နိုင်ငံတွင်းရောက်ရှိနေထိုင်ကြတဲ့ ရိုဟင်ဂျာဒုက္ခသည်တွေဟာ ဘင်္ဂလားဒေ့ရှ်နိုင်ငံအတွက် ကြီးမားတဲ့ ဝန်ထုပ်ဝန်ပိုးတခုဖြစ်နေတယ်လို့ ဝန်ကြီးချုပ် ရှိတ်ခ်ဟာစီနာက ပြောလိုက်ပါတယ်။

လတ်တလောမှာတော့ ရိုဟင်ဂျာဒုက္ခသည် ၁ ဒသမ ၁ သန်းလောက်ဟာ ကော့ဇ်ဘဇားမြို့နဲ့ ဘဆန်ချားကျွန်းတွေမှာနေထိုင်နေကြပြီး ဘင်္ဂလားဒေ့ရှ်အစိုးရအနေနဲ့ သူတို့ကို မြန်မာနိုင်ငံဘက်ကို နေရပ်ပြန်နိုင်ရေးအတွက် နိုင်ငံတကာ အသိုင်းအဝိုင်းကို ဆက်သွယ်ဆောင်ရွက်နေတယ်လို့ ပြောပါတယ်။

“ရှင်တို့သိတဲ့အတိုင်း ကျမတို့အတွက် ဒါ(ရိုဟင်ဂျာဒုက္ခသည်တွေ)ဟာ ဝန်ထုပ်ဝန်ပိုးကြီးတခုပါပဲ။ အိန္ဒိယနိုင်ငံက ကျယ်တယ်… ရှင်တို့နေနိုင်ပေမယ့် အများကြီးရှိမနေဘူး။ ဒါပေမဲ့ ကျမတို့နိုင်ငံမှာတော့ ရိုဟင် ဂျာ ၁ ဒသမ ၁ သန်းရှိနေတာ။”

ပြီးခဲ့တဲ့ ဆယ်စုနှစ်အတွင်း မြန်မာနိုင်ငံမှာ စစ်တပ်က လူမျိုးတုံး သုတ်သင်ရှင်းလင်းရေးတွေ စတင်လုပ်ဆောင်ခဲ့ပြီးနောက်မှာတော့ ထောင်ပေါင်းများစွာသော ရိုဟင်ဂျာဒုက္ခသည်တွေဟာ ဘင်္ဂလားဒေ့ရှ် နိုင်ငံဘက်ကို ထွက်ပြေးတိမ်းရှောင်ခဲ့ကြရတာ ဖြစ်ပါတယ်။

လတ်တလောမှာတော့ ဘင်္ဂလားဒေ့ရှ်နိုင်ငံဘက်မှာ ရိုဟင်ဂျာဒုက္ခသည် ၁ ဒသမ ၁ သန်းကျော် ရောက်ရှိနေထိုင်နေပြီး တချိန်တည်းမှာပဲ အိန္ဒိယနိုင်ငံနေရာအတော်များများမှာတော့ ၁၆,၀၀၀ လောက် ရှိနေတယ်လို့ ဆိုပါတယ်။

ဝန်ကြီးချုပ် ဟာစီနာကတော့ ဘင်္ဂလားဒေ့ရှ်အစိုးရအနေနဲ့ ရိုဟင်ဂျာဒုက္ခသည်တွေကို လူသားချင်းစာနာထောက်ထားမှုဆိုင်ရာ ရှုထောင့်အရ အလေးထားစောင့်ရှောက်ဖို့ ကြိုးစားပေးနေတယ်လို့ ပြောပါတယ်။

“ကျမတို့အနေနဲ့ မြေပြင်မှာ သူတို့ကို အမိုးအကာ နေရာထိုင်ခင်းနဲ့ လူသားချင်းစာနာထောက်ထားရေးအကူအညီတွေ ပေးနေပါတယ်။ ကိုဗစ်ကာလအတွင်းမှာလည်း ရိုဟင်ဂျာအသိုင်းအတိုင်းကို ကာကွယ်ဆေး ထိုးနှံပေးခဲ့ပါတယ်။ ဒါပေမဲ့ သူတို့ ဒီမှာ အချိန်ဘယ်လောက်ကြာကြာ နေကြဦးမှာလဲ။”

ရိုဟင်ဂျာတွေအရေးနဲ့ ပတ်သက်ပြီးတော့ ကုလသမဂ္ဂနဲ့ အာဆီယံအဖွဲ့အစည်းတွေနဲ့လည်း ဘင်္ဂလားဒေ့ရှ်အစိုးရက ဆွေးနွေးနေသလို ဝန်ကြီးချုပ် ဟာစီနာဟာ ဒီကနေ့ကနေ ၄ ရက်တာခရီးစဉ်အနေနဲ့လည်း  အိန္ဒိယနိုင်ငံကို သွားရောက်မှာ ဖြစ်ပါတယ်။

အိန္ဒိယဟာ အိမ်နီးချင်းနိုင်ငံတစ်ခုအနေနဲ့  ရိုဟင်ဂျာအရေးအပေါ်မှာ ကြီးမားတဲ့ အခန်းကဏ္ဍကနေ ပါဝင်နိုင်မယ်လို့ ခံစားမိတယ်လို့လည်း ဝန်ကြီးချုပ်ဟာဆီနာက ပြောပါတယ်။

Ref- Scrool