အမျိုးသားညီညွတ်ရေး အစိုးရ (NUG) ရဲ့ ကာကွယ်ရေးဝန်ကြီးဌာန လက်အောက်ခံ အလယ်ပိုင်းတိုင်း အထူးစစ်ဆင်ရေးအဖွဲ့ နဲ့ CDM ဗိုလ်ကြီး ညီသုတတို့ ပူးပေါင်းပြီး လက်နက်ခဲယမ်းဝယ်ယူရန် USD ၃၀၀၀၀ ကမ်ပိန်းကို ပြုလုပ်နေပါတယ်။ 

အလယ်ပိုင်းတိုင်းအထူးစစ်ဆင်ရေးတပ်ဖွဲ့မှ တာဝန်ရှိသူတဦးက “ကမ်ပိန်း စပြုလုပ်တာ ၄ ရက်ရှိပါပြီ။ ရက်ကန့်သတ်ထားတာမရှိပါဘူး။ လိုအပ်တဲ့ ငွေအမောက်ပြည့်တာနဲ့ ကမ်ပိန်းကို ရပ်နားလိုက်မှာပါ။ လက်ရှိအချိန်အထိ ၁၅ ရာခိုင်နှုန်းလောက်ပဲ ရပါသေးတယ်။ ပြည်တွင်းနဲ့ ပြည်ပ အလှူရှင်တွေများစွာ လိုအပ်နေပါတယ်။ ဒီကမ်ပိန်းလေး ပြည့်မြောက်သွားအောင် တတ်နိုင်သလောက် ထောက်ပံ့ပေးဖို့ တောင်းဆိုချင်ပါတယ်။ အလှူရှင်တွေဘက်​က ပါဝင်အားဖြည့်ပေးမယ်ဆိုရင် ကျနော်တို့အတွက် ပိုပြီးအားရှိတာပေါ့” လို့ ဒီဗွီဘီကို ပြောပါတယ်။ 

​မြန်မာပြည်တွင်းမှာရှိတဲ့ အလှူရှင်တွေအနေနဲ့ Kpay၊ Wave  စတာတွေနဲ့ လှူဒါန်းနိုင်ပြီး အလှူငွေတွေကို CDM ဗိုလ်ကြီးညီသုတ ရဲ့ တရားဝင် Facebook page နဲ့ အလယ်ပိုင်းတိုင်း အထူးစစ်ဆင်ရေးတပ်ဖွဲ့ရဲ့ တရားဝင် Facebook တို့မှာ သွားရောက်ဆက်သွယ်လှူဒါန်းနိုင်တယ်လို့ သိရပါတယ်။ 

အလယ်ပိုင်းတိုင်း အထူးစစ်ဆင်ရေး တပ်ဖွဲ့ဟာ ဖယ်ခုံမြို့ အရှ့ဘက်ကမ်း နဲ့ ဖရူဆိုမြို့နယ် တိုက်ပွဲတွေမှာ ဒေသကာကွယ်ရေးတပ်ဖွဲ့တွေနဲ့ ပူးပေါင်းပြီး တိုက်ပွဲဝင်နေတာပါ။

ရှမ်းပြည်နယ် တာချီလိတ်မြို့နယ်မှာ ငွေကျပ် ၃ ဒသမ ၂ ဘီလီယံကျော်တန်ဖိုးရှိ မူးယစ်ဆေးဝါးတွေနဲ့ ဆက်စပ်ပစ္စည်းတွေ၊ လက်နက်ခဲယမ်းတွေ ဖမ်းဆီးရမိတယ်လို့ မြန်မာနိုင်ငံ မူးယစ်ဆေးဝါး အလွဲသုံးစားမှု ထိန်းချုပ်ရေး ဗဟိုကော်မတီက ထုတ်ပြန်ပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ဝင်တွေ ပါဝင်တဲ့ ပူးပေါင်းအဖွဲ့ဟာ တာချီလိတ်မြို့နယ်၊ ဖန်မင်-ဝှေလေလန် ကျေးရွာသွားကားလမ်းမှာ   ဇန်နဝါရီ ၆ ရက်နေ့ ညနေ ၆ နာရီအချိန်လောက်က စိုင်းရွက် မောင်းနှင်လာတဲ့ Honda Fit အမျိုးအစား မော်တော်ယာဉ်ကို ရှာဖွေရာ ယာဉ်ပေါ်မှာ အိုက်စ် (မက်သာအဖက်တမင်း) ၁ ကီလို၊ ပစ္စတိုသေနတ် ၁ လက်၊ ကျည်အိမ် ၁ ခု၊ ကျည် ၅ တောင့်တို့ကို သိမ်းဆည်းရမိခဲ့ပါတယ်။

စစ်ဆေးပေါ်ပေါက်ချက်အရ ည ၇ နာရီမှာ ဖန်မင်ကျေးရွာအုပ်စု၊ ဝမ်ကျောက်လုံကျေးရွာနေ အိုက်ခေါက်ရဲ့ နေအိမ်အား ဝင်ရောက်ရှာဖွေရာ နေအိမ်ခြံဝင်းအတွင်း ရပ်တန့်ထားတဲ့ Fortuner အမျိုးအစား မော်တော်ယာဉ် နောက်ခန်းအတွင်းနဲ့ နေအိမ်မြေအောက်ခန်းအတွင်းတို့မှာ ပလတ်စတစ်အိတ်တွေနဲ့ ထည့်ထားတဲ့ စိတ်ကြွရူးသွပ်ဆေးပြား ၁၆.၉ သိန်း၊ စိတ်ကြွရူးသွပ်ဆေးမှုန့် ၅၈ ကီလို၊ အိုက်စ်(မက်သ်အဖက်တမင်း) ၈၆.၅ ကီလို၊ ဘိန်းဖြူ ၂၃.၁ ကီလို၊ လက်ပစ်ဗုံး ၁ လုံး၊ ကျည်မျိုးစုံ ၅၄ တောင့်နဲ့ မူးယစ်ဆေးဝါးထုတ်လုပ်ရာမှာ အသုံးပြုတဲ့ ဆက်စပ်ပစ္စည်းများကို သိမ်းဆည်းရမိခဲ့ပြီး အိုက်ခေါက်ကိုတော့ အိမ်မှာမတွေ့ရဘူးလို့ ဆိုပါတယ်။

စိုင်းရွက် ၃၇ နှစ်၊ အိုက်ခေါက် (ဖမ်းမမိ) တို့အား မူးယစ်ဆေးဝါးနဲ့ စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အရေးယူထားကြောင်းတယ်လို့ ဆိုပါတယ်။