၂၀၂၂ ခုနှစ်က ပြင်သစ်နိုင်ငံ၊ ပဲရစ်မြို့မှာကျင်းပခဲ့တဲ့ ချန်ပီယံလိဂ်ဗိုလ်လုပွဲမှာ ဖြစ်ပေါ်ခဲ့တဲ့ ဖြစ်ရပ်တွေအတွက် လီဗာပူးပရိသတ်တွေအားလုံးကို UEFAက ငွေပြန်အမ်းဖို့ ဆုံးဖြတ်ခဲ့ပါတယ်။
အဲဒီချန်ပီယံလိဂ် ဗိုလ်လုပွဲမှာ ရီးရဲလ်မက်ဒရစ်က လီဗာပူးကို အနိုင်ရပြီး ချန်ပီယံဖြစ်ခဲ့တာပါ။ ပွဲမစခင်မှာ ကွင်းထဲဝင် ရောက်ဖို့အတွက် ပရိသတ်များစွာ ပရမ်းပတာဖြစ်ခဲ့ရပြီး ပြင်သစ်ရဲတွေက မျက်ရည်ယိုဗုံးတွေနဲ့ လူစုခွဲခဲ့ရတဲ့အထိဖြစ်ခဲ့တာပါ။
ဒါကြောင့်ပွဲစဉ်ကိုလည်း ၃၆ မိနစ်နောက်ကျပြီးမှာ ကျင်းပခဲ့ရပြီး အဲဒီဖြစ်ရပ်အတွင်းမှာ လီဗာပူးပရိသတ်အများအပြားဟာ လက်မှတ်ကိုင်ဆောင်ထားပေမဲ့ ကွင်းထဲဝင်ခွင့်မရခဲ့ဘဲ အိမ်ပြန်ခဲ့ရတာပါ။
အဲဒီဖြစ်ရပ်အပေါ် ပရိသတ်တွေရဲ့သောင်းကျန်းပုံကို ယူအီးအက်ဖ်အေက အပြစ်ဖို့ခဲ့ပေမဲ့ လွတ်လပ်တဲ့ စုံစမ်းစစ်ဆေးရေး လုပ်ဆောင်ခဲ့ပြီးနောက်မှာ ပြိုင်ပွဲကျင်းပရေးအပေါ်မှာပဲ တာဝန်ရှိကြောင်း ပေါ်ပေါက်ခဲ့တာပါ။
ဒီကြောင့် ဝင်ခွင့်မရတဲ့ လီဗာပူးပရိသတ်တွေအပါအဝင် ဗိုလ်လုပွဲလာကြည့်တဲ့ ပရိသတ်စုစုပေါင်း ၁၉၆၁၈ ယောက်အတွက် လက်မှတ်ခတွေကို ပြန်လည်ပေးအပ်သွားဖို့ ဆုံးဖြတ်ခဲ့တာပါ။ လက်မှတ်ခငွေ ပြန်ရကြမယ့်အပေါ် လီဗာပူး ပရိသတ်အဖွဲ့တွေကလည်း ကြိုဆိုခဲ့ကြပြီး ယူအီးအက်ဖ်အေက ပြန်အမ်းရမယ့်ပမာဏဟာ စုစုပေါင်း ပေါင် ၃ သန်းခွဲအထိရှိပါတယ်။
မန်စီးတီးနဲ့ ကစားမယ့် ပရီးမီးယားလိဂ်နောက်ဆုံးပွဲစဉ်မတိုင်ခင်မှာ လီဗာပူးပရိသတ်တွေဆီကနေ စာတိုတွေ အများအပြားလက်ခံရရှိခဲ့တယ်လို့ ဗီလာကွင်းလယ်လူ ကော်တင်ဟိုက ပြောပါတယ်။
လီဗာပူးကစားသမားဟောင်း ကော်တင်ဟိုဟာ မန်စီးတီးနဲ့ပွဲစဉ်မှာ ပွဲထွက်ကစားဖို့ရှိပြီး အနိုင်ကစားပေးဖို့ လီဗာပူးပရိသတ်တွေက ဆိုရှယ်မီဒီယာတွေကနေ တိုက်တွန်းတဲ့စာတွေ ရေးသားပေးပို့ခဲ့ကြတာပါ။
လီဗာပူးအသင်းဟာ မန်စီးတီးနဲ့ တမှတ်သာကွာဟနေပြီး မန်စီးတီးခြေချော်မှသာ ချန်ပီယံဆုကို ရယူနိုင်ဖို့ အခွင့်အရေးရှိမှာဖြစ်ပါတယ်။
“ကျနော့်ရဲ့အသင်းသစ်ရဲ့ အကျိုးအတွက်ပဲ ကြည့်သွားရမှာပါ။ အသင်းအတွက် အကောင်းဆုံးကစားသွားချင်တယ်။ ဆိုရှယ်မီဒီယာတွေကနေတဆင့် လီဗာပူးပရိသတ်တွေရဲ့ စာတိုတွေ အများကြီးလက်ခံရရှိခဲ့ပါတယ်။ ဒါပေမယ့် ဘာပဲဖြစ်ဖြစ် အဲဒီအပေါ် သိပ်ပြီးအာရုံမထားပါဘူး။ ကျနော် အာရုံစိုက်ထားတာက ကျနော်တို့ ကစားရမယ့်ပွဲစဉ် အတွက်ပဲရှိပါတယ်။ စီးတီးက ကမ္ဘာ့အကောင်းဆုံးအသင်းတသင်းဖြစ်လို့ အမြဲတမ်းခက်ခဲမှာပါ” လို့ ကော်တင်ဟိုက ပြောပါတယ်။
အသက် ၂၉ နှစ်ရှိ ဘရာဇီးကွင်းလယ်လူဟာ ၂၀၁၃ ခုနှစ်ကနေ ၂၀၁၇ ခုနှစ်အထိ လီဗာပူးမှာ ကစားခဲ့သူဖြစ်ပါတယ်။
