မိုးသည်းထန်စွာ ရွာသွန်းပြီး ရေတိုက်စားမှုကြောင့် စစ်ကိုင်းတိုင်း၊ ရေဦး-ကလေးမြို့သွား မဟာမြိုင်လမ်းပိုင်း စက်တင်ဘာ ၁၉ ရက်နေ့ မနက် ၇ နာရီလောက်က ပျက်စီးသွားတာကြောင့် ခရီးသွားကား ရာနဲ့ချီ ပိတ်ဆို့နေတယ်လို့ ဒေသခံတွေက ပြောပါတယ်။
အဆိုပါ ပျက်စီးသွားတဲ့ လမ်းပိုင်းဟာ မင်းကင်းမြို့နယ်၊ ပျဉ်ကိုင်းကျေးရွာအနီ မိုင်တိုင် ၆၃ မိုင်နဲ့ ၆၄ မိုင်ကြားမှာ ပျက်စီးတာလို့ ဒေသခံတွေက ပြောပါတယ်။
“ညက မိုးရွာတာများတော့ ကားလမ်းကို ရေကျော်ပြီး ရေတိုက်စားကာ လမ်းပျက်တာပါ။ သွားလို့တော့ မရနိုင်လောက်ဘူး။ ကွင်းလမ်းလည်း မရှိဘူး ထင်တယ်ဗျ။ သွားရမလားဆိုပြီး ကားသေးတစီး မောင်းကြည့်တော့ ရေထဲပါသွားသေးတယ်။ နောက်ထပ်ကုန်ကားတစီးလည်း ထပ်မောင်းကြည့်တယ်၊ အဲကားကတော့ ချောက်ထဲကျပြီး မှောက်သွားသေးတယ်။ လူအသေအပျောက်တော့ မရှိဘူး။ ကားကတော့ ခေါင်းကတော့ ပိန်ရှုံ့သွားတယ်” လို့ ကားသမားတဦးက ပြောပါတယ်။
အခုလို ကားလမ်း ပျက်စီးသွားတာ တနေရာတည်း မဟုတ်ဘဲ လေး ငါးနေရာလောက် တာဘောင်ကျိုးကျ ပျက်စီးသွားတာလို့ ဒေသခံတွေက ပြောပါတယ်။
“ပိတ်မိနေတာက ရေဦးဘက်ကနေ ကလေးကို သွားမယ့်ကားတွေရော၊ ကလေးဘက်ကနေ ရေဦး ဘက်သွားမယ့် ကားတွေရော နှစ်ဖက်ပိတ်မိနေတာ။ အစီးအရေကတော့ အနည်းဆုံး ၁၀၀ အထက်မှာရှိမယ်။ တချို့က လမ်းပျက်တာ မသိတော့ ထပ်ရောက်လာတာတွေလည်း ရှိတယ်။ တချို့ကားတွေကတော့ လာလမ်းအတိုင်း နောက်ကြောင်းပြန်မောင်းတဲ့ ကားတွေလည်းရှိတယ်ဗျ” လို့ ဒေသခံရွာသားတဦးက ပြောပါတယ်။
အဆိုပါ ကလေး-ရေဦးလမ်းကို မဟာမြိုင်လမ်းလို့ ဒေသတွင်းမှာ ခေါ်ဆိုကြပြီး အဲဒီလမ်းဟာ မန္တလေး၊ မုံရွာ၊ ရွှေဘိုကနေ မြန်မာပြည်အထက်ပိုင်း ကလေး၊ တမူးကိုသွားတဲ့ အရေးပါတဲ့ လမ်း ဖြစ်တယ်လို့ ဒေသခံတွေက ပြောပါတယ်။
ရခိုင်ပြည်နယ်၊ မောင်တောမြို့နယ် အလယ်သံကျော်လမ်းပိုင်းမှာ မေ ၂၆ ရက် မနက်ပိုင်းကစပြီး လမ်းတွေ ပျက်စီးနေတာကြောင့် ကုန်းကားတွေ နွံနစ်ပြီး ကား အစီး ၃၀ လောက် ပိတ်မိနေတယ်လို့ ကုန်ကားသမားတွေဆီက သိရပါတယ်။
ရန်ကုန်ကနေ မောင်တောကို ဆင်းလာတဲ့ ကုန်တင်ကားကြီး မောင်းသူတစ်ဦးက “ကျနော်တို့ ကားသမားတွေက မောင်တောကလမ်းတွေမှာ အတော်ဒုက္ခတွေ့တာပဲ။ ဟိုဘက်က ဝေသာလီလမ်းက ပိတ်ထားတော့ အလယ်သံကျော်လမ်းဘက်က လာရတာ။ အခုက လမ်းမှာ ကားတွေ နွံနစ်နေတာ။ ကား ၃၀ လောက် ပိတ်မိနေတယ်” လို့ ပြောပါတယ်။
မောင်တော၊ အလယ်သံကျော်လမ်းပိုင်း ၁၄ မိုင်မှာ လက်ရှိ လမ်းတံတားဦးစီးဌာနက ပြုပြင်နေကာ မိုးရွာသွန်းမှုကြောင့် မပြီးစီးသေးတဲ့ နေရာတွေမှာ နွံနစ်ပြီး ကုန်ကားတွေလည်း ပိတ်မိနေပါတယ်။
မောင်တော၊ ဝေသာလီ၊ ဥဒေါင်းလမ်းပိုင်း ၁၃ မိုင်ကြားရှိ ဘောက်ကာဘာတစ်ခုအသစ် ပြုလုပ်နေတဲ့အတွက် အဲဒီလမ်းကို ယာယီပိတ်ထားရတာ ဖြစ်တယ်လို့ မောင်တောခရိုင် လမ်းတံတားဦးစီးဌာန တာဝန်ရှိသူတစ်ဦးက ပြောပါတယ်။
“ဝေသာလီ၊ ဥဒေါင်းလမ်းက ဘောက်ကာဘာတစ်ခု အသစ်လုပ်နေတာ မပြီးသေးနိုင်ဘူး။ အဲဒါကြောင့် ဒီလမ်းပိုင်းကို ယာယီပိတ်ထားရတာ။ ဇွန်လ ၁ ရက်နေ့မှာ ပြန်ဖွင့်ပေးသွားမှာပါ” လို့ ပြောပါတယ်။
မောင်တော၊ ဝေသာလီ လမ်းပိုင်း ၁၃ မိုင်မှာ ၂၀၁၂ ခုနှစ် မောင်တောဒေသ ပဋိပက္ခအပြီး ကျေးလက်ဒေသဖွံ့ဖြိုးရေးဦးစီးဌာနက ဖောက်လုပ်ခဲ့ကြတာဖြစ်ပြီး ကုန်ကားကြီးတွေ သွားလာမှု များပြားတဲ့အတွက် လမ်း၊ တံတားတွေ ပျက်စီးနေလို့ ပြုပြင်နေတာလည်း ဖြစ်ပါတယ်။
