ရဟတ်ယာဉ်၀ယ်ယူမှု နဲ့ ပတ်သက်လို့ စစ်ကောင်စီက နိုင်ငံတော်သမ္မတ ဦး၀င်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နဲ့ ဒေါက်တာ၀င်းမြတ်အေးတို့ကို စွဲဆိုထားတဲ့ အဂတိမှုတွေကို သြဂုတ် ၁ ရက်က နေပြည်တော်အချုပ်ထောင်ရှိ အထူးတရားရုံးမှာ ရုံးထုတ် စစ်ဆေးခဲ့တယ်လို့ တရားရုံးနဲ့နီးစပ်တဲ့အသိုင်းအဝိုင်းကနေ သိရပါတယ်။
၂၀၂၁ ခုနှစ်အတွင်းမှာ သဘာဝဘေးအန္တရာယ်ကာကွယ်ရေးလုပ်ငန်းတွေ ဆောင်ရွက်တာမှာ အသုံးပြုဖို့ ရဟတ်ယာဉ်တစ်စီး ၀ယ်ယူအသုံးပြုတာ၊ ငှားရမ်းတာ၊ သက်တမ်းတိုးတာ၊ ပြုပြင်ထိန်းသိမ်းတာတွေနဲ့ပတ်သက်ပြီး စစ်ကောင်စီက နိုင်ငံတော်သမ္မတ ဦး၀င်းမြင့်နဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ဒေါက်တာ၀င်းမြတ်အေးတို့ကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ နဲ့ တရားစွဲဆိုထားတာပါ။
ဒီနေ့ရုံးထုတ်မှာ ရဟတ်ယာဉ်သက်တမ်းတိုးတဲ့ ပုဒ်မ ၄၇ အတွက် လူကယ်ပြန် ဒုတိယ ဝန်ကြီးဟောင်း ဦးစိုးအောင်ကိုပဲ ဆက်လက်စစ်ဆေးခဲ့ပြီး မနက်ဖြန်ရုံးချိန်းမှာ ရဟတ်ယာဉ်နဲ့ ပတ်သက်တဲ့ ပုဒ်မ ၄၈ အတွက် ဦးစိုးအောင်ကိုပဲ ဆက်လက်စစ်ဆေးမယ်လို့ တရားရုံးနဲ့နီး စပ်သူတဦးက ပြောပါတယ်။
ဒါ့အပြင် မနက်ဖြန်ရုံးချိန်းမှာ ဦးမောင်ဝိတ်နဲ့ပတ်သက်တဲ့ အဂတိမှုတွေအတွက် သက်သေသုံးဦးကို ဆက်လက်စစ်မေးမယ်လို့လည်း သိရပါတယ်။
ဒီအမှုတွေနဲ့ပတ်သက်လို့ စွဲချက်တင်အမိန့်ချပြီး အဂတိကော်မရှင်က ဦးရဲထက်ဆိုသူကို ပြန်ခေါ်သက်သေအဖြစ် စစ်ဆေးပြီးဖြစ်ပေမယ့် မစစ်ဆေးရသေးတဲ့ သက်သေတွေကို ဆက်လက်စစ်ဆေးတာလို့ တရားရုံးနဲ့နီးစပ်သူက ဆိုပါတယ်။
စစ်ကောင်စီက ဒေါ်အောင်ဆန်းစုကြည်အနေနဲ့ ဦးမောင်ဝိတ်ဆီက ဒေါ်လာ ငါးသိန်းခွဲ လာဘ်စားတယ်လို့ စွပ်စွဲပြီး အဂတိနှစ်မှုနဲ့ တရားစွဲဆိုထားတာဖြစ်ပါတယ်။
ဦးမောင်ဝိတ်က သူ့အနေနဲ့ လှူဒါန်းတာသာဖြစ်တယ်လို့ ထွက်ဆိုထားပါတယ်။
