တနင်္သာရီတိုင်း၊ ထားဝယ်ခရိုင်၊ ထားဝယ်အရှေ့တောဒေသ လမ်းပိုင်းတွေဖြစ်တဲ့ ထားဝယ်-ထီးခီးလမ်းပိုင်း၊ ပကာရီ-ရေဝိုင်းလမ်းပိုင်းနဲ့ မောင်မယ်ရှောင်-ရေဝိုင်းလမ်းပိုင်းတွေကို အသုံးပြုပြီး သွားလာနေသူတွေ စစ်ကောင်စီတပ်နဲ့ဆက်နွှယ်တဲ့ပစ္စည်းတွေမတင်ဖို့အပါအဝင် လိုက်နာဖို့ အချက် ၅ ချက်ကို မတ်လ ၂၉ ရက်နေ့မှာ ထားဝယ်မြို့နယ်၊ ဥသြစစ်ကြောင်းက ထုတ်ပြန်လိုက်ပါတယ်။

ထုတ်ပြန်ချက်မှာ လမ်းပိုင်းကို မနက် ၆ နာရီ ည ၆ နာရီအတွင်းသာ အသုံးပြုပြီး ကားမှန်ချမောင်းနှင်ဖို့နဲ့ အမိုးအကာဖုံးအုပ်ပြီး မသွားလာဖို့ စတဲ့အချက်တွေ ပါဝင်ပါတယ်။ ပြည်သူ့ကာကွယ်ရေးတပ်ဖွဲ့တွေရဲ့ စစ်ဆေးတာကိုလည်း ပူးပေါင်းပါဝင်ပေးဖို့နဲ့ စစ်တပ်နဲ့ အကျိုးစီးပွားဆက်စပ်တဲ့ ပစ္စည်းတွေကို သယ်ဆောင်ခြင်းမပြုဖို့လည်း တားမြစ်ထားပါတယ်။

မတ်လ ၂၄ ရက်ကလည်း ဥသြစစ်ကြောင်းက ရဲဘော်တွေ ထားဝယ်အရှေ့တောလမ်းပိုင်းမှာ စစ်တပ်နဲ့ အကျိုးစီးပွားဆက်စပ်တဲ့ ပစ္စည်းတွေကို ရောင်းဝယ်အသုံးချခြင်းမပြုကြဖို့ အသိပညာပေး လက်ကမ်းစာစောင်ဝေပြီး အသိပေးတာတွေ ပြုလုပ်ခဲ့ပါတယ်။

ထားဝယ်-ထီးခီး လမ်းပိုင်းမှာ ဖေဖော်ဝါရီလလယ်ပိုင်းက စစ်ကောင်စီနဲ့ ဒေသပြည်သူ့ကာကွယ်ရေးတပ်တွေအကြား တိုက်ပွဲတွေဖြစ်ခဲ့ပြီး လမ်းပိုင်းအသုံးပြုမှုကို ကော်သူးလေအာမီနဲ့ စစ်ကောင်စီက ရက်အကန့်သတ်မရှိ ပိတ်ခဲ့တယ်လို့ ကြေညာခဲ့ပြီးနောက် တိုက်ပွဲတွေမရှိတော့တဲ့ မတ်လဆန်းမှာတော့ မော်တော်ယာဉ်တွေ ပြန်လည်သွားလာနေတယ်လို့ လမ်းပိုင်းအသုံးပြုသူတွေက ပြောပါတယ်။

အခု သတိပေးထုတ်ပြန်ချက်မှာ ပါဝင်တဲ့ လမ်းပိုင်း ၂ ခုနဲ့ ဆက်စပ်နေတဲ့ ရေဝိုင်းရွာ အဝင်လမ်းထိပ်မှာ တပ်စွဲထားတဲ့ ဘုရားမဲစစ်ကောင်စီဂိတ်ကို ဥသြစစ်ကြောင်းနဲ့ မဟာမိတ်အဖွဲ့တွေက မတ်လ ၂၀ ရက်က လက်နက်ကြီးတွေနဲ့ ပစ်ခတ်တိုက်ခိုက်ခဲ့ပါသေးတယ်။

လမ်းပိုင်းအသုံးပြုသူတွေအနေနဲ့ သတိပေးချက်တွေကို မတ်လ ၂၉ ရက်ကစပြီး နောက်ထပ် ထုတ်ပြန်ချက် တစုံတရာ မထုတ်ပြန်မချင်း လိုက်နာပူးပေါင်းပေးကြဖို့ ဥသြစစ်ကြောင်းက အသိပေးထားပါတယ်။

ရှမ်းပြည်နယ်နဲ့ ကယားပြည်နယ် နယ်စပ် မိုးဗြဲ-ပီကင်းလမ်းကို ရက်အကန့်အသတ်မရှိ ယာယီပိတ်ထားလိုက်ကြောင်း မိုးဗြဲပြည်သူ့ကာကွယ်ရေးတပ်ဖွဲ့က  ဖေဖော်ဝါရီလ ၇ ရက်နေ့မှာ ထုတ်ပြန်ပါတယ်။

စစ်ကောင်စီတပ်တွေ  အင်အားအလုံးအရင်းနဲ့  မိုးဗြဲမြို့နေရာအနှံ့ အပြားမှာ နေရာယူထားတဲ့အပြင် တင့်ကား ၁ စီးပါ ထိုးစစ်ဆင်ပြင်ဆင်နေတဲ့အတွက် အချိန်မရွေး တိုက်ပွဲပြင်းထန်လာနိုင်တဲ့လို့ ဖေဖော်ဝါရီ ၇ ရက်ကစပြီး ဖြတ်သန်းသွားလာခွင့်ကို ယာယီပိတ်သိမ်းလိုက်ကြောင်း ထုတ်ပြန်ထားပါတယ်။

ဒါ့ကြောင့်  မိဘပြည်သူ ခရီးသွားဧည့်သည်တွေအနေနဲ့   မိုးဗြဲ-ပီကင်းလမ်းကို လုံးဝ ဖြတ်သန်းသွားလာတာ မလုပ်ဖို့ သတိပေးနှိုးဆော်ထားပါတယ်။

ဒါ့အပြင် မိုးဗြဲမြို့အနောက်ဘက်ရှိ ကျေးရွာတွေဆီကို စစ်ကောင်စီတပ်တွေက တင့်ကားအပါအဝင် အင်အားအလုံးအရင်းနဲ့ စစ်ကြောင်းထိုးလာတဲ့အတွက် မိုးဗြဲမြို့အနောက်ဘက်က ကျေးရွာတွေမှာ နေထိုင်တဲ့ မိဘပြည်သူတွေအနေနဲ့ ဘေးကင်းရာသို့ အမြန်ဆုံး ရွှေ့ပြောင်းနေထိုင်ကြဖို့လည်း သတိပေးနှိုးဆော်ထားပါတယ်။

ဒါ့အပြင် လွိုင်ကော်-ဘုရားဖြူလမ်း၊ လွိုင်ကော်-ဇရပ်ဖြူ-ဒေါတမကြီး-ဘောလခဲလမ်း၊ လွိုင်ကော်-မိုးဗြဲ-ဖယ်ခုံ လမ်းမကြီးတွေကိုလည်း သွားလာတာမလုပ်ဖို့ ဒေသ ပြည်သူ့ကာကွယ်ရေးတပ်ဖွဲ့တွေက ထုတ်ပြန်ထားပါတယ်။

ပြီးခဲ့တဲ့ ဖေဖော်ဝါရီ ၆ ရက်က သွားလာခွင့်ကန့်သတ်ထားတဲ့အကြားက လွိုင်ကော်-ဇရပ်ဖြူ၊ ဒေါတမကြီးလမ်းကို အသုံးပြုသွားလာခဲ့တဲ့ အရပ်သားကားတစီး မိုင်းနင်းမိပြီး  ၄ ဦး ပွဲချင်းပြီးသေဆုံးက ၂ ဦး ထိခိုက်ဒဏ်ရာပြင်းထန်စွာ ရရှိခဲ့ပါတယ်။

ဖယ်ခုံ၊ မိုးဗြဲအပါအဝင် ကရင်နီ(ကယား)ပြည်နယ်အတွင်း မြို့နယ်တော်တော်များများမှာ တိုက်ပွဲတွေဖြစ်ပွားနေသလို တိုက်ပွဲမရှိတဲ့ မြို့နယ်တွေမှာ လမ်းတွေပိတ်ဆို့နေတဲ့အတွက် အစားသောက်တွေ ပြတ်လပ်ပြီး ကုန်ဈေးနှုန်းတွေ အဆမတန်မြင့်တက်နေတဲ့ အခြေအနေတွေနဲ့ ကြုံတွေ့နေရပါတယ်။

စစ်ကောင်စီဘက်ကလည်း ဒီးမော့ဆို၊ ဖရူဆို၊ ဘောလခဲနဲ့ ရှားတောမြို့နယ်တွေကို စစ်အုပ်ချုပ်ရေး (မာရှယ်လော) ထုတ်ပြန်ထားသလို စစ်ရှောင်စခန်းတွေကို စစ်ကောင်စီက လက်နက်ကြီး၊ လေကြောင်းတွေနဲ့ ပစ်ခတ်တိုက်ခိုက်တဲ့အတွက် စစ်ရှောင်စခန်းတချို့ နေရာထပ်မံ ရွှေ့ပြောင်းနေရကာ ပိုမိုခက်ခဲတဲ့ အခြေအနေတွေနဲ့ ရင်ဆိုင်နေကြရပါတယ်။