ချင်းပြည်နယ် တီးတိန်မြို့နယ် အပ်လွယ်ကျေးရွာက မီးနေသည် အမျိုးသမီးတစ်ယောက်အား အကြမ်းဖက်စစ်တပ်က အဓမ္မပြုကျင့်ခဲ့မှုဟာ လူမဆန်တဲ့လုပ်ရပ်ဖြစ်ပြီး နစ်နာသူအားလုံးအတွက် လက်တုံ့ပြန်သွားမယ်လို့ ဇိုမီးဖက်ဒရယ် အစည်းအရုံး (ZFU) က ပြောကြားလိုက်ပါတယ်။

ချင်းပြည်နယ် တီးတိန်မြို့နယ် အပ်လွယ်ကျေးရွာမှာ နိုဝင်ဘာ ၁၁ ရက်နေ့က အကြမ်းဖက်စစ်သား ၃ ယောက်က ခင်ပွန်းဖြစ်သူကို နှိပ်စက်ပြီးတော့ မီးနေသည် အမျိုးသမီးကို ခင်ပွန်းရဲ့ရှေ့မှာ အကြိမ်ကြိမ် အဓမ္မပြုကျင့်ပြီး လက်ဝတ်ရတနာတွေကို လုယူသွားခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

အကြမ်းဖက်စစ်တပ်နဲ့ လက်ပါးစေတွေဟာ လူမဆန်တဲ့ ရိုင်းစိုင်းယုတ်မာမှုတွေကို ဖုံးဖိဖို့ ကြိုးစားပြီး အဲဒီဖြစ်စဥ်ကို ထုတ်ဖော်ပြောကြားတဲ့ ကာယကံရှင်မိသားစုနဲ့ တစ်ခြားသူတွေရဲ့ အသက်အန္တရာယ်တွေကို ခြိမ်းခြောက်လာတာဟာ လူခွင့်ရေးချိုးဖောက်ပြီး ဇိုမီးလူမျိုး၊ ချင်းတမျိုးသားလုံးနဲ့ မြန်မာတစ်နိုင်ငံက ပြည်သူတရပ်လုံးကို အနိုင်ကျင့်စော်ကားတာလို့ ဖော်ပြထားပါတယ်။

အကြမ်းဖက်စစ်တပ်ရဲ့ အဓမ္မပြုကျင့်ခံခဲ့ရသူနဲ့ မိသားစုကို လက်ရှိမှာ ZFU က ကာကွယ်စောင့်ရှောက်ထားပြီး လိုအပ်တဲ့ စိတ်ပိုင်းဆိုင်ရာ၊ ရုပ်ပိုင်းဆိုင်ရာနဲ့ ဆေးဝါးကုသပြီး ပံ့ပိုးတာတွေ ပြုလုပ်ပေးထားတယ်လို့ ဆိုပါတယ်။

အခုလို ရိုင်းစိုင်းယုတ်မာမှုတွေဟာ အကြမ်းဖက်စစ်တပ်အနေနဲ့ နှစ်ပေါင်းများစွာ ကျူးလွန်ခဲ့တဲ့ စစ်ရာဇဝတ်မှုတွေ ဖြစ်တယ်လို့ ထုတ်ပြန်ထားပါတယ်။

မင်းတပ်မြို့နယ် ပြည်သူ့ အုပ်ချုပ်ရေးအဖွဲ့ကလည်း အဓမ္မပြုကျင့်တဲ့ဖြစ်စဉ်အပေါ် ပြင်းပြင်းထန်ထန် ကန့်ကွက်ရှုတ်ချကြောင်း၊ တိုက်ပွဲနဲ့ မသက်ဆိုင်တဲ့ အမျိုးသမီးတွေရဲ့ လုံခြုံရေး အရှက်တရားနဲ့ အသက်၊ အခွင့်အရေးတို့ကို ချိုးဖောက်တာဖြစ်ပြီး ချင်းတမျိုးသားလုံးနဲ့ မြန်မာပြည်သူတွေကို စော်ကားတာဖြစ်ကြောင်း ထုတ်ပြန်ထားပါတယ်။ 

ပြီးခဲ့တဲ့ နိုဝင်ဘာ ၇ ရက်နေ့ကလည်း ရှမ်းပြည်နယ်၊ ကွတ်ခိုင်မြို့နယ် ဖာခတ် ကျေးရွာမှာ ခြံစောင့်နေတဲ့ အသက် ၆၂ နှစ်အရွယ် ကချင်အမျိုးသမီးတစ်ယောက်ကို အကြမ်းဖက်စစ်ကောင်စီ တပ်သားတစ်ယောက်က အဓမ္မပြုကျင့်မှု ဖြစ်ပွားခဲ့ပါတယ်။

တရုတ်နိုင်ငံနယ်နိမိတ်အတွင်း မြန်မာဘက်ကပစ်ခတ်လိုက်တဲ့ ကျည်ဆန်တွေထပ်မံကျရောက်ပါက ပြန်လည်လက်တုံ့ပြန်သွားမယ်လို့  တရုတ်နိုင်ငံခြားရေးဌာနက အာဏာသိမ်းစစ်ကောင်စီကို သတိပေးလိုက်ပါတယ်။

စစ်ကောင်စီတပ်နဲ့ MNDAA (ကိုးကန့်)တပ်တို့ ဩဂုတ် ၄ ရက်နဲ့ ၆ ရက်‌နေ့တွေမှာဖြစ်ပွားခဲ့တဲ့ မြန်မာ-တရုတ်နှစ်နိုင်ငံနယ်စပ်၊ မူဆယ်ခရိုင်၊ ပန်ဆိုင်း (ကြူကုတ်) တိုက်ပွဲမှာ စစ်ကောင်စီတပ်က ပစ်ခတ်လိုက်တဲ့ ကျည်တွေ   တရုတ်ပိုက်နက်ထဲ ကျရောက်ခဲ့တာပါ။

ဩဂုတ် ၄ နေ့  မနက် ၁၀ နာရီကျော်လောက်က မြန်မာဘက်က ပစ်ခတ်တဲ့ အမြောက်ကျည်ဆန်တစ်လုံး ဝမ်တိမ်မြို့အနီးကျရောက်ခဲ့သလို ဩဂုတ် ၆ ရက်ကလည်း ဝမ်တိန်ဂိတ် ပေါက်ရှေ့တိုက်ပွဲဖြစ်ပွားခဲ့လို့ ကျည်ဆန်တစ်တောင့် တရုတ်နိုင်ငံတွင်းက အဆောက်အအုံ တစ်လုံး ထိမှန်ခဲ့တယ်လို့ တရုတ်ဘက်က ဆိုပါတယ်။  

မြန်မာနိုင်ငံပိုင်နက်ဧရိယာအတွင်း အကြိမ်ပေါင်းများစွာ ဖြစ်ပွားခဲ့တဲ့ တိုက်ပွဲတွေကြောင့် သေနတ်ကျည်ဆန်နဲ့ အမြောက်ဆန်တွေ  တရုတ်နိုင်ငံအတွင်း ကျရောက်တာဟာ တရုတ်- မြန်မာနှစ်နိုင်ငံသဘောတူစာချုပ်ကို ချိုးဖောက်တာဖြစ်ပြီး  နယ်စပ်ရှိလူတွေရဲ့ အသက်နဲ့ လုံခြုံရေးကို များစွာခြိမ်းခြောက်တာဖြစ်တယ်လို့ တရုတ်ဘက်ကဆိုပါတယ်။

ဒီကိစ္စနဲ့ပတ်သက်ပြီး ဩဂုတ် ၅ ရက်နေ့က တရုတ်နိုင်ငံခြားရေးဌာန စစ်သံမှူးတစ်ဦးက တရုတ်နိုင်ငံဆိုင်ရာ မြန်မာသံအမတ်ကြီး ဦးမျိုးသန့်ဖေကိုခေါ်ယူတွေ့ဆုံပြီး တိုက်ပွဲချက်ချင်းရပ်ဆိုင်းဖို့ပြောကြားခဲ့ပါတယ်။

ဒါ့အပြင် နယ်စပ် စစ်ပွဲတွေ  နောက်နောင် မဖြစ်ပွားစေလိုကြောင်း၊ နယ်စပ်လုံခြုံရေးကို အတူတကွထိန်း‌ချုပ်သွားမှာဖြစ်ကြောင်းနဲ့ မိမိနိုင်ငံဘက် ကျည်ထပ်မံကျပါက ပြန်လည်တုံပြန်သွားမှာဖြစ်ကြောင့် မြန်မာစစ်ကောင်စီကို တရုတ်နိုင်ငံက အကြောင်းကြားစာပို့ခဲ့ပါတယ်။

တရုတ်နိုင်ငံနယ်နိမိတ်အတွင်း ကျည်ကျ‌ရောက်ထိမှန်တာနဲ့ ပတ်သက်ပြီး စစ်ကောင်စီတပ်ရဲ့ ကွတ်ခိုင် စစ်ဗျူဟာမှူးကတော့ သူတို့ပစ်တဲ့ကျည်မဟုတ်ကြောင်း ပြန်လည် ငြင်းဆိုထားပါတယ်။