စီးပွားရေးကျပ်တည်းပြီး မိသားစုစားဝတ်နေရေးအဆင်မပြေတဲ့အတွက် ရန်ကုန်မြို့ ကမ္ဘာအေးဘုရားလမ်းပေါ်ရှိ လူကူးခုံးကျော်တံတားပေါ်ကနေ  အသက် ၅၈ နှစ်အရွယ် အမျိုး သားကြီးတစ်ဦး  သြဂုတ် ၂၅ ရက် ဒီနေ့မနက်ပိုင်းက  ခုန်ချခဲ့တယ်လို့ မရမ်းကုန်းမြို့ခံတွေဆီက သိရပါတယ်။

မရမ်းကုန်းမြို့နယ်၊ အမှတ် ၉ ရပ်ကွက်၊ ကမ္ဘာအေးဘုရားလမ်းမကြီးပေါ်ရှိ လူကူးခုံးကျော်တံတားပေါ်ကနေ ခုန်ချခဲ့တာဖြစ်တယ်လို့ ရပ်ကွက်နေသူတစ်ဦးက ပြောပါတယ်။

"အသက်လဲကြီးပါပြီ သူ့ကြည့်ရတာ စိတ်ညစ်နေတဲ့ပုံ တံတားပေါ်က တက်သွားပြီး ခုန်ချတာ။ လူတွေလည်း လန့်သွားတယ်။ စိတ်ထဲလည်းမကောင်းဘူး။ ပရဟိတကားတွေ လာသယ်ပြီး ဆေးရုံပို့ပေးကြတယ်"လို့ ပြောပါတယ်။

ခုံးကျော်တံတားပေါ်က ခုန်ချသူဟာ မြောက်ဒဂုံမြို့နယ်မှာ နေထိုင်တဲ့ အသက် ၅၈ နှစ်အရွယ် ဦးစိုင်းမြင့်မိုးဖြစ်တယ်လို့ သွားရောက်ကူညီခဲ့တဲ့ မြန်မာ့ကြယ်ဖြူလူမှုကူညီရေးအသင်း တာဝန်ရှိသူ တယောက်က ပြောပါတယ်။

"အဲ့ဒီဦးလေးက အိမ်ကပျောက်နေတာကြာပြီ စိတ်ညစ်လို့ လုပ်တယ်လို့ ထင်တာပါပဲ။ အခုသူ့မိသားစုနဲ့ ဆက်သွယ်ပေးလိုက်ပြီ။ မသေပါဘူး မြောက်ဥက္ကလာ မေဓါဝီဆေးရုံမှာ တင်ထားတယ်။”

ဦးစိုင်းမြတ်မိုးဟာ  တံတားပေါ်က ခုန်ချခဲ့တဲ့ အရှိန်ကြောင့် ခါးဆစ်ရိုးကျိုးသွားပြီး မေဓာဝီဆေးရုံ မှာ ဆေးကုသမှုခံယူနေတယ်လို့  မြန်မာ့ကြယ်ဖြူလူမှုကူညီရေးအသင်းကနေ သိရပါတယ်။

မြန်မာနိုင်ငံမှာ စစ်တပ်အာဏာသိမ်းပြီးနောက် တိုင်းပြည်စီးပွားရေး ယိုယွင်းကျဆင်းလာနေတာနဲ့ အမျှ ကျပ်ငွေတန်ဖိုး စံချိန်တင် ဖောင်းပွ ငွေတန်ဖိုးကျဆင်းလာပြီး အလုပ်အကိုင်ပိုမိုရှားပါးလာတာ ကြောင့် ပြည်သူလူထုတွေ  စားဝတ်နေရေး အဆင်မပြေ ကျပ်တည်းမှုနဲ့ ရင်ဆိုင်ကြုံတွေ့ နေရတာ ဖြစ်ပါတယ်။

ထိုင်း-မြန်မာနယ်စပ် တာ့ခ်ခရိုင် မဲဆောက်မြို့မှာ စက်တင်ဘာ ၃၀ ရက် ဒီကနေ့မနက်က ခုံးကျော်ကွန်ကရစ်တံတားပြိုကျပြီး အောက်မှာရှိတဲ့ ဆယ်ဘီးကားကို ဖိမိတာကြောင့် ကားထဲက လူ ၂ ယောက် သေဆုံးသွားပါတယ်။ 

မဲဆောက်မြို့ ထာ့ဆိုင်လွတ်ရပ်ကွက် မြို့ပတ်လမ်းသစ် ဖတ်ထရဝိထယား ကိုယ်ပိုင်ကျောင်းရှေ့မှာ ဒီမနက် ၁၁ နာရီကျော်လောက်က ခုံးကျော်ကွန်ကရစ်တံတားပြိုကျပြီး ထိခိုက်ဒဏ်ရာရသူတွေရှိကြောင်း တိုင်ကြားချက်ရတဲ့အတွက် ချက်ချင်း သွားရောက်ကြည့်ရှုခဲ့တယ်လို့ မဲဆောက်ရဲစခန်းတာဝန်ရှိသူက သတင်းထောက်တွေကို ပြောပါ တယ်။ 

တာဝန်ရှိသူတွေ လူနာတင်ယာဉ်တွေနဲ့အတူ ရောက်သွားချိန်မှာ မြေသယ်ဆယ်ဘီးကား တစ်စီးက ပြိုကျလာတဲ့ ကွန်ဂရစ်တံတားအောက်မှာ ပြားဝပ်နေတာကြောင့် ကရိန်းကား ၂ စီးနဲ့  ကားပေါ်ပိနေတဲ့ ကွန်ကရစ်တိုင်ကို အချိန် ၂ နာရီကြာ ဖယ်ရှားပစ်ရတယ်လို့ ဆိုပါတယ်။ 

ကားခေါင်းထဲမှာတော့ သေဆုံးနေတဲ့ ယာဉ်မောင်းသမားနဲ့ ဘေးကထိုင်လိုက်လာတဲ့ အလုပ်သမား ၁ ဦးတို့ကို တွေ့ရပြီး အမည်ကိုတော့ စုံစမ်းဆဲပဲလို့ ရဲတပ်ဖွဲ့က ပြောပါတယ်၊ 

မျက်မြင်ပြည်သူတစ်ဦးကတော့ အဆိုပါဆယ်ဘီးကားဟာ အဲဒီနေရာနဲ့ မီတာ ၂၀၀ အကွာက ဆောက်လုပ်ရေးလုပ်ငန်းခွင်မှာ  မြေကြီးတွေသွားသွန်ချပြီးအပြန် အမြင့်ပေ ၅ မီတာခွဲ လောက်ရှိတဲ့ ခုံးကျော်တံခါးအောက် ဖြတ်သွားစဉ် အခုလို မတော်တဆထိခိုက်မှုကြုံရတာလို့ ပြောပါတယ်။ 

ခုံးကျော်တံတား ပြိုကျရတဲ့အကြောင်းရင်းနဲ့ ပတ်သက်ပြီး ရဲတပ်ဖွဲ့က ဆက်လက်စုံစမ်းနေဆဲဘဲလို့  ချင်းမိုင်နယူးစ်သတင်းမှာ ဖော်ပြပါတယ်။