တရုတ်နိုင်ငံမှာ အအေးလှိုင်းစတင် လွှမ်းခြုံလာနေလို့ တရုတ်မိုးလေဝသဌာနက နိုဝင်ဘာ ၇ ရက်မှာ ဆောင်းရာသီရဲ့ ပထမဆုံး နှင်းမုန်တိုင်းကို ဒုတိယအမြင့်ဆုံးဖြစ်တဲ့ လိမ္မော်ရောင်အဆင့် တပ်လှန့်သတိပေးချက် ထုတ်ပြန်လိုက်ပါတယ်။

ကိုဗစ်-၁၉ ကပ်ရောဂါ ကူးစက်မှု မြင့်လာနေချိန်မှာ တုပ်ကွေး ကူးစက်နေသလို ယာဉ်ကြော ပိတ်ဆို့နေတဲ့ကြားက ပြည်လုံးကျွတ် အအေးလှိုင်းက စိုးရိမ်စရာတွေကို ဆင့်ကဲ ပေးနေတာပါ။

မြို့တော် ပေကျင်းမှာလည်း ပုံမှန်နှစ်တွေထက် ၂၃ ရက် စောပြီး နှင်းကျခဲ့ပါတယ်။ တနင်္ဂနွေညက အပူချိန်ဟာ ဆယ်နှစ်အတွင်း အနိမ့်ဆုံး အဆင့်ကို ရောက်မယ်လို့ ခန့်မှန်းထားကြပါတယ်။

အအေးလှိုင်းဟာ ပေကျင်း၊ ရှန်ဟိုင်း၊ ကွမ်ကျိုးအထိ ပျံ့နှံ့နေပြီး တနင်္ဂနွေနေ့မှာ ၁၄ ဒီဂရီ ဆဲလ်စီးယပ်စ်ထိ ကျဆင်းမယ်လို့ မိုးလေဝသဌာနက ပြောပါတယ်။

လောလောဆယ် တရုတ်နိုင်ငံမြောက်ပိုင်းက မြို့ ၂၀ ကျော်မှာ ကိုဗစ်-၁၉ ကပ်ရောဂါ ကူးစက်နေပါတယ်။

ချုံချင်း၊ စီချွမ်နဲ့ ယူနန်ပြည်နယ်တို့လို နိုင်ငံအနောက်တောင်ပိုင်းမှာလည်း အောက်တိုဘာလလယ် ကတည်းက ကိုဗစ်-၁၉ ကပ်ရောဂါ အမြန်ကူးစက်နေပါတယ်။ အအေးလှိုင်းဟာ တုပ်ကွေး ကူးစက်မယ့်ဘေးကိုလည်း ပိုတိုးလာစေမှာပါ။

တရုတ်အရှေ့မြောက်ပိုင်းမှာ နှင်းမုန်တိုင်းတွေ ကျပြီး တချို့ ဒေသတွေမှာ နှင်းထုဟာ ၂၄ နာရီအတွင်း ၁ ဒသမ ၈ လက်မထိ ကျဆင်းနိုင်သလို နိုင်ငံမြောက်ပိုင်းမှာ နှင်းတွေ အကြီးအကျယ် ကျဆင်းနိုင်တယ်လို့ တရုတ်အမျိုးသားမိုးလေဝသဌာနက ခန့်မှန်းထားပါတယ်။