မန္တလေးတိုင်း၊ မိုးကုတ်မြို့၊ ရေပူရပ်ကွက်က စစ်ကောင်စီခန့် အုပ်ချုပ်ရေးမှူး ဦးစန်းလွင်ရဲ့ နေအိမ်ရှေ့မှာ ဇူလိုင် ၁၇ ရက် ည ၁၀ နာရီကျော်က လက်လုပ်ဗုံး တစ်လုံး ပေါက်ကွဲခဲ့ပါတယ်။
အဆိုပါ လက်လုပ်ဗုံးကို အုပ်ချုပ်ရေးမှူးရဲ့ အိမ်ဝင်းနားမှာ လာချိတ်ထားတာဖြစ်ပြီး မပေါက်ကွဲခင် သုံးရက်လောက်အလိုကတည်းက လက်လုပ်ဗုံးကိုတွေ့ရှိခဲ့တာလို့ ဒေသခံတွေက ပြောပါတယ်။
လက်လုပ်ဗုံးကို တွေ့ပြီးနောက် စစ်တပ်က စစ်ကားတွေနဲ့ လာရောက်ကြည့်ရှုခဲ့ပေမယ့် ရှင်းလင်းပေးတာမရှိဘူးလို့ သိရပါတယ်။
ပေါက်ကွဲမှုမဖြစ်ခင်ကတည်းက လူတွေက လက်လုပ်ဗုံး တွေ့ထားတာကြောင့် ပေါက်ကွဲတဲ့အချိန်မှာ လူအထိအခိုက် ဒဏ်ရာရတာမရှိခဲ့ပါဘူး။
မန္တလေး၊ ချမ်းအေးသာစံမြို့နယ် ၆၆ လမ်း၊ လမ်း ၃၀ နဲ့ ၃၁ လမ်းကြားရှိ မန္တလေးတိုင်း ရဲတပ်ဖွဲ့မှူးရုံးရှေ့မှာ အစောင့်ကျနေတဲ့ ရဲတပ်ဖွဲ့ဝင်တွေကို ဇွန်လ ၂၂ ရက် မွန်းလွဲပိုင်းလောက်က လက်လုပ်ဗုံးနဲ့ထုပြီး သေနတ်နဲ့ပစ်ခတ်မှု ဖြစ်ပွားခဲ့ပါတယ်။
ဗုံးကွဲ ပစ်ခတ်မှုတွေကြောင့် အစောင့် ရဲတပ်ဖွဲ့ဝင် ၁ ဦးသေဆုံးပြီး ၃ ဦး ဒဏ်ရာရခဲ့တယ်လို့ သိရပါတယ်။
“အသံအကျယ်ကြီး တစ်ချက်ကြားပြီး သေနတ်သံတွေတော့ ကြားလိုက်တယ်။ အဲ့ဒီနားမှာ အစောင့်က အမြဲရှိတယ်”လို့ မန္တလေးတိုင်း ရဲတပ်ဖွဲ့မှူးရုံး အနီးအနားနေထိုင်သူ တစ်ဦးက ဆိုပါတယ်။
မန္တလေးတိုင်း ရဲတပ်ဖွဲ့မှူးရုံးရှေ့မှာ အတားအဆီးတွေ ချထားပြီး လုံခြုံရေး တင်းကျပ်ထားပါတယ်။
