လန်ဒန်မြို့လယ်မှာ စက်တင်ဘာ ၁၆ ရက်က ရဲအရာရှိနှစ်ယောက် ဓားထိုးခံခဲ့ရပြီး လက်ရှိ ဆေးရုံမှာ ကုသမှု ခံယူနေရကြောင်း မြို့တော်ရဲဌာနက ပြောကြားခဲ့ပါတယ်။
စက်တင်ဘာ ၁၉ ရက်မှာပြုလုပ်မယ့် ဘုရင်မကြီး အဲလိဇဘက်ရဲ့ ဈာပနအတွက် ပြင်ဆင်တဲ့အနေနဲ့ လန်ဒန်မှာ လုံခြုံရေး တိုးမြှင့်ချထားချိန် ဒီအဖြစ်အပျက် ထွက်ပေါ်လာတာပါ။
ရဲတပ်ဖွဲ့ရဲ့ ထုတ်ပြန်ချက်မှာတော့ စက်တင်ဘာ ၁၆ ရက် သောကြာနေ့၊ ၀၆း၀၀ နာရီလောက်က လက်စတာရင်ပြင်မှာ အမျိုးသားတယောက် ဓားနဲ့ထိုးတာကို ရဲတွေ ကြုံခဲ့ရကြောင်းနဲ့ ရဲတပ်ဖွဲ့ဝင်နှစ်ယောက် ဓားဒဏ်ရာတွေ ရရှိခဲ့ပြီးတော့ ဆေးရုံမှာ ကုသမှုခံယူနေကြောင်း ဖော်ပြထားပါတယ်။
ဒီဖြစ်ရပ်ဟာ အကြမ်းဖက်မှုနဲ့ပတ်သက်ခြင်း မရှိသလို အရာရှိ ၂ ယောက်လည်း အသက်အန္တရာယ် စိုးရိမ်ရတဲ့ အခြေအနေမှာ မရှိကြောင်း လန်ဒန်မြို့တော်ဝန် ဆဒစ်ခန်က ဘီဘီစီကို ပြောပါတယ်။
သံသယရှိသူ အမျိုးသားတယောက်ကို ပြင်းထန်တဲ့ ကိုယ်ထိလက်ရောက် ထိခိုက်စေမှု၊ အရေးပေါ်ဝန်ထမ်းကို စော်ကားမှုနဲ့ ဖမ်းဆီးထားကြောင်း သိရပါတယ်။ ဖမ်းမိထားသူကိုလည်း ဆေးရုံပို့ဆောင်ထားပြီး လက်ရှိအချိန်မှာ ကုသဖို့ ကျန်ရှိနေသေးကြောင်း ရဲတပ်ဖွဲ့က ပြောပါတယ်။
