မြန်မာ့ဒီမိုကရေစီအရေးမှာ ဦးဆောင်ပါဝင်လှုပ်ရှားခဲ့ကြတဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ မြန်မာစာပေလောကမှာ ထင်ရှားတဲ့ စာရေးဆရာမကြီး လူထုဒေါ်အမာတို့ အပါအဝင် ရှေ့ ဆောင်မြန်မာအမျိုးသမီးတွေကို မြန်မာနိုင်ငံဆိုင်ရာ အမေရိကန်သံရုံးက ဂုဏ်ပြုကြောင်း ထုတ်ပြန်ထားပါတယ်။

တန်းတူညီမျှရေး၊ လူ့အခွင့်အရေးနဲ့ ဒီမိုကရေစီရေးတို့အတွက် ရှေးမဆွကတည်းက ဦးဆောင်လှုပ်ရှားခဲ့ကြတဲ့ မြန်မာနိုင်ငံတွင်းက အမျိုးသမီးတွေနဲ့ မိန်းခလေးတွေကို မတ် ၈ ရက် ဒီကနေ့မှာ ကျရောက်တဲ့ အပြည် ပြည်ဆိုင်ရာအမျိုးသမီးများနေ့မှာ ဂုဏ်ပြုကြောင်း ထုတ်ပြန်ထားတာဖြစ်ပါတယ်။

အဲဒီထဲမှာတော့ ဒေါ်အောင်ဆန်းစုကြည်နှင့်အတူ စာရေးဆရာမကြီး လူထုဒေါ်အမာ၊ NUG နိုင်ငံခြားရေးဝန်ကြီး ဒေါ်ဇင်မာအောင်၊ စာရေးဆရာမ မသီတာ(စမ်းချောင်း)၊ မယ်တော်ဆေးခန်းတည်ထောင်သူ ဒေါက်တာစင်သီယာမောင်၊ ရိုဟင်ဂျာအရေး တက်ကြွလှုပ်ရှားသူ မဝေဝေနု တို့အပါအဝင် ၁၁ ယောက်ကို ဖော်ပြထားခဲ့တာကို တွေ့ရပါ တယ်။

ဒီကနေ့မှာတော့ အပြည်ပြည်ဆိုင်ရာ အမျိုးသမီးများနေ့ အထိမ်းအမှတ်အနေနဲ့ နိုင်ငံတဝန်းမှာလည်း ဆွေးနွေးဟောပြောမှုတွေ ပြုလုပ်နေသလို အကြမ်းဖက်စစ်အုပ်စုက နိုင်ငံတော်အာဏာကို မတရားသိမ်းယူခဲ့ပြီးနောက် အကြမ်းမဖက် အာဏာဖီဆန်ရေး လူထုလှုပ်ရှားမှုတွေမှာရော လက်နက်ကိုင်တော်လှန်ရေးမှာပါ အမျိုးသမီးတွေ ပါဝင်လှုပ်ရှားနေကြတာ ဖြစ်ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က နောက်ဆုံး ထုတ်ပြန်ချက်မှာတော့ စစ်အာဏာရှင်စနစ်ကို ဆန့်ကျင်တော်လှန်တဲ့ မြန်မာ့နွေဦးတော်လှန်ရေး ၂ နှစ်ကျော် ကာလအတွင်း အကြမ်းဖက်စစ်တပ်က အပြစ်မဲ့ပြည်သူ ၃,၀၀၀ ကျော်ကို သတ်ဖြတ်ခဲ့တယ်လို့ ပြောပါတယ်။

အဆိုပါ ကျဆုံးပြည်သူစုစုပေါင်းထဲမှာ ဖမ်းဆီးခံရပြီးနောက် သတ်ဖြတ်ခံရတဲ့ ရာခိုင်နှုန်းကတော့ ၃၄ ဒသမ ၆ ရာခိုင်နှုန်းထိ ရှိခဲ့ပြီး အမျိုးသမီးဦးရေ ၁၂ ဒသမ ၇ ရာခိုင်နှုန်းထိ ပါဝင်နေတာပါ။

ဒါ့အပြင် တော်လှန်ရေး ၂ နှစ်ကျော် ကာလအတွင်း ဖမ်းဆီးခံရသူတွေထဲမှာတော့ အမျိုးသမီးဦးရေ ၂၀ ဒသမ ၅ ရာခိုင်နှုန်းထိ ပါဝင်နေတယ်လို့ အေအေပီပီက ပြောပါတယ်။

မန္တလေးမြို့ အမရပူရမြို့နယ် တောင်သမာန်အင်းအနီး တောင်လေးလုံးကျောင်းမှာ နိုဝင်ဘာလ ၂၉ ရက် မနက်ပိုင်းက သတင်းစာဆရာ၊ စာရေးဆရာ လူထုဒေါ်အမာရဲ့ (၁၀၆) နှစ်မွေးနေ့ အထိမ်းအမှတ်ပွဲ ကျင်းပပြုလုပ်ခဲ့ပါတယ်။

သတင်းစာဆရာ၊ စာရေးဆရာ လူထုဒေါ်အမာရဲ့ မွေးနေ့ အထိမ်းအမှတ်ပွဲ အရင်နှစ်တွေကလည်း ကျင်းပခဲ့တာဖြစ်ပြီး အခုနှစ်မှာတော့ အကျဉ်းချုံးကျင်းပတာလို့ သိရပါတယ်။

“ဒီနှစ်ကတော့ နိုင်ငံရေးအခြေအနေကြောင့် အကျဉ်းချုံး ကျင်းပလိုက်တာ။ ဆရာတော် လေးပါး ဆွမ်းကပ်တာပဲ လုပ်လိုက်တယ်။” လို့ မန္တလေးမြို့ခံ စာပေသမား တစ်ဦးက ပြောပါတယ်။

လူထု ဒေါ်အမာဟာ မြန်မာ့ စာပေလောကနဲ့ သတင်းစာလောကမှာ ထင်ရှားကျော်ကြားပြီး အမှန်တရားနဲ့ ပြည်သူလူထုဘက်က မားမားမတ်မတ်ရပ်တည်ကာ ကလောင်အစွမ်းနဲ့ ဆောင်ရွက်ခဲ့တဲ့ စာရေးဆရာ၊ သတင်းစာ ဆရာမကြီး တစ်ဦးဖြစ်ပါတယ်။

လူထုဒေါ်အမာ မွေးနေ့ကို အသက် ၇၀ ပြည့်တဲ့ ၁၉၈၅ ခုနှစ်မှ စတင်ကျင်းပခဲ့တာဖြစ်ပြီး အသက် ၉၃ နှစ်အရွယ် ၂၀၀၈ ခုနှစ် ဧပြီ ၇ ရက်နေ့ က မန္တလေးမြို့ရှိ နေအိမ်မှာ ကွယ်လွန်ခဲ့ပါတယ်။