ပရီးမီးယားလိဂ်အဖွဲ့ချုပ်ဟာ လာမယ့်ရာသီကစတင်ပြီး ကစားသမား ၅ ဦးအထိ လူစားလဲခွင့်ပြုတော့မယ်လို့ သိရပါတယ်။
ဥရောပနဲ့ တခြားလိဂ်တွေမှာ ကိုဗစ်ရောဂါကူးစက်မူ ပထမလှိုင်းပြီးကတည်းက တပွဲကို လူစားလဲခွင့် ၃ ဦးကနေ ၅ ဦးအထိ ခွင့်ပြုခဲ့တာပါ။ ဒါပေမဲ့ ဗြိတိန်က ဘောလုံးလိဂ်တွေမှာတော့ မူလကအတိုင်း ၃ ဦးသာ လူစားလဲခွင့်ပြုခဲ့ကြတာပါ။
အခုနှစ်ရာသီမှာ အသင်းကြီးတွေဘက်က ၅ ဦးလဲလှယ်ခွင့်ရရှိလိုပေမဲ့ အသင်းငယ်တွေဘက်က လက်မခံခဲ့တာကြောင့် အဆင်မပြေဖြစ်ခဲ့ရတာပါ။ လက်ရှိအချိန်မှာတော့ အသင်းငယ်တွေကလည်း စိတ်ပြောင်းလဲသွားပြီး ၅ ဦးလူစားလဲခွင့်ကို လက်ခံ သဘောတူသွားဖို့ ရှိပါတယ်။ အဲဒီအတွက် မဲပေး ဆုံးဖြတ်ချက်ကို မတ် ၃၁ ရက်နေ့ ပြုလုပ်သွားဖို့ရှိတယ်လို့ သိရပါတယ်။
PFA လို့ ခေါ်တဲ့ ပရော်ဖက်ရှင်နယ်ဘောလုံးသမားများအဖွဲ့အစည်းဥက္ကဋ္ဌ မိုလန်ဂိုကတော့ ၅ ဦး လူစားလဲခွင့်အပေါ် ထောက်ခံကြိုဆိုပြီး ဒီစည်းမျဉ်းဟာ အသင်းကြီးတွေအပေါ်မှာပဲ အားသာချက်ရှိစေတာ မဟုတ်ဘဲ ကစားသမားတွေရဲ့ အကျိုးအတွက် ကောင်းမွန်တယ်လို့ ပြောပါတယ်။
ဘောလုံးစည်းမျဉ်းတွေကို တရားဝင်သတ်မှတ်တဲ့ IFAB ကတော့ ၅ ဦးလူစားလဲခွင့်ကို အမြဲတမ်းစည်းမျဉ်းတခုအနေနဲ့ သတ်မှတ်ကြောင်း ပြီးခဲ့တဲ့အောက်တိုဘာလက အတည်ပြုချက် ထုတ်ပြန်ခဲ့ပါတယ်။
