ရန်ကုန်တိုင်း၊ မြောက်ဥက္ကလာပမြို့နယ်၊ ဋ ရပ်ကွက်၊ သုဓမ္မာလမ်းမကြီးပေါ် ဣန္ဒာမှတ်တိုင်က ဘီယာဆိုင်တခုနားမှာ ဖေဖော်ဝါရီ ၁၆ ရက်က လက်လုပ်ဗုံး ၁ လုံး တွေ့ရှိခဲ့လို့ ည ၉ နာရီ ၁၅ မိနစ်မှာ စစ်ကောင်စီဘက်က ဖောက်ခွဲခဲ့တယ်လို့ မြို့ခံတွေက ပြောပါတယ်။
လက်လုပ်ဗုံးတွေ့လို့ စစ်ကောင်စီဘက်က ဖောက်ခွဲတာဟာ အခုအကြိမ်နဲ့ဆို ၃ ခါရှိပြီဖြစ်ပြီး စစ်ကောင်စီက နာမည်ယူဖို့ ကြိုးစားနေတာလို့ မြို့ခံတဦးက ပြောပါတယ်။
“၃ ရက်နေ့က တကြိမ်၊ သူတို့ ထွေအုပ်ရုံးနားမှာပဲတွေ့လို့ သူတို့ ခွဲခဲ့တာပဲ။ ၁၁ ရက်နေ့က ကန်သာယာပန်းခြံ၊ အိမ်သာမှာ တွေ့တာ။ တွေ့တာကလည်း သူတို့လူပဲလေ။ မနေ့ညက ဣန္ဒာမှတ်တိုင်နားက မိုက်တီးဘီယာဆိုင်ရှေ့မှာ တွေ့တာ၊ ည ၈ နာရီ ၂၀ လောက်တွေ့တာလို့ ပြောတယ်။ လူထူမှ ဝဲကုတ်ပြသလို စစ်ကောင်စီက လုပ်နေတာ။ တွေ့တဲ့ဗုံးက ဘီယာခွံကို ဓာတ်ခဲလေးနဲ့ ချိတ်ထားရုံလေး။ သူတို့ဖောက်ခွဲတာ အသံအကျယ်ကြီး။ မြောက်ဒဂုံ ကြိုးတံတားကတောင် ကြားရတယ်။”
အဆိုပါဗုံးဟာ အန်ဒမန်ဂိုး ဘီယာ ၂ ဘူးမှာ 9V ဓာတ်ခဲ၊ ဝါယာကြိုး၊ ဆားကစ်ပြားတခုတို့နဲ့ ချိတ်ဆက်ထားကာ ည ၈ နာရီ ၅၀ မှာ စစ်ကောင်စီရောက်ရှိပြီး ည ၉ နာရီ ၁၅ မိနစ်မှာ ဖောက်ခွဲခဲ့တာပါ။
ဗုံးတွေ့ရှိမှုတွေဟာ ဖေဖော်ဝါရီ ၃ ရက်မှာ ဃ ရပ်ကွက်၊ မြို့နယ်ထွေအုပ်ရုံးအနီးမှာ တကြိမ်၊ ၁၁ ရက်နေ့က ဋ ရပ်ကွက်၊ ကန်သာယာပန်းခြံ၊ သန့်စင်ခန်းအနီးမှာ တကြိမ်၊ ၁၆ ရက်နေ့မှာ ဋ ရပ်ကွက် ဣန္ဒာမှတ်တိုင်အနီးမှာ တကြိမ်၊ စုစုပေါင်း ၃ ကြိမ်မှာ ၃ ကြိမ်စလုံး စစ်ကောင်စီဘက်က ဖောက်ခွဲခဲ့တယ်လို့ သိရပါတယ်။
မှော်ဘီမြို့နယ် အောက်ဝါးနက်ချောင်းကျေးရွာမှာ ဒီနေ့ မနက်ပိုင်းက လက်လုပ်ဗုံး တပ်ဆင်ထားတဲ့ ဒရုန်းတစင်း ပေါက်ကွဲခဲ့ပြီး လယ်ကွင်းထဲကျခဲ့ရာမှ ဒရုန်း ၆ စင်းကို ထပ်မံသိမ်းဆည်းရမိခဲ့တယ်လို့ ဒေသခံတွေက ပြောပါတယ်။
အောက်ဝါးနက်ချောင်းကျေးရွာ ဗောဓိရိပ်ငြိမ်ကျောင်းသွား လမ်းဘေးရှိ လယ်ကွင်းထဲမှာ ဒီနေ့ မနက် ၁၀ နာရီခွဲက ဒရုန်းတစင်း ကျရောက်ပေါက်ကွဲခဲ့ပြီးနောက် ဒရုန်းတွေ ထပ်မံဖမ်းဆီးရမိခဲ့တယ်လို့ ကျေးရွာနေသူတဦးက ဒီဗွီဘီကို ပြောပါတယ်။
“ရွာအုပ်ချုပ်ရေးပိုင်းက စစ်တပ်ကို ဖုန်းဆက်လိုက်လို့ လာပြီးသိမ်းသွားတာ။ နောက်ထပ်ဒရုန်းတွေ ဂျိုးဖြူပိုက်နားမှာ ထပ်တွေ့တယ် ပြောတယ်။ အားလုံး ဒရုန်း ၇ စင်း ရသွားတယ်” လို့ ပြောပါတယ်။
ဒရုန်းတွေဟာ မှော်ဘီလေတပ်ကို ဗုံးကြဲတိုက်ခိုက်ဖို့ ပြင်ဆင်ထားပေမဲ့ နည်းပညာ အားနည်းမှုကြောင့် အခုလို ပျက်ကျသွားတာ ဖြစ်နိုင်တယ်လို့ နိုင်ငံရေး တက်ကြွလှုပ်ရှားသူ တဦးက ဒီဗွီဘီကို ပြောပါတယ်။
“တကယ်တမ်းဆို နည်းပညာမြင့်ပြီး အရည်အသွေးကောင်းတဲ့ ဒရုန်းတွေဆို အခုလို ဖြစ်မှာ မဟုတ်ဘူး။ အခုက လူငယ်တွေက နိုင်သလောက်နဲ့ လုပ်နေတော့ အခုလို ဖြစ်တာ။”
လတ်တလောမှာ စစ်ကောင်စီတပ်က သိမ်းဆည်းရမိတဲ့ ဒရုန်းတွေကို မှော်ဘီမြို့မရဲစခန်းကို ပို့ဆောင်ထားတယ်လို့ မြို့ခံတွေဆီက သိရပါတယ်။
ဒီကနေ့ မနက်ပိုင်းကလည်း လှိုင်မြို့နယ် ၁၀ ရပ်ကွက် တံတားဖြူမှတ်တိုင် အင်းလျားကန်ဘောင်မှာ လက်လုပ်ဗုံး တပ်ဆင်ထားတဲ့ ဒရုန်းတစင်းကို စစ်တပ်က သိမ်းဆည်းရမိခဲ့ပါတယ်။
အလားတူ ဒီနေ့ မနက်အစောပိုင်းကလည်း မြောက်ဥက္ကလာပမြို့နယ် ၂ ရပ်ကွက် အုတ်ပုံဆိပ်အနီးမှာ လက်လုပ်ဗုံးတပ်ဆင်ထားတဲ့ ဒရုန်းတစင်းကို သိမ်းဆည်းရမိခဲ့ပါတယ်။
