သီရိလင်္ကာ စီးပွားရေး အကျပ်အတည်းအတွင်း တရက်ကို ထမင်းတနပ် စားဖို့တောင် ခက်ခဲနေတယ်လို့ လက်ဖက်ခင်း လုပ်သားတွေက ပြောပါတယ်။

သီရိလင်္ကာနိုင်ငံက လက်ဖက်ခူးလုပ်သားတွေဟာ နေ့စဉ် လက်ဖက်ပေါင် ၄၀ လောက် ခူးရင် တလကို ဝင်ငွေ ရူပီး ၃ သောင်းလောက်ရပေမဲ့ ငွေတန်ဖိုး ကျဆင်းသွားတဲ့အတွက် အမေရိကန်ဒေါ်လာ ၈၀ လောက်သာ တန်ဖိုးရှိတဲ့ငွေကို ရကြတာပါ။

လက်ရှိဝင်ငွေနဲ့ သက်ကြီး ယောက်ခမနဲ့ ကလေး ၃ယောက်ကို ထောက်ပံ့ရတယ်လို့ လက်ဖက်ခူးလုပ်သား အရူလက်ပံ အစ်ဒေဂျိုဒီက ပြောပါတယ်။

"ဝင်ငွေက တခြားအသုံးစရိတ်ကို အသာထားလို့ စားဖို့တောင် မလောက်ဘူး၊ တရက် တနပ်ပဲ စားနိုင်တယ်၊ နေ့တိုင်း အလုပ်လုပ်ရင် တရက်ကို ရူပီး ၉၀၀ ရတယ်။"

လက်ဖက်ခူးလုပ်သား အရူလက်ပံ အစ်ဒေဂျိုဒီဟာ မြို့တော် ကိုလံဘိုကနေ လေးနာရီ ကားမောင်းရင် ရောက်တဲ့ ဘိုဂါဝမ် တာလာဝါမြို့က လက်ဖက်စိုက်ခင်းအတွင်း ဝန်ထမ်းအိမ်ရာမှာ နေပါတယ်။

လက်ရှိကာလမှာ ခက်ခဲနေတာကြောင့် ကလေးတွေအတွက် ကျောင်းစာအုပ်တွေလည်း မဝယ်နိုင်၊ စာအုပ်တွေလည်း အဖုံးမဖုံးနိုင်၊ ကျောင်းလခပေးရတဲ့ ကိစ္စတွေကလည်း ခက်လာနေပြီး ညဘက်မှာ အလုပ်လုပ်ရမလို ဖြစ်နေပြီလို့ အရူလက်ပံ အစ်ဒေဂျိုဒီက ပြောပါတယ်။

ကျောင်းသူ ၂ ယောက်အတွက် ၂ ကီလိုမီတာဝေးတဲ့ ကျောင်းကို သွားဖို့ ကားခကလည်း လတ်တလော လတွေအတွင်း ၂ ဆကျော် တက်သွားခဲ့လို့ အသုံးစရိတ်အတွက် ဖိအား ပိုများနေပါတယ်။ ဒါပေမဲ့ သူတို့ဟာ ပိုကောင်းတဲ့ဘဝကို ရဖို့ ကလေးတွေအတွက် ကျူရှင်လခ ပေးနေဆဲဖြစ်ပြီး ကလေးတွေ လက်ဖက်ခင်းမှာ အလုပ်လုပ်ရတာကို ဘယ်တော့မှ မမြင်ချင်ဘူးလို့ အိမ်ထောင်ဦးစီး မိုက်ကယ်က ပြောပါတယ်။

ကိုဗစ်-၁၉ ကပ်ရောဂါကြောင့် သီရိလင်္ကာရဲ့ အသက်သွေးကြော ခရီးသွားလုပ်ငန်း ဆိုးဆိုးရွားရွား ထိခိုက်ခဲ့အပြီး အစိုးရက အလွန်အမင်း အခွန်ဖြတ်တောက်လို့ ပြည်သူတွေ ဝင်ငွေ လျော့ကျခဲ့တာပါ။

ပြည်သူ ထောင်သောင်းချီကို ထောက်ပံ့နေတဲ့ လက်ဖက်လုပ်ငန်းဟာလည်း မနှစ်က ဓာတ်မြေဩဇာကို ကျန်းမာရေးအတွက် တားမြစ်ပိတ်ပင်တဲ့ အစိုးရရဲ့ ဆုံးဖြတ်ချက်ကြောင့် ဒုက္ခတွေ့ခဲ့ပါတယ်။

ဒီနှစ်ရဲ့ ပထမ ၃ လပတ်မှာ လက်ဖက်ထွက်နှုန်းဟာ ၂၀၀၉ ခုနှစ်ကနေ ခုထိ အနိမ့်ဆုံးအဆင့် အနေနဲ့ အထွက်နှုန်း ၁၅ ရာခိုင်နှုန်း ကျဆင်းခဲ့တယ်လို့ သီရိလင်္ကာ လက်ဖက်ဘုတ်အဖွဲ့က ပြောပါတယ်။

အစိုးရက ဓာတ်မြေဩဇာကို တားမြစ်ပြီးတဲ့နောက် ဓာတ်မြေသြဇာ မလုံလောက်တဲ့ လက်ဖက်ချုံတွေ ခြောက်သွေ့တဲ့ ရာသီဥတုကြောင့် ပျက်စီးခဲ့ရတယ်လို့လည်း ဘုတ်အဖွဲ့က ပြောခဲ့ပါတယ်။