ပုဂံမြို့သစ်မှာ မေလ ၃၀ ရက် မနက်ပိုင်းက အကြမ်းဖက်စစ်ကောင်စီတပ်ဖွဲ့တွေက သေနတ်နဲ့ ပစ်ခတ်လို့ လူငယ်အမျိုးသား ၁ ယောက် သေဆုံးခဲ့ပြီး ၅ ယောက် အဖမ်းခံခဲ့ရပါတယ်။
ဒလန်တွေက အကြမ်းဖက်စစ်ကောင်စီကို လက်နက်တွေရှိတယ်ဆိုပြီး သတင်းပေးတာကြောင့် ရုံးတန်းရပ်ကွက်နဲ့ မှန်ချိုရပ်ကွက်ကို ဝင်ရောက်စီးနင်းရာ ကိုမိုးမြင့်အောင် နေအိမ်တံခါး ပိတ်ထားတာကြောင့် သေနတ်နဲ့ပစ်ခတ်ရာ ဝမ်းဗိုက် ကျည်ဆန်ထိမှန်ပြီး သေဆုံးခဲ့တာလို့ ဒေသခံတစ်ယောက်က ဒီဗွီဘီကို ပြောပါတယ်။
ဒါ့အပြင် မောင်ဇွဲမာန်အောင်၊ မောင်ချမ်းမြေ့နဲ့ ဦးဇာနည်ပါ ၅ ယောက်ကိုလည်း စစ်တပ်က အကြမ်းဖက် ရိုက်နှက်ဖမ်းဆီးသွားပါတယ်။
ကိုမိုးမြင့်အောင်ရဲ့အလောင်းကိုလည်း စစ်တပ်က ယူဆောင်သွားပြီးတော့ ဇနီးဖြစ်သူဟာ ကိုယ်ဝန်နဲ့ ကျန်ရစ်ခဲ့တယ်လို့ ဒေသခံတွေဆီကနေ သိရပါတယ်။
