မန္တလေးမြို့၊ အောင်မြေသာစံမြို့နယ်၊  ၁၉ လမ်း ၊ လမ်း ၆၀ နဲ့ ၆၁ လမ်းကြားရှိ အမှတ် (၁) ရဲစခန်းဝင်းထဲကို   ဩဂုတ် ၉ ရက် နေ့ လယ်ပိုင်းက လက်လုပ်ဗုံးနဲ့ပစ်ခံရတယ်လို့ သိရပါတယ်။

ဒီလိုပစ်ခံရပေမဲ့ လူထိခိုက်ဒဏ်ရာရတာ မရှိဘဲ အုတ်ခုံ အနည်းငယ် ထိခိုက်ပျက်စီးတာသာ ရှိခဲ့တယ်လို့ ဆိုပါတယ်။

“ရဲစခန်းဘက်က အုံးဆိုတဲ့ အသံကြားလိုက်တယ်။ အဲဒီနောက် တစ်ဆက်တည်းမှာပဲ သေနတ်သံတွေကြားရတယ်။ အဲဒီနား သွားမရဘူး ပိတ်ထားတယ်” လို့ နန်းရှေ့ရပ်မှာ နေထိုင်သူ တစ်ဦးက ပြောပါတယ်။

လက်လုပ်ဗုံးနဲ့ ပစ်ခံရတဲ့အတွက် စခန်းမှာ အသင့်ရှိနေတဲ့ အာဏာသိမ်းစစ်ကောင်စီရဲ့ အကြမ်းဖက်လက်နက်ကိုင်တွေဟာ ပြန်လည်ပစ်ခတ်တာတွေရှိခဲ့ပြီး ထိခိုက်ဒဏ်ရာရတာ မရှိဘူး လို့ ကနဦး သိရပါတယ်။

မန္တလေးမြို့ ချမ်းအေးသာစံမြို့နယ် ၆၃ လမ်း၊ ၃၄ လမ်း နဲ့ ၃၅ ကြားရှိ မြန်မာ့အာမခံလုပ်ငန်း မန္တလေးတိုင်းရုံးကို  မေလ ၆ ရက် မနက်ပိုင်းက လက်လုပ်ဗုံးနဲ့ ပစ်ခံရပြီး လူတွေ ထိခိုက်ဒဏ်ရာရတာနဲ့ ပျက်ဆီးဆုံးရှုံးတာ မရှိဘူးလို့ သိရပါတယ်။

အခုချိန်ဟာ မြန်မာ့အာမခံလုပ်ငန်းရုံးမှာ အာမခံ သက်တမ်းလာတိုးတဲ့ လူတွေအများအပြားရှိနေကြပြီး ဗုံးကွဲမှုဖြစ်ပွားခဲ့ပေမဲ့ လုပ်ငန်းမပျက် ဆက်လက်ဆောင်ရွက်ပေးနေတယ်လို့ ဒေသခံတွေက ပြောပါတယ်။

ဒီလို လက်လုပ်ဗုံးနဲ့ ပစ်ခံရတာ ဒုတိယအကြိမ်မြောက်ဖြစ်ပြီး မေလ ၂ ရက်နေ့ကလည်း အလားတူလက်လုပ်ဗုံးနဲ့ ပစ်ခံခဲ့ရပါတယ်။