တွင်းထွက်ပစ္စည်းဖြစ်တဲ့ စိန်ကို အရင်က ပြည်ပတင်ပို့ခွင့် လုံးဝပိတ်ပင်ထားရာကနေ လက်ဝတ်ရတနာအဖြစ် ပြုလုပ်ထားခြင်းမရှိတဲ့ စိန်အလွတ်တွေကိုသာ ပြည်ပတင်ပို့ခွင့် ပိတ်ပင်သွားမယ်လို့ စစ်ကောင်စီ စီးပွားရေးနဲ့ ကူးသန်းရောင်းဝယ်ရေး ဝန်ကြီးဌာနက ပြောင်းလဲထုတ်ပြန်လိုက်ပါတယ်။
ပြီးခဲ့တဲ့ ၂၀၂၀ ခုနှစ် ဩဂုတ်လမှာ တွင်းထွက်ပစ္စည်းနဲ့ ဓာတ်သတ္တုပစ္စည်းတွေဖြစ်တဲ့ စိန်၊ ရေနံစိမ်း၊ တိရစ္ဆာန်နဲ့ တိရစ္ဆာန်ထွက်ပစ္စည်းတွေဖြစ်တဲ့ ဆင်စွယ်၊ ဆင်၊ မြင်းနဲ့ ရှားပါး တိရစ္ဆာန်တွေ၊ လက်နက်ခဲယမ်းမီးကျောက်နဲ့ ရှေးဟောင်းပစ္စည်း စတာတွေကို ပြည်ပတင်ပို့ခွင့် မပြုတဲ့ ပစ္စည်းတွေအဖြစ် သတ်မှတ်ကြောင်း အမိန့်ကြေညာစာ ထုတ်ပြန်ခဲ့ပါတယ်။
အခုအခါ စစ်ကောင်စီ စီးပွားရေးနဲ့ ကူးသန်းရောင်းဝယ်ရေး ဝန်ကြီးဌာနက ပြည်ပကို တင်ပို့ခွင့်မပြုတဲ့ ပစ္စည်းတွေ သတ်မှတ်ထုတ်ပြန်ခြင်း အမိန့်ကြော်ငြာစာကို ပြင်ဆင် ထုတ်ပြန်လိုက်တာပါ။
အဲဒီလို ပြင်ဆင်ထုတ်ပြန်ရာမှာ “စိန်” ဆိုတဲ့ စကားရပ်နေရာမှာ “လက်ဝတ်ရတနာအဖြစ် ပြုလုပ်ထားခြင်းမရှိသည့် စိန်အလွတ်များ” လို့ အစားထိုးပြင်ဆင်ခဲ့တာ ဖြစ်ပါတယ်။
