အပြောင်းအရွှေ့သတင်းတွေကို မဖတ်ကြောင်း ထိပ်တန်းအသင်းတွေရဲ့ စိတ်ဝင်စားမှု ခံနေရတဲ့ ဆောက်သမ်တန် ကွင်းလယ်လူရိုမီယိုလာဗီယာက ပြောပါတယ်။
အသက် ၁၉ နှစ်ပဲရှိသေးတဲ့ ဘယ်လ်ဂျီယံကွင်းလယ်လူဟာ ဆောက်သမ်တန်မှာ ခြေစွမ်းကောင်းတချို့ ပြသနေလို့ ချဲလ်ဆီး၊ အာဆင်နယ်၊ မန်ယူအသင်းတွေရဲ့ စိတ်ဝင်စားမှုခံနေရတာပါ။
ဒါပေမဲ့ ဆောက်သမ်တန်အသင်းက တန်းမဆင်းရဖို့ ရုန်းကန်နေရတဲ့အတွက် အသင်းအပေါ်မှာပဲ အာရုံစိုက်ထားပြီး အပြောင်းအရွှေ့သတင်းတွေကို မဖတ်ကြောင်း လာဗီယာကပြောခဲ့တာပါ။
“အပြောင်းအရွှေ့အကြောင်း မစဉ်းစားချင်တဲ့အတွက် အဲဒီလိုသတင်းတွေကိုတောင် မဖတ်ဖြစ်ပါဘူး။ အသင်းမှာ ကစားရတာပျော်ရွှင်နေပြီး ကျနော်လုပ်ဆောင်ရမယ့်အလုပ်တွေကိုပဲ အာရုံစိုက်ထား ပါတယ်။ အပြင်မှာ ဘယ်လိုပဲ သတင်းထွက်နေနေ ကျနော်ဆုံးဖြတ်နိုင်တဲ့ကိစ္စတွေလည်း မဟုတ်ပါဘူး။ ဒါကြောင့်လည်း အာရုံမထား ချင်တာဖြစ်တယ်”လို့ လာဗီယာက ပြောပါတယ်။
သူဟာ မန်စီးတီးအသင်းရဲ့ လူငယ်စီမံကိန်းကနေ ထွက်ပေါ်လာသူဖြစ်ပြီး မနှစ်ကမှ ဆောက်သမ်တန်အသင်းဆီ အပြီးသတ်ပြောင်းရွှေ့ခဲ့တာဖြစ်ပါတယ်။
