ်။

ကြားဖြတ်တိုက်ခိုက်မှု ၁ နာရီဝန်းကျင် ကြာမြင့်ခဲ့ပြီး စစ်ကောင်စီတပ်သား ၅ ယောက် သေဆုံးပြီး ဒဏ်ရာရခဲ့တယ်လို့ ကရင်နီတပ်က ဆိုပေမဲ့ စစ်ကောင်စီဘက်ကတော့ အတည်ပြု သတင်းထုတ်ပြန်ခြင်းမရှိပါဘူး။

လမ်းကင်းလုံခြုံရေး ယူနေတဲ့ စစ်ကောင်စီတပ်ဖွဲ့က ၈၁ မမ လက်နက်ကြီးနဲ့ ပြန်လည်ပစ်ခတ်ခဲ့တာကြောင့် ကရင်နီတပ်မတော်ဘက်မှ ရဲဘော်တယောက် ဒဏ်ရာရခဲ့ပါတယ်။

စစ်ကောင်စီတပ်ဖွဲ့က လွိုင်ကော်ကနေ ရှားတောဒေသ နယ်စပ်စခန်းတွေကို ရိက္ခာနဲ့ လက်နက်ခဲယမ်းတွေ ပို့ဆောင်ဖို့ ခက်ခဲနေတာကြောင့် ရှမ်းပြည်ဘက်ကနေ သံလွင်မြစ်အတိုင်း စက်လှေငယ်တွေနဲ့ စုန်ဆင်းပြီး ရှားတောမြို့နယ်၊ တာတမောစခန်းမှာ စုပုံထားရှိဖို့ ပြီးခဲ့တဲ့ ဇန်နဝါရီလကတည်းက ဆောင်ရွက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ရှားတောမြို့နယ်မှာ ဒေသကွပ်ကဲမှု စစ်ဌာနချုပ် လက်အောက်ခံ ခမရ ၄၂၈ နဲ့ ရှမ်းပြည် အခြေစိုက် ခမရ ၅၁၀ တို့ ပူးပေါင်း လှုပ်ရှားနေတယ်လို့ သိရပါတယ်။

မကွေးတိုင်း၊ ပခုက္ကူမြို့နယ်မှာလည်း ဖေဖော်ဝါရီ ၂၆ ရက် နေ့လယ်ပိုင်းက စစ်ကောင်စီတပ်သားတွေ ဒရုန်းနဲ့ ဗုံးကြဲတိုက်ခိုက်ခံရပြီး ထိခိုက်သေဆုံးသူ ရှိနိုင်တယ်လို့ ပခုက္ကူ-Special Task Force ကနေ သိရပါတယ်။

ပခုက္ကူမြို့နယ်၊ ကန်တော်ရွာဘက်ကနေ အင်အား ၁၅၀ လောက်နဲ့ စစ်ကြောင်းထိုးလာတဲ့ စစ်ကောင်စီစစ်ကြောင်းကို ဖေဖော်ဝါရီ ၂၆ ရက် နေ့လယ်ပိုင်းမှာ ဒေသကာကွယ်ရေး ပူးပေါင်းတပ်ဖွဲ့တွေက ဒရုန်းနဲ့ အီနာဂါဗုံးသီးဖြတ်ချပြီး တိုက်ခိုက်ခဲ့တယ်လို့ ပခုက္ကူ-STF ပြန်ကြားရေးတာဝန်ခံ ကိုမှန်က ဒီဗွီဘီကို ပြောပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးသူ ရှိနိုင်ပေမဲ့ အတိအကျ မသိရသေးလို့ ဆက်လက်စုံစမ်းနေတယ်လို့ ဆိုပါတယ်။

“အဲဒီတိုက်ခိုက်မှုကို ပခုက္ကူ-STF၊ သူရိန်တပ်ဖွဲ့၊ မြေလတ်ဒေသပြောက်ကျားတပ်ဖွဲ့-MRG၊ ပုဂံ ညောင်ဦး ပြည်သူ့ကာကွယ်ရေးတပ်ဖွဲ့နဲ့ ညီနောင်မဟာမိတ်တပ်ဖွဲ့တွေ ပူးပေါင်း တိုက်ခိုက်ခဲ့တာဖြစ်ပြီး ကျနော်တို့ဘက်ကရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့ကြတယ်။”

ပခုက္ကူနဲ့ ဆိပ်ဖြူမြို့နယ်အစပ်မှာလည်း ဖေဖော်ဝါရီ ၂၅ ရက် မွန်းလွဲပိုင်းက စစ်ကောင်စီစစ်ကြောင်း ဒရုန်းနဲ့ ဗုံးကြဲတိုက်ခိုက်ခံရပြီး ၁ ယောက်သေဆုံးကာ ၁ ယောက် ဒဏ်ရာရရှိခဲ့တယ်လို့ ဆိပ်ဖြူမြောက်ပိုင်း ပြည်သူ့ကာကွယ်ရေးတပ်ဖွဲ့-NSP PDF ကနေ သိရပါတယ်။

အဲဒီတိုက်ခိုက်မှုအတွင်း စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

ကရင်နီ (ကယား) ပြည်နယ်၊ ရှားတောမြို့နယ်ရှိ ရှားတောမြို့ထိုင် စစ်ကောင်စီရဲ့ ဗျူဟာကုန်းနဲ့ ခလရ ၄၂၈ တပ်ရင်းအတွက် ရိက္ခာနဲ့ လက်နက်ပို့ဆောင်တဲ့ ရဟတ်ယာဉ်ကို အနီးကပ် သွားရောက်တိုက်ခိုက်ခဲ့တယ်လို့ ကရင်နီတပ်မတော် (KA) က ထုတ်ပြန်ပါတယ်။

အောက်တိုဘာ ၁၉ ရက် မွန်းလွဲပိုင်းက ရှားတောမြို့ထိုင် ဗျူဟာကုန်းနဲ့ ခလရ ၄၂၈ တပ်ရင်းအတွက် ရိက္ခာနဲ့ လက်နက် ပို့ဆောင်တဲ့ ရဟတ်ယာဉ်ကို ကရင်နီတပ်မတော် (KA) နဲ့ ကရင်နီအမျိုးသားများကာကွယ်ရေးတပ် (KNDF B17) တို့ပူးပေါင်းပြီး အနီးကပ် သွားရောက်ပစ်ခတ်ခဲ့ရာမှာ စစ်ကောင်စီဘက်က ၃ ‌ယောက် သေဆုံးပြီး ၆ ယောက် ဒဏ်ရာရခဲ့တယ်လို့ KA က ထုတ်ပြန်ပါတယ်။

ဒီလိုသွားရောက်ပစ်ခတ်ပြီးနောက် စစ်ကောင်စီတပ်ဘက်က လက်နက်ကြီးတွေနဲ့ ပစ်ခတ်မှုကြောင့် အသက် ၁၅ နှစ်အရွယ် ကလေးတယောက်နဲ့ အသက် ၅၀ ကျော်အရွယ် အမျိုးသားတယောက် ပြင်းထန်စွာ ဒဏ်ရာရရှိခဲ့ပါတယ်။

ဒီလိုပစ်ခတ်ခံရပြီးနောက် စစ်ဗျူဟာမှူးက မြို့ပေါ် အုပ်ချုပ်ရေးမှူးတွေကို ခေါ်ယူတွေ့ဆုံပြီး ဒီလို အလားတူပစ်ခတ်မှု ထပ်မံဖြစ်ပွားပါက ရှားတောတမြို့လုံး ပြာကျသွားမယ်လို့ ခြိမ်းခြောက်ခဲ့ကြောင်းလည်း ဆိုပါတယ်။

လွိုင်ကော်ကနေ ရှားတောမြို့ကို ကူးလူးသွားလာနေတဲ့ စစ်ကောင်စီယာဉ်တန်းတွေကို ကရင်နီ ပူးပေါင်းတပ်တွေက လမ်းကြောင်းပိတ်ဆို့ပြီး တပ်စခန်းတွေကို မကြာခဏ တိုက်ခိုက်သလို ရိက္ခာလမ်းကြောင်းတွေကို ဖျက်ဆီးတဲ့အတွက် စစ်ကောင်စီဘက်က ရဟတ်ယာဉ်အသုံးပြုကာ ရိက္ခာပို့ဆောင်ခဲ့တာဖြစ်ပါတယ်။