မကွေးတိုင်း၊ မင်းတုန်းမြို့မှာ စခန်းချနေတဲ့ PDF အဖွဲ့ကို စစ်ကောင်စီတပ်က တိုက်ရိုက်စစ်ကြောင်းမထိုးဘဲ လက်နက်ကြီးတွေနဲ့ပဲ ၂ ရက်ဆက်တိုက်ပစ်ခတ်နေတာကြောင့် ဒေသခံ ကျေးရွာတွေမှာ နေအိမ်တွေမီးလောင်ပြီး ဒေသခံတွေ ဘေးလွတ်ရာထွက်ပြေးနေရပါတယ်။
ဧပြီ ၂၇ ရက်နဲ့ ၂၈ ရက်နေ့တွေမှာ စစ်ကောင်စီတပ်က PDF အဖွဲ့တဖွဲ့ ရှိနေတဲ့ နေရာကို လက်နက်ကြီးတွေနဲ့ တနေကုန်ထိုင်ပစ်နေတာလို့ မင်းတုန်းမြို့ခံတယောက်က ပြောပါတယ်။
“မနေ့ကတည်းက စပြီးတောက်လျှောက် ပစ်လိုက်နားလိုက်နဲ့ ပစ်နေတာ။ အသံတွေက ကြောက်ခမန်းလိလိပဲကြားနေရတာ။ တမြို့လုံးလည်း လန့်နေကြတယ်။ စစ်တပ်က သရက်မြို့ဘက်ကလာတဲ့ ကပစတပ်တွေ။ မင်းတုန်းမှာလာပြီး စခန်းချနေတာ။ မနေ့က တရက်တည်း လက်နက်ကြီးနဲ့ပစ်နေတာ တရက်တည်းကို အချက် ၄၀ လောက်ပစ်နေတာ။ သူတို့ကတော့ PDF တွေ စခန်းချနေတဲ့ နေရာတောင်ပေါ်ကို လှမ်းထုတော့ တက်တော့မတက်ရဲကြဘူးထင်တယ်။ သူတို့မှာလည်း အင်အားရှိမယ့်ပုံ မပေါ်ဘူး။ မနေ့ ဧပြီ ၂၇ ရက်ညက မင်းတုန်းမြို့ထဲက အမှတ်(၄)ရပ်ကွက်မှာ ဗုံးဖေါက်ခံလိုက်ရတာကို မဲပြီး ရဲစခန်းထဲကနေ သေနတ်တွေနဲ့ လျှောက်ပစ်ပြီး အဲ့ဒီကနေ ဆက်ပြီး တောင်ပေါ်က PDF တွေရှိတဲ့နေရာကို ဆက်တိုက်ပစ်နေတာ” လို့ ပြောပါတယ်။
စစ်ကောင်စီတပ်ရဲ့ ပစ်ခတ်မှုကြောင့် လက်ပွကျေးရွာ၊ မှိုက်ရွာ၊ ရွှေတောင်နဲ့ လယ်ကိုင်ရွာတွေ ထိခိုက်ပြီး အိမ်တွေမီးလောင်သွားကာ နွားတွေလည်းသေဆုံးပြီး မှိုက်ရွာ တရွာတည်းမှာပဲ နွား ၅ ကောင်သေဆုံးသွားတယ်လို့ သိရပါတယ်။
ဒေသခံ Mindon People Revolution Force က “အကုန်လုံးရွာကိုစွန့်ပြီး ထွက်ပြေးနေရတယ်၊၊ ရွာခံတွေ တောထဲနဲ့ တောင်ပေါ်တွေကို ထွက်ပြေးတိမ်းရှောင်နေရတယ်။ PDF စခန်းကတော့ ရိက္ခာဂိုထောင် မီးလောင်သွားလို့ ဘာမှမရလိုက်ဘူး အရင်က စခန်းက ထွက်သွားတဲ့ တယောက်ကမိသွားတယ်။ အဲဒိ မိသွားတဲ့လူကို နှိပ်စက်တယ်လို့ထင်တယ်။ သူကဖေါ်လိုက်တော့ စခန်းနေရာကိုသိသွားတာထင်တယ်”လို့ တာဝန်ရှိသူ တယောက်က ပြောပါတယ်။
ပြီးခဲ့တဲ့ သင်္ကြန်ရက်အလွန်ကလည်း မင်းတုန်းမြို့မှာစခန်းချနေတဲ့ စစ်ကောင်စီတပ်က တပ်ကြပ် တယောက်က မူးပြီး အသက်မပြည့်သေးတဲ့ ကလေးစစ်သားတယောက်ကို ထိုးကြိတ်ရိုက်နှက်ပြီး သေနတ်နဲ့ ပစ်သတ်ခဲ့ပေမဲ့ အဲ့ဒိတပ်ကြပ်ကို အခုထိ အရေးယူမှုမရှိပဲ ဆက်လက် တာဝန် ထမ်းဆောင်နေတယ်လို့ ဒေသခံတွေထံက သိရပါတယ်။
ရှမ်းပြည်တောင်ပိုင်း၊ မိုးဗြဲမြို့နယ်ထဲမှာ ဇွန်လ ၈ ရက် ဒီကနေ့မနက်က တိုက်ပွဲမရှိပေမဲ့ အကြမ်းဖက်စစ်ကောင်စီတပ်တွေက လက်နက်ကြီးနဲ့ ရွာတွေဘက်ကိုပစ်ခတ်နေတာကြောင့် ရွာသားတွေ ဘေးလွတ်ရာထွက်ပြေးနေကြရပါတယ်။
ခလရ ၄၂၁ တပ်ကနေ မိုးဗြဲနဲ့ လွိုင်ကော်ကြားရှိ လွိုင်ယန်း မင်္ဂလာတောင်ခြေဘက်ကို လက်နက်နဲ့ လှမ်းထုနေတာဖြစ်ပြီး ထိခိုက်ပျက်စီးမှုတွေ သေချာမသိရသေးပါဘူး။
ရွာသားတွေကတော့ အမျိုးသမီး ၂ ယောက် ကျည်ထိမှန်တယ်လို့ အကြောင်းကြားလာ တယ်လို့ ကရင်နီအမျိုးသားများကာကွယ်ရေးတပ် KNDF ပြန်ကြားရေးတာဝန်ခံက ဒီဗွီဘီ ကို ပြောပါတယ်။
“ဒီကနေ့မနက်အစောကြီးကတည်းက ပစ်နေတာ၊ တိုက်ပွဲတော့မဟုတ်ဘူး၊ စစ်ကောင်စီ ဘက်က ကျနော်တို့ ပြည်သူ့ကာကွယ်ရေးတပ်ဖွဲ့ဝင်တွေရှိမယ်လို့ ယူဆရတဲ့ နေရာတွေ ရမ်း သန်းပြီးပစ်နေတာ၊ အဲဒီမှာ နန်းဖဲတို့ လီဝိုးတို့ အဲလိုရွာတွေရှိတယ်၊ နန်းဖဲရွာမှာ အမျိုးသမီး ၂ ယောက်ခြေထောက်နဲ့ ဆီးခုံမှာထိသွားတယ်လို့ ရွာသား တွေက ပြောလာတယ်၊ ဒါပေမဲ့ ဖြစ်စဉ်အသေးစိတ်ကို တော့သိသေးဘူး”။
မိုးဗြဲမြို့ပေါ်မှာတော့ တမြို့လုံးနီးပါး စစ်ဘေးရှောင်နေရပြီး အကြမ်းဖက်စစ်တပ်က လူမနေတဲ့ အိမ်ထဲသော့ဖောက်ဝင်ရောက်နေထိုင်တာ၊ ပစ္စည်းတွေယူငင်တာမျိုးတွေ လုပ်နေ တယ်လို့ ဆိုပါတယ်။
ကယားပြည်နယ်မှာလည်း စစ်တပ်က ဒီးမော့ဆိုမြို့ ဒေါငံခါးရပ်ကွက်နဲ့ တနန်းဥကွိုင်ရပ်ကွက်ဘက်ကို လက်နက်ကြီးတွေနဲ့ လှမ်းပစ်ဆဲဖြစ်ပြီးရပ်ကွက်ထဲကလူတွေတော့ အကုန်စစ်ဘေးရှောင်ကုန်ပြီလို့ KNDFက ပြောပါတယ်။
ဒီးမော့ဆိုမြို့ထဲမှာ စစ်တပ်အင်အား ၁၀၀ ကျော်ရှိပြီး ကရင်ပြည်နယ် သံတောင်ကြီးမြို့နယ် ဘက်က အင်အားဖြည့်ဝင်လာတဲ့ တပ်ဖွဲ့အင်အား ၄၀၀ ကျော်ဟာ သောက်ရေခပ်ရွာကိုရောက်ရှိပြီ မို့ ပြည်သူလူထုတွေသတိရှိဖို့ လုံခြုံရေးနဲ့ကာကွယ်ရေးအတွက် ကြိုတင်ပြင်ဆင်ထားကြဖို့ KNDF က နှိုးဆော်ထားပါတယ်။
