ပြည်သူ့ခုခံတော်လှန်စစ်ပွဲကာလအတွင်း လက်နက်ကိုင်တော်လှန်ရေးအတွက် ကျောင်းသားလက်ရုံးတပ်တော်နဲ့အတူ တိုက်ပွဲဝင်မယ့် တပ်သားသစ်တွေ စုဆောင်းခေါ်ယူနေပါတယ်။

ကျောင်းသားသမဂ္ဂ ခွပ်ဒေါင်းအလံတော်အောက်မှာ ကျောင်းသားလက်ရုံးတပ်တော်နဲ့အတူ တိုက်ပွဲဝင်ကြမယ့် တပ်သားသစ်တွေ ခေါ်ယူမှုမှာတော့ တက္ကသိုလ်ကျောင်းသား ရဲဘော်တွေသာမကဘဲ အမှန်တရားအတွက် အသက်ပင်ပဓာဏမထား တော်လှန်တိုက်ပွဲဝင်ကြမယ့် ကျောင်းသားစိတ်ဓာတ်ရှိသူ ဘယ်သူမဆို အမှုထမ်းဆောင်နိုင်မယ်လို့ ဆိုပါတယ်။ ‌

တပ်တော်ကို ဝင်ရောက်အမှုထမ်းလိုသူတွေအနေနဲ့ တပ်တော်ရဲ့ တရားဝင် ဖေ့စ်ဘွတ်ခ်လူမှုကွန်ရက်စာမျက်နှာကတဆင့် ဆက်သွယ်စုံစမ်းနိုင်မှာဖြစ်ကာ မူဝါဒတွေအနေနဲ့ ကျောင်းသားလက်ရုံးတပ်တော် တပ်ဖွဲ့ဝင်လောင်းတွေဖြစ်တာနဲ့အညီ တပ်တော်ရဲ့ မျှော်မှန်းချက်၊ ရည်မှန်းချက်၊ မူဝါဒတွေနဲ့ သစ္စာအဓိဋ္ဌာန်တွေကို လက်ခံနိုင်သူဖြစ်ရမယ်လို့ ဖော်ပြထားပါတယ်။

ဒါ့အပြင် လက်နက်ကိုင်တော်လှန်ရေးအတွက် စိတ်ပိုင်းဖြတ်ပြီးသူ၊ အသက် ၁၈ နှစ်ကနေ ၅၀ နှစ်အတွင်း အခြေခံကျန်းမာရေးကောင်းမွန်သူဖြစ်ရမှာဖြစ်ပြီး တပ်တော်ကနေ ပေးအပ်လာတဲ့ အမိန့်နဲ့ တာဝန်တွေကို ကျေပွန်စွာထမ်းဆောင်နိုင်သူဖြစ်ရမယ်လို့ ဆိုပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူလူထုတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပြီး နိုင်ငံတဝန်းမှာတော့ ဒေသခံပြည်သူ့ကာကွယ်ရေးတပ်တွေ၊ တိုင်းရင်းသားလက်နက်ကိုင်တပ်တွေနဲ့ အကြမ်းဖက်စစ်ကောင်စီတပ်တွေကြား တိုက်ပွဲတွေလည်း တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။

NUG အစိုးရ ကာကွယ်ရေးဝန်ကြီးဌာနက နောက်ဆုံးထုတ်ပြန်ချက်မှာတော့ ပြည်သူ့ခုခံတွန်းလှန်စစ် ၁ နှစ်တာ ကာလအတွင်း အကြမ်းဖက်စစ်ကောင်စီတပ်သား ၁၅,၀၀၀ နီးပါး သေဆုံးခဲ့ပြီး ထိခိုက်ဒဏ်ရာရသူ အယောက် ၄,၈၀၀ ကျော်ထိ ရှိခဲ့တယ်လို့ ဆိုပါတယ်။

ဒါ့အပြင် တနိုင်ငံလုံးအတိုင်းအတာနဲ့ PDF နဲ့ ညီနောင်မဟာမိတ်တပ်ရင်း ၂၅၇ ရင်းရှိပြီး ဒီထဲက တပ်ရင်း ၁၀၁ ရင်းကို ဝန်ကြီးဌာနက စိစစ်အတည်ပြုပြီး ကျန်တဲ့တပ်ရင်းတွေကိုလည်း ဆက်လက် စစ်ဆေး အတည်ပြုနေတယ်လို့ NUG ကာကွယ်ရေးဝန်ကြီးက အမျိုးသားညီညွတ်ရေးအစိုးရဖွဲ့စည်းတာ တနှစ်ပြည့် အစီရင်ခံစာမှာ ပြောထားပါတယ်။

မြို့နယ်တွေကို အခြေခံဖွဲ့စည်းတဲ့ ပြည်သူ့ကာကွယ်ရေးအဖွဲ့တွေဟာလည်း မြို့နယ်ပေါင်း ၂၅၀ ကျော်မှာ စနစ်တကျဖွဲ့စည်းပြီးဖြစ်ကာ မြို့ပြပြောက်ကျား ကျေးလက်ပြောက်ကျား အဖွဲ့ပေါင်း ၄၀၀ ကျော်ကို ဝန် ကြီးဌာနက စာရင်းပြုစုရရှိထားပြီး ဒီထဲက ၆၀ ရာခိုင်နှုန်းကျော်ဟာ ကာကွယ်ရေးဝန်ကြီးဌာနနဲ့ ချိတ်ဆက်ဆောင်ရွက်နေတယ်လို့ ဆိုပါတယ်။

လတ်တလောမှာတော့ စစ်ကောင်စီရဲ့ အဆိုးဆုံး အကြမ်းဖက်တာခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည် အထက်ပိုင်းလမ်းပိုင်းတွေရဲ့ ၉၀ ရာခိုင်နှုန်းကို PDF တွေက ထိန်းချုပ်ထားနိုင်ပြီလို့ ဇွန် ၂၁ ရက်နေ့ သတင်းစာရှင်းလင်းပွဲမှာ ပြောထားပြီး လက်ရှိ မြေပြင်မှာ အကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။

စစ်ကောင်စီတပ်တွေက အဓမ္မပြုကျင့်သတ်ဖြတ်တာတွေ များပြားလားတာကြောင့် လက်နက်ကိုင်တော်လှန်ရေးမှာ အမျိုးသမီးတွေ ပိုမိုပါဝင်လာကြတယ်လို့ ပခုက္ကူ-Generation Z တပ်ဖွဲ့က ပြောပါတယ်။

နေရာဒေသတော်တော်များများမှာ အမျိုးသမီးတွေ မုဒိန်းကျင့် သတ်ဖြတ်ခံရတွေဖြစ်လာတော့ အမျိုးသမီးတွေအနေနဲ့ မခံချင်စိတ်တွေ ပိုတိုးပွားလာတဲ့အတွက် တောထဲကိုဝင်ပြီး လက်နက်ကိုင်တော်လှန်ရေး လုပ်ကြတာလို့ PKU-GZ တပ်ဖွဲ့ရဲ့ တာဝန်ခံ ဗိုလ်Tiger (တိုင်းဂါး) က ဒီဗွီဘီကို ပြောပါတယ်။

လက်ရှိအနေထားမှာ အမျိုးသမီးတပ်ဖွဲ့ဝင်တွေဟာ စခန်းမှာ ကင်းစောင့်တာ၊ ပွိုင့်စောင့်တာ၊ ရပ်ရွာတွေထဲ ပြည်သူတွေကို ဆေးဝါးလိုက်ကုသတာတွေ၊ ဆေးဝါးကုသတဲ့ ဆရာ၊ ဆရာမတွေကို လုံခြုံရေးလိုက်ပေးတာမျိုးတွေ၊ စစ်မြေပြင်ကို ကိုယ်တိုင်ဆင်းပြီး ဒဏ်ရာရ ရဲဘော်တွေကို ကယ်ထုတ်ပြီး ဆေးဝါးကုသတာတွေ လုပ်ဆောင်ပေးလို့ တော်လှန်ရေးအတွက် အရမ်းကို အထောက်အကူပြုတယ်လို့ ဆိုပါတယ်။

ဒါ့အပြင် အမျိုးသမီးတွေဟာ အမျိုးသားတွေနဲ့ တန်းတူရင်ပေါင်တန်းနိုင်တယ်ဆိုတဲ့ သက်သေကို မြန်မာအမျိုးသမီးငယ်တွေဟာ သက်သေပြသွားပြီး ရှေ့ဆက် သက်သေပြနိုင်ဖို့ တော်လှန်ရေးတပ်ဖွဲ့တွေနဲ့ လာရောက်ပူးပေါင်းကြဖို့ ဗိုလ်Tiger က ဖိတ်ခေါ်လိုက်ပါတယ်။

“ကျနော်တို့တွေ နယ်မြေစိုးမိုးမှု ရရှိထားတယ်ဆိုပေမယ့် စစ်​ကြောင်းလာရင် လက်နက်အင်အားမမျှလို့ ဘေးလွတ်ရာကို ပြေးကြရတာပဲ။ ကျနော်တို့ရဲ့ တည်ဆောက်ပြီးခါစ စခန်းမှာတော့ သြဂုတ် ၄ ရက်နေ့က စစ်ကောင်စီစစ်ကြောင်းတွေ ထိုးနေတဲ့ အခက်အခဲကြားက သင်တန်းသား သင်တန်းသူ ၂၇ ယောက်ကို အခြေခံစစ်ပညာသင်တန်းဆင်းပွဲ ပြုလုပ်ပေးခဲ့တယ်။ စခန်းမှာလုပ်တာဆိုရင် ပထမဦးဆုံးအပတ်စဥ်ပေါ့။ အရင်ကတော့ မဟာမိတ်တပ်ဖွဲ့တွေဆီမှာ သင်တန်း ၂ ခု ပို့ချခဲ့သေးတယ်။ ကျနော်တို့နယ်မြေမှာ မီတာ ၃၀၀ လောက်အကွာထိ လက်နက်ကြီးနဲ့ အပြန်အလှန် ပစ်ခတ်ခဲ့တဲ့ ညတွေလည်းရှိတယ်။ သင်တန်းသား ရဲဘော်တွေလည်း သတိဝီရိယနဲ့နေပြီး တခုခုဆိုရင် ၃ မိနစ်အတွင်းမှာ ရှိသမျှပစ္စည်းတွေအားလုံး သိမ်းဆည်းပြီး ပြေးနိုင်ဖို့အတွက် ကြိုတင်ပြင်ဆင်ပြီးမှ ဒီသင်တန်းကို ပို့ချခဲ့ရတာ။ သင်တန်းအပတ်စဥ် ၃ ခုအထိ ပို့ချနိုင်ခဲ့ပြီး ၄၅ ရက်မွမ်းမံသင်တန်းလည်း ထပ်မံပို့ချသွားမယ်။” 

သင်တန်းဆင်း အမျိုးသမီးတပ်ဖွဲ့ဝင်တယောက်က “လက်နက်ကိုင်တော်လှန်ရေးမှာ ပါဝင်လာရတဲ့ ရည်ရွယ်ချက်ကတော့ အာဏာရှင်စနစ်ကို မကြိုက်လို့ပါ။ ရန်ကုန်မြို့မှာ ဆန္ဒပြ သပိတ်စစ်ကြောင်းကို ၂၀၂၁ ခုနှစ်၊ ဖေဖော်ဝါရီ ၂၈ ရက်နေ့မှာ ဖြိုခွင်းခံရပြီး သူငယ်ချင်း ၃ ယောက် ဖမ်းဆီးခံရကာ တယောက်က စစ်ကြောရေးမှာ သေဆုံးခဲ့တယ်။ ရပ်ကွက်ထဲမှာ တို့မီးရှို့မီး အလုပ်ခံရလို့ နေလို့မရတော့လို့ ထွက်လာပြီး ဖေ့စ်ဘွတ်ခ်က သူငယ်ချင်းတွေဆီကနေတဆင့် ဆက်သွယ်ပြီး PKU-GZ တပ်ဖွဲ့ကို ဝင်ရောက်ခဲ့တာ။ သူနာပြုဘက်ကဆိုတော့ ရှေ့တန်းထိလိုက်ပြီး တိုက်ပွဲ၊ တိုက်ရင်းနဲ့ ဒဏ်ရာရဲဘော်တွေကို ဆေးကုပေးချင်လို့ ရောက်လာတာပါ” လို့ ပြောပါတယ်။

ပခုက္ကူ-Generation.Z တပ်ဖွဲ့ဝင် အမျိုးသမီးတယောက်က “သူနာပြုဘက်ကဆိုတော့  ရှေ့တန်းထိလိုက်ပြီး တိုက်ပွဲတိုက်ရင်းနဲ့ ဒဏ်ရာရဲဘော်တွေကို ဆေးကုပေးချင်လို့ ရောက်လာတာပါ။ သင်တန်းကာလမှာ အရမ်းပင်ပန်းတယ်၊ အစားသောက်ဆင်းရဲတယ်။ ရွာတွေမှာ အမျိုးသမီးတွေ မုဒိမ်းကျင့်သတ်ဖြတ်ခံနေရတာတွေ၊ အရွယ်မရောက်သေးတဲ့ ကလေးငယ်တွေလည်း အသေဆိုးနဲ့ သေနေရတယ်။ အဲဒါကြောင့် အမျိုးသမီးအများအပြား ပါဝင်လာပြီး ရွာတွေမှာ ဆရာဝန်မရှိဘူး။ ဆေးဝါးကျွမ်းကျင်သူတွေ မရှိတာကြောင့် တပ်ဖွဲ့က ရဲဘော်တွေနဲ့ ဒေသခံပြည်သူတွေကို ဆေးကုပေးချင်လို့ ဝင်ရောက်လာသူ များပြားတယ်” လို့ ပြောပါတယ်။

မကွေးတိုင်းဒေသကြီးအတွင်းမှာ PDF တပ်ဖွဲ့တွေ စိုးမိုးတဲ့ နယ်မြေတွေ များပြားလာလို့ စစ်ကောင်စီတပ်တွေက အင်အားအလုံးရင်းနဲ့ အသည်းအသန် ထိုးစစ်ဆင်ကာ နယ်မြေပြန်လည်ထိန်းချုပ်နိုင်ဖို့ ကြိုးစားနေသလို့ တော်လှန်ရေးတပ်ဖွဲ့တွေမှာလည်း လက်နက်ခဲယမ်း လိုအပ်ချက်တွေ နေ့စဥ် ကြုံတွေ့နေရတယ်လို့ သိရပါတယ်။

PKU-GZ တပ်ဖွဲ့အနေနဲ့ ပခုက္ကူမြို့မှာ မြိုပြလှုပ်ရှားမှုတွေ အကြိမ်ကြိမ် ပြုလုပ်ခဲ့ပေမယ့် ပြည်သူလူထု ပူးပေါင်းပါဝင်မှုအားနည်းတာကြောင့် မြို့ပြကို ခေတ္တစွန့်ခွာပြီး တောထဲမှာ ကျစ်လျစ်ခိုင်မာတဲ့ အဖွဲ့ကြီးတခုအဖြစ် ရပ်တည်ကာ မြို့ပြလှုပ်ရှားမှုတွေ လုပ်ဆောင်ဖို့ မကြာခင် ပြန်လာတော့မယ်လို့ ဗိုလ်Tiger က ပြောပါတယ်။

စစ်တပ်က အာဏာသိမ်းပြီးနောက် ၂၀၂၁ခု နှစ် ဖေဖော်ဝါရီလ ၁ ရက်နေ့ကနေ ၂၀၂၂ ခုနှစ် ဇူလိုင်လ ၁၁ ရက်နေ့အထိ နိုင်ငံတဝန်းမှာ နေရပ်စွန့်ခွာ ထွက်ပြေးတိမ်းရှောင်နေရသူ ဦးရေ ၇၈၃၄၀၀ ရှိတယ်လို့ UN OCHA Myanmar က ဇူလိုင်လ ၂၀ ရက်နေ့ရက်စွဲနဲ့ ထုတ်ပြန်ထားပါတယ်။