စစ်ကိုင်းတိုင်း အရာတော်မြို့ပေါ် လယ်တီရပ်ကွက်ကို စစ်တပ်က ဖေဖော်ဝါရီ ၁၇ ရက် ညနေက ဝင်ရောက်မီးရှို့ခဲ့တာကြောင့်  နေအိမ် ၈ လုံး ပျက်စီးဆုံးရှုံးခဲ့ပြီး ရပ်ကွက်အတွင်းက လူငယ်တချို့ ရိုက်နှက်ခံထားရတယ်လို့ ဒေသခံတွေက ပြောပါတယ်။

အရာတော်မြို့ခံတဦးက "မနေ့ ည ၉ နာရီနောက်ပိုင်းမှာ ပြန်ထွက်သွားတယ်။ ဖမ်းခံ လိုက်ရတဲ့သူတွေထဲက လူငယ်တွေနဲ့ CDM ဝန်ထမ်းတွေ သီးသန့်ခေါ်ပြီး ရိုက်နှက်စစ်ဆေး တယ်” လို့ ပြောပါတယ်။ 

လယ်တီရပ်ကွက်ကို စစ်တပ်ဝင်ရောက်လာပြီးနောက် ​ပြေးချိန်မရဘဲ ရပ်ကွက်နေ ပြည်သူတွေ ဖမ်းဆီးခံလိုက်ရတာလို့ ဆိုပါတယ်။

အရာတော်မြို့ပေါ်က လယ်တီရပ်ကွက်ကို အမှတ် ၁၀ လေ့ကျင့်ရေးတပ်က စစ်ကား ၇ စီးနဲ့ သေနတ်ပစ် ဝင်ရောက်လာပြီး  ရပ်ကွက်အတွင်း နေအိမ်တွေထဲက ပစ္စည်းတွေကို သယ်ဆောင် ကာ မီးရှို့ခဲ့တယ်လို့ ဒေသခံတဦးက ပြောပါတယ်။

ပြီးခဲ့တဲ့ရက်ပိုင်း လယ်တီရပ်ကွက်နားက ငါးထောင့်လေး တင့်ကားစစ်တပ်က ထွက်လာတဲ့ စစ်ယာဉ်တန်းကို လယ်တီရပ်ကွက်နဲ့ တပ်မ ၅၀၀၄ ကြားမှာ ကာကွယ်ရေးအဖွဲ့‌တွေက မိုင်းဆွဲ ခဲ့သလို အရာတော်မြို့ တပ်ရင်း ၁၀ ကို ၈၀ မမ တွေနဲ့ ပစ်ခတ်တာကြောင့် အခုလို မီးရှို့တာဖြစ်နိုင်တယ်လို့ ဒေသခံတွေက ပြောပါတယ်။

မကွေးတိုင်း၊ ပခုက္ကူမြို့နယ်မှာ ဧပြီ ၁၀ ရက်နေ့မှာ စစ်ကောင်စီတပ်က လူငယ် ၁၀ ယောက်ဝန်းကျင်ကို ဖမ်းဆီးခဲ့ပြီး ဖုန်းတွေထဲမှာ နိုင်ငံရေးပို့စ်မပါတဲ့ လူငယ်တွေကို ပိုက်ဆံ ၃၀,၀၀၀ ကျပ်တောင်းပြီး ပြန်လွှတ်ပေးနေတယ်လို့ ဒေသခံတွေက ပြောပါတယ်။

"ဖုန်းထဲမှာ နိုင်ငံရေး ပို့စ်ပါရင် ဆက်ဖမ်းထားတယ်။ ဖုန်းထဲမှာ နိုင်ငံရေးပို့စ်မပါရင်တော့ ပိုက်ဆံ​တောင်းပြီး ပြန်လွှတ်ပေးတယ်"လို့ ဒေသခံတဦးက ပြောပါတယ်။

ဧပြီ ၉ ရက်ကစပြီး စစ်ကောင်စီတပ်တွေက ဆိုင်ကယ် ၁ စီးကို ယောက်ျားလေး နှစ်ယောက် စီးလာပါက ပစ်ခတ်ဖမ်းဆီးနေတာဖြစ်ပြီး ဧပြီ ၁၀ ရက်ကလည်း ၁၀ ယောက်ကျော် ဖမ်းဆီးခံခဲ့ရတယ်လို့ ဒေသခံတွေက ပြောပါတယ်။

ဒေသခံနောက်တဦးက “မြို့ထဲမှာ လုယက်မှုတွေပေါနေပြီး လုံခြုံစိတ်ချရမှုမရှိတဲ့အချိန်မှာ တယောက်တည်း ဆိုင်ကယ်စီးဖို့က အဆင်မပြေဘူး၊ ဆိုင်ကယ်ကို နှစ်ယောက်စီးလို့ဆိုတာ ထပ်ပြီး လူငယ်တွေဆိုရင်ကို ပြဿနာရှာချင်ကြတာ” လို့ ပြောပါတယ်။

စစ်ကောင်စီတပ်တွေဟာ ပခုက္ကူမြို့ပေါ်က ပခုက္ကူတက္ကသိုလ်နား ရေစကြိုတိုင် ပခုက္ကူအဝင် မြို့ရှောင်လမ်းဆုံ၊ မြိုင်လမ်းနဲ့ ပေါက်လမ်းဆုံ၊ ဗိုလ်ချုပ်လမ်းပေါ်နဲ့ မြိုင်လမ်းပေါ်မှာ အဓိကထား ဖမ်းဆီးနေတာလို့ သိရပါတယ်။

စစ်တပ်က အာဏာသိမ်းပြီးနောက်ပိုင်း မြို့ရှောင်လမ်းပေါ်မှာ မကြာခဏ ဓားထောက်လုယက်တာတွေအပြင် ဆိုင်ကယ်ခိုးတာ၊ မီးကြိုးဖြတ်ခိုးတာတွေအပြင် မြို့လယ်ခေါင်မှာလည်း လုယက်တာမျိုးရှိခဲ့ပြီး ​​ဒေသကာကွယ်ရေးတပ်တွေကတော့ သတိပေးစာ ထုတ်ပြန်ထားတယ်လို့ သိရပါတယ်။