လက်ပံတောင်းတောင် ကြေးနီစီမံကိန်းကို ဝမ်ပေါင်ကုမ္ပဏီက မတ်လထဲမှာ ပြန်လည်ပတ်ဖို့ ပြင်ဆင်နေသလို စစ်ကိုင်းတိုင်း၊ ဆားလင်းကြီးမြို့နယ်မှာ စစ်ကောင်စီတပ်တွေက နယ်မြေထိန်းချုပ်ဖို့ တကျော့ပြန် ကြိုးစားနေပါတယ်။
စစ်အာဏာမသိမ်းခင်ကတည်းက လက်ပံတောင်းတောင် ကြေးနီစီမံကိန်းဇုန် လယ်မြေနေရာတွေအတွက် ဒေသခံပြည်သူတွေနဲ့ ဝမ်ပေါင်ကုမ္ပဏီတို့ အကြိမ်ကြိမ် ပြဿနာတွေ ဖြစ်ပွားခဲ့ကာ စစ်အာဏာသိမ်းပြီးချိန်မှာတော့ နယ်မြေလုံခြုံရေး မတည်ငြိမ်တာကြောင့် ဝမ်ပေါင်ကုမ္ပဏီက လုပ်ငန်းတွေ ရပ်ဆိုင်းထားခဲ့ပါတယ်။
ဆားလင်းကြီးမြို့နယ်ထဲမှာ စစ်ကောင်စီတပ်နဲ့ ဒေသခံပြည်သူ့ကာကွယ်ရေးအဖွဲ့တွေ အကြိမ်ကြိမ် ထိတွေ့မှုဖြစ်ပွားခဲ့ပေမဲ့ နိုင်ငံခြားသားကုမ္ပဏီ ဝမ်ပေါင်ကို မတိုက်ခိုက်ဖို့ အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီး ဦးရည်မွန်က အစည်းအဝေးတွေမှာ တားမြစ်ခဲ့ပါတယ်။
NUG နဲ့ PDF တွေဘက်က စည်းထားခဲ့ပေမဲ့ စစ်ကောင်စီကတော့ ဇန်နဝါရီ ၆ ရက်နေ့မှာ စီမံကိန်းအနီးနားက ကျေးရွာ ၄ ရွာမှာ အိမ်ခြေရာနဲ့ချီ မီးရှို့ဖျက်ဆီးပြီး နယ်မြေထိန်းချုပ်ရေး ပြန်လည်ပြုလုပ်ခဲ့ပါတယ်။
တွေ့ရာသင်္ချိုင်းဓားမဆိုင်းအဖွဲ့မှ စွမ်းသူမောင်က “၃ လပိုင်းကို တရုတ်ဝမ်ပေါင်က အလုပ်လည်ပတ်မယ်လို့ ကြားတယ်။ အဲ့ဒီအတွက်ကြောင့် သူတို့က နယ်မြေရှင်းလင်းရေး လုပ်နေတယ်လို့ ထင်တာပဲ။ ၁၀၀ မှာ ၈၀ ရာခိုင်နှုန်းက သေချာတယ်။ ဒါပေမဲ့လို့ NUG ကာကွယ်ရေးဝန်ကြီးဌာနကလည်း ဝမ်ပေါင်ကို မလုပ်ပါနဲ့လို့ တားမြစ်ထားတော့ ငါတို့က အလုပ်လုပ်ရတာ ခက်တယ်ကွ။ တားမြစ်တာကိုလုပ်ရင် ငါတို့က အရေးယူခံရမယ်။ ပြည်သူမုန်းတာခံရမယ်။ တချို့ဆို ပျူရွာတွေမှာ ပကဖ ပအဖတွေက မလုပ်ပါနဲ့ဦး၊ မလုပ်ပါနဲ့ဦး ပြောနေရင်းက ရွာတရွာကနေ သုံးလေးရွာဖြစ်သွားပြီကွာ။ တို့အလုပ်လုပ်ရတာ အင်မတန်ခက်ခဲတယ်။ ဝမ်ပေါင်ဆိုရင်လည်း ငါတို့ သာလွန်တဲ့အင်အားတွေနဲ့ လုပ်လို့ရတယ်။ ဒါပေမဲ့ NUG က မလုပ်ပါနဲ့၊ ဝန်ကြီးဦးရည်မွန်ကိုယ်တိုင်က အစည်းအဝေးမှာ တားမြစ်ထားတာဆိုတော့ တို့အလုပ်လုပ်ရတာခက်တယ်။ ၃ လပိုင်းမှာတော့ တရုတ်က ပြန်လည်ပတ်မယ်လို့ ကြားတယ်။ နယ်မြေထိန်းချုပ်ရေးအတွက် ပြည်သူကို အကြောက်တရားနဲ့ မီးရှို့နေတယ်လို့ထင်တယ်။ ကျောက်ဖြူတိုင်ရွာဆိုတာလည်း ဝမ်ပေါင်နဲ့ တရွာပဲခြားတယ်။ မိုးကြိုးပြင်ရွာဆိုလည်း တရွာမှမခြားဘူး။ လောက်စာလုံးနဲ့ပစ်ရင် တပစ်စာပဲရှိတယ်” လို့ ပြောပါတယ်။
မြန်မာ့တော်လှန်ရေးကို နိုင်ငံတကာမျက်နှာစာမှာ တရုတ်ဘက်က အကြမ်းဖက်သဏ္ဌာန် ပုံဖော်လာနိုင်တဲ့အတွက် အမျိုးသားညီညွတ်ရေးအစိုးရက မတိုက်ခိုက်ဖို့ တားမြစ်ခဲ့တာဖြစ်ပေမဲ့ စစ်ကောင်စီကတော့ အကြမ်းဖက် ခြိမ်းခြောက်ပစ်ခတ်တာတွေ ဆက်တိုက်ပြုလုပ်နေတယ်လို့ ဒေသခံတွေက ပြောပါတယ်။
စစ်ကောင်စီက ဒေသခံတွေကို အကြမ်းဖက်ရာမှာ ဝမ်ပေါင်ကုမ္ပဏီဝင်းကို တပ်စွဲအခြေချပြီး ပြုလုပ်နေတာဖြစ်ပြီး ဇန်နဝါရီ ၁၀ ရက် ညပိုင်းမှာလည်း ဝမ်ပေါင်ကုမ္ပဏီဝင်းထဲကနေ တုံရွာဘက်ကို စက်သေနတ်၊ လက်နက်ကြီးတွေနဲ့ ပစ်ခတ်တာကြောင့် အနီးနားကျေးရွာ ၇ ရွာက ရာနဲ့ချီတဲ့ ပြည်သူတွေဟာ ဘေးလွတ်ရာကို ကြိုတင် တိမ်းရှောင်နေရပါတယ်။
ဆားလင်းကြီးဒေသခံတဦးက “စစ်ကောင်စီရဲ့ ယုတ်မာမှုကြောင့် အညာမှာ မီးတွေ တောက်လောင်နေပါပြီ။ လာကြည့်ကြပါဦး။ တချို့လူတွေ အိမ်ပြန်စရာနေအိမ် မရှိတော့ပါဘူး။ နေနိုင်တဲ့သူတွေ နေကြပါ။ စစ်ကောင်စီရဲ့ ယုတ်မာမှုတွေဟာ ပြည်သူများ မြင်တွေ့တဲ့အတိုင်းပါပဲဗျာ။ ခုကြည့်နေတဲ့သူတွေ ပျော်ပါးနေတဲ့သူတွေ ကြည့်ပါ။ စစ်ကောင်စီရဲ့ ယုတ်မာမှုတွေ ပြည်သူများမြင်အောင်ကြည့်ပါ။ မီးက လုံးဝမနိုင်ဘူး ဖြစ်နေပါတယ်။ ပြည်သူ့ကာကွယ်ရေးတပ်ဖွဲ့များနဲ့ ဒေသခံကာကွယ်ရေးတပ်ဖွဲ့များ လာရောက်ငြှိမ်းသတ်ပေးနေကြပါတယ်။ စစ်ကောင်စီရဲ့ မတရားယုတ်မာမှု၊ ဘယ်လောက် စိတ်ဓာတ်အောက်တန်းကျသလဲဆို ပြည်သူတွေရဲ့ နေအိမ်များကို မီးရှို့ဖျက်ဆီးနေတာပါ” လို့ ပြောပါတယ်။
ဆာလင်းကြီးမြို့နယ်၊ လက်ပံတောင်းတောင်စီမံကိန်းနဲ့ ဝမ်ပေါင်ကုမ္ပဏီကို အကာအကွယ်ပေးဖို့အတွက် စစ်ကောင်စီဟာ ဒေသခံတွေကို အကြိမ်ကြိမ် အကြမ်းဖက်မှုတွေ ကျူးလွန်ခဲ့ပါတယ်။ ရိုက်နှက်ဖမ်းဆီးတာတွေ ပြုလုပ်ခဲ့သလို ၂၀၂၁ ခုနှစ်အတွင်းမှာ အရှင်လတ်လတ် မီးရှို့သတ်ဖြတ်မှုတွေပါ ကျူးလွန်ခဲ့တာဖြစ်ပါတယ်။
ကုလသမဂ္ဂရဲ့ စာရင်းတွေအရ စစ်ကိုင်းတိုင်းထဲမှာ ပြည်သူ ၆ သိန်းကျော်လောက်ဟာ နေအိမ်တွေ မီးလောင်ဆုံးရှုံးခဲ့ရပြီး စားဝတ်နေရေး ခက်ခဲနေကြပါတယ်။
စစ်ကိုင်းတိုင်း၊ ဆားလင်းကြီးမြို့နယ်၊ လက်ပံတောင်းတောင်ဒေသရှိ ကြေးနီစီမံကိန်းမှာ လုံခြုံရေးယူထားတဲ့ စစ်ကောင်စီတပ်သားတွေဟာ ပတ်ဝန်းကျင်ရွာတွေကို ဝင်ရောက်မွှေနှောက်နေသလို လက်နက်ကြီးတွေနဲ့လည်း ပစ်ခတ်နေတယ်လို့ ဒေသခံပြည်သူ့ကာကွယ်ရေးတပ်တွေက ပြောပါတယ်။
ဝမ်ပေါင်မြန်မာနဲ့ မြန်မာယန်စီကုမ္ပဏီထဲမှာ စစ်ကောက်စီ စစ်သားတွေနဲ့ ပုဂ္ဂလိက လုံခြုံရေးကုမ္ပဏီဝန်ထမ်းတွေ ပူးပေါင်းနေရာယူထားကြတာ ဖြစ်ပါတယ်။
ဆားလင်းကြီး ဒေသခံ ပြောက်ကျားတပ်ဖွဲ့တခုဖြစ်တဲ့ One Star Task Force ရဲ့ တာဝန်ခံက “ဇွဲထက်မြတ်ကုမ္ပဏီက ငှားထားတဲ့ ဝန်ထမ်းတွေနဲ့ (စစ် –) တွေ ရောပြီး လုံခြုံရေးယူထားတာ။ တရုတ်ကုမ္ပဏီတခုစီမှာ စစ်သား ၁၀၀ လောက်စီရှိနိုင်တယ်။ ဇွဲထက်မြတ်ကုမ္ပဏီက ငှားထားတဲ့ ဝန်ထမ်းတွေကိုလည်း စစ်သင်တန်းပေးထားတယ်လို့ သိရတယ်။ သူတို့ကို CDM လုပ်လာဖို့ ပြောထားတာ။ မလုပ်ကြဘူး။ အပြင်ပတ်လည်မှာ PDF တွေ ရှိတယ်ဆိုတာ သူတို့သိတာပဲ။ ဟိုအစောပိုင်းက ၁၁ ယောက်တော့ ထွက်လာဖူးတယ်” လို့ ပြောပါတယ်။
ဒီကာလမှာ ကြေးနီတူးဖော်တာမတွေ့ရပေမယ့် အရင်က တူးဖော်ထားတဲ့ ကြေးနီတွေကို တွဲကားတွေနဲ့ စစ်သားတွေ လုံခြုံရေးယူပြီး သယ်ယူနေတာ ၅ ကြိမ်လောက်ရှိပြီလို့လည်း သူက ဆက်ပြောပါတယ်။
ကုမ္ပဏီတွေရဲ့ အပြင်မှာလည်း ယင်းမာပင်ဘက်ကနေရောက်လာတဲ့ စစ်ကောင်စီတပ်သား ၁၀၀ လောက်က လုံခြုံရေးယူနေပြီး ရွာတွေကို နေ့စဉ်လှည့်သွားနေတယ်လို့ ဒေသခံတွေက ပြောပါတယ်။
“ဝါးတန်း၊ ဖောင်းကား၊ ရွှေပန်းခိုင်၊ သဲကောကြီး၊ တည်ပင်ကန်ရွာတွေကို ဝင်မွှေတာ။ ဟိုနေ့ကဆို မိုးကြိုးပြင်နဲ့ ဖောင်းကာကြားမှာ အဲကောင်တွေပစ်လိုက်တဲ့ လက်နက်ကြီးတလုံးကျတယ်။ လယ်တီဘက်မှာလည်း အတွင်းကကောင်တွေပစ်လိုက်တဲ့ လက်နက်ကြီးကျပြီး အိမ်တလုံးပျက်တယ်” လို့ ဒေသခံတယောက်က ပြောပါတယ်။
ညဘက်တွေမှာ စီမံကိန်းပတ်လည်မှာရှိတဲ့ ရဲကင်းတွေကလည်း သေနတ်တွေနဲ့ ရမ်းပစ်ကြတယ်လို့ ဆိုပါတယ်။
ဒီလို အခြေအနေတွေကြောင့် တရုတ်စီမံကိန်းတွေထဲမှာရှိနေတဲ့ စစ်ကောင်စီတပ်တွေနဲ့ ဒေသခံပြည်သူ့ကာကွယ်ရေးတပ်တွေ တိုက်ပွဲဖြစ်လာနိုင်တယ်လို့ One Star Task Force ရဲ့ တာဝန်ခံက ပြောပါတယ်။
ဒီစီမံကိန်းတွေရပ်တန့်ထားဖို့ ဒေသခံပြည်သူ့ကာကွယ်ရေးတပ်တွေက သတိပေးစာထုတ်ထားပြီး ဝမ်ပေါင်ကုမ္ပဏီတာဝန်ရှိသူကလည်း စီမံကိန်းနယ်မြေထဲမှာ ရေမလျှံအောင် လုပ်ဆောင်တဲ့ဝန်ထမ်းတွေပဲ ရှိတယ်လို့ ပြန်လည် ထုတ်ပြန်ထားပါတယ်။
စစ်ကိုင်းတိုင်း ယင်းမာပင်မြို့နယ် မုံရွာ- ယင်းမာပင်-ပုလဲ သွားကားလမ်း ဖိုလ်ဝင်တောင်ကြောမှာတော့ ဒီနေ့ ညနေပိုင်းက စစ်ကောင်စီယာဉ်တန်းကို မြောက်ယမားပြည်သူ့ကာကွယ်ရေးတပ်ဖွဲ့က ဒုတိယအကြိမ် မိုင်းဆွဲတိုက်ခိုက်ခဲ့ပါတယ်။
စစ်ကောင်စီယာဉ်တန်းသည် မုံရွာမြို့ကနေ ချင်းတွင်းမြစ်ကိုဖြတ်ကူးပြီး ဆားလင်းကြီးမြို့နယ် ညောင်ပင်ကြီးဆိပ်ကမ်းက တဆင့် ယင်းမာပင်မြို့ကို ထွက်လာတဲ့ ယာဉ်တန်းဖြစ်ပါတယ်။
ဒီညနေပိုင်းမှာ မြောက်ယမားပြည်သူ့ကာကွယ်ရေးတပ်ဖွဲ့က ပဒေသာမိုင်းနဲ့ ကြားဖြတ် မိုင်းဆွဲတိုက်ခိုက်ခဲ့လို့ စစ်ကောင်စီတပ်ဖွဲ့ဝင်တချို့ ထိခိုက်သေဆုံးနိုင်တယ်လို့ တပ်ဖွဲ့ရဲ့ ပြောရေးဆိုခွင့်ရှိသူ ကိုခန့်က ပြောပါတယ်။
“ဘယ်လောက်သေဆုံး ဒဏ်ရာရတယ်တော့ ကျနော်တို့ အတိအကျမသိရဘူး။ လမ်းမှာတော့ သွေးစတွေနဲ့ မှန်ကွဲစတွေကိုတွေ့ရတယ်” လို့ ပြောပါတယ်။
စစ်ကောင်စီယာဉ်တန်းဟာ ယင်းမာပင်မြို့ကတဆင့် ပုလဲမြို့ဘက်ကို ဆက်လက်မောင်းနှင်သွားပြီး လမ်းတလျှောက် စက်သေနတ်မော်တာတွေနဲ့ ဒလစပ် ရမ်းပစ်ခတ်သွားခဲ့ကြတယ်လို့လည်း ဆိုပါတယ်။
မနေ့ ည ၁၁ နာရီကျော်လောက်ကလည်း ယင်းမာပင်မြို့ကိုလာတဲ့ စစ်ကောင်စီယာဉ်တန်းကို ယင်းမာပင်မြို့နယ် ကောင်းဆင့်ကျေးရွာနားမှာ မြောက်ယမား ပြည်သူ့ကာကွယ်ရေးတပ်ဖွဲ့နဲ့ ဒေါင်းသွေးနီ တပ်ခွဲ ၁ တို့က ကြားဖြတ်မိုင်းဆွဲတိုက်ခိုက်ခဲ့ပါသေးတယ်။
အဲဒီတိုက်ခိုက်မှုကြောင့် ယာဉ်တန်းမှာပါတဲ့ ကား ၂ စီး လမ်းဘေးကို ထိုးကျသွားပြီး ကားပေါ်မှာပါတဲ့ စစ်ကောင်စီတပ်သားတွေထဲက ထိခိုက် သေဆုံးသူတွေကို ဆားလင်းကြီးမြို့နယ် ညောင်ပင်ကြီးဆိပ်ကမ်းကတဆင့် မုံရွာကို ပြန်သယ်သွားတယ်လို့ သိရပါတယ်။
