မြန်မာနိုင်ငံတွင်းမှာ လူမှောင်ခိုကူးခံခဲ့ရသူနဲ့ ဖမ်းဆီးထိန်းသိမ်းခံထားရသူ ဖိလစ်ပိုင်နိုင်ငံသား ၈ ဦးကို ကယ်တင်နိုင်ခဲ့ပြီး ဖေဖော်ဝါရီ ၁၃ ရက် ဒီမနက်အစောပိုင်းမှာ ဖိလစ်ပိုင်နိုင်ငံကို ပြန်လည်ပို့ဆောင်နိုင်ခဲ့ကြောင်း ဖိလစ်ပိုင်အခြေစိုက် ABS-CBN သတင်းက ရေးပါတယ်။

အဲဒီထဲက ၄ ဦးဟာ ဖောက်သည်ကူညီထောက်ပံ့ရေးကိုယ်စားလှယ်အဖြစ် ထိုင်းနိုင်ငံမှာ အလုပ်လုပ်ကိုင်ဖို့ အွန်လိုင်းကနေတဆင့် ဒူဘိုင်းကနေအလုပ်ခေါ်ယူခံခဲ့ရတာဖြစ်ကြောင်း လက်တွေ့မှာတော့ သူတို့ဟာ မြန်မာနိုင်ငံအတွင်းသို့ ခေါ်ဆောင်ခံခဲ့ရပြီး ဒီဂျစ်တယ်ငွေကြေး Cryptocurrency လုပ်ငန်းမှာ လူတွေရင်းနှီးမြှုပ်နှံချင်လာအောင် ဖျားယောင်းသိမ်းသွင်းဖို့ ဖိအားပေးခိုင်းစေခံခဲ့ရတယ်လို့ ဖိလစ်ပိုင်နိုင်ငံခြားရေးဝန်ကြီးဌာနက ပြောပါတယ်။

ဒီလုပ်ငန်းမှာ လူတွေရင်းနှီးမြှုပ်နှံလာအောင် ဖျားယောင်းသိမ်းသွင်းနိုင်ခြင်းမရှိတဲ့ လူမှောင်ခိုကူးခံခဲ့ရသူတွေကို အလုပ်ရှင်က အစာမကျွေးသလို လုပ်ခလစာလည်း မပေးဘူးလို့ ဖိလစ်ပိုင်လွှတ်တော်ရဲ့ ထုတ်ပြန်ချက်မှာ ဖော်ပြပါတယ်။

နောက်ထပ်အမျိုးသမီး ၄ ဦးကတော့ ထိုင်းနိုင်ငံကနေ မြန်မာနိုင်ငံထဲကို တရားမဝင် ဝင်ရောက်လာမှုကြောင့် ဖမ်းဆီးထိန်းသိမ်းခံခဲ့ရတာလို့ ဆိုပါတယ်။

အဲဒီ ၈ ဦးဟာ ဖိလစ်ပိုင် စံတော်ချိန် မနက် ၅ နာရီ ၂၅ မိနစ်မှာ နီနွိုင်းအာကွီနို နိုင်ငံတကာလေဆိပ်ကို ပြန်လည်ရောက်ရှိလာခဲ့ကြပြီး ဖိလစ်ပိုင်နိုင်ငံခြားရေးဝန်ကြီးဌာနရဲ့ လက်အောက်ခံ ရွှေပြောင်းလုပ်သားရေးရာဌာနရဲ့ ယာယီအတွင်းရေးမှူး အက်ဒွာဒို ဟိုဆေးဗေဂါ က သွားရောက်ကြိုဆိုခဲ့ပါတယ်။

ဖိလစ်ပိုင်နိုင်ငံခြားရေးဝန်ကြီးဌာနက “မြန်မာ-ထိုင်း နယ်စပ်က ချစ်ကြည်ရေးတံတားဟာ ပိတ်ထားခဲ့တာ ၃ နှစ်ရှိခဲ့ပြီဖြစ်ပြီး ပြီးခဲ့တဲ့ ဇန်နဝါရီလကမှ ထိုင်းနဲ့ မြန်မာနိုင်ငံသားတွေအတွက် ပြန်လည်ဖွင့်လှစ်ခဲ့တာဖြစ်ပါတယ်။ အဲဒါကြောင့် နယ်ခြားမြစ်ကို ထိုင်းကနေ ဖြတ်ကူးလိုက်တာနဲ့ ဒါဟာ တရားမဝင် ဝင်ရောက်မှုဖြစ်သွားတယ်။ ဖိလစ်ပိုင်လို တခြားနိုင်ငံကလာတဲ့သူတွေအနေနဲ့ မြန်မာနိုင်ငံထဲကို ဝင်ချင်ရင် ရန်ကုန်၊ မန္တလေးနဲ့ နေပြည်တော် လေဆိပ်တွေကနေ တဆင့်ဝင်ရမှာ ဖြစ်ပါတယ်” လို့ ပြောပါတယ်။

အွန်လိုင်းပေါ်မှာ ဆိုရှယ်မီဒီယာတွေကနေတဆင့် အလုပ်အကိုင်အတုအယောင်တွေနဲ့ ခေါ်ယူနေတဲ့ လူမှောင်ခိုသမားတွေကိုလည်း သတိထားကြဖို့ ဖိလစ်ပိုင် နိုင်ငံခြားရေးဝန်ကြီးဌာနက သူ့နိုင်ငံသားတွေကို သတိပေးအကြံပြုခဲ့ကြောင်း ABS-CBN သတင်းက ပြောပါတယ်။

ထိုင်း-မြန်မာနယ်စပ် မြဝတီမြို့နယ်မှာ စစ်ကောင်စီတပ်တွေ၊ နယ်ခြားစောင့်တပ်တွေနဲ့ တရုတ် ဒုစရိုက်သမားတွေ ပူးပေါင်းပြီး တရားမဝင်လုပ်ငန်း‌တွေလုပ်ကိုင်နေကြတာမှာ ထိုင်း၊ မလေးရှား၊ ဖိလစ်ပိုင်နဲ့ အိန္ဒိယ စတဲ့ ဒေသတွင်းနိုင်ငံတွေက နိုင်ငံသားတွေ မကြာခဏ လူကုန်ကူးခံရပြီး  ခိုင်းစေခံနေရတာ ဖြစ်ပါတယ်။

ဥရောပငါးနိုင်ငံရှိ ရဲတပ်ဖွဲ့ဟာ ရွှေ့ပြောင်းနေထိုင်သူတွေအား ရေလက်ကြားဖြတ်ပြီး ဗြိတိန်ကို မှောင်ခိုပို့ဆောင်နေတဲ့ အီရတ်ကာ့ဒ်ဂိုဏ်းကို ပစ်မှတ်ထားလုပ်ဆောင်တဲ့ အဓိက နယ်စပ်ဖြတ်ကျော် စစ်ဆင်ရေးတခုမှာ လူ ၃၉ ယောက်ကို ဖမ်းဆီးခဲ့တယ်လို့ အီးယူရဲ့ တရားဥပဒေစိုးမိုးရေးအေဂျင်စီ ယူရိုပိုလ်က ဇူလိုင် ၆ ရက်မှာ ပြောကြားခဲ့ပါတယ်။

ဒီစစ်ဆင်ရေးမှာ ဗြိတိန်၊ ပြင်သစ်၊ ဘယ်လ်ဂျီယံ၊ ဂျာမနီနဲ့ နယ်သာလန်နိုင်ငံတို့မှ ရဲတပ်ဖွဲ့ဝင်တွေ ပါဝင်ခဲ့ပါတယ်။

အဓိကသံသယရှိသူတွေထဲက တယောက်ဖြစ်တဲ့ အသက် ၂၆ နှစ်အရွယ် အီရန် ကာ့ဒ်အမျိုးသားတယောက်ကို တခြားငါးယောက်နဲ့အတူ ဗြိတိန်မှာ ဖမ်းဆီးခဲ့ပါတယ်။

ဂျာမနီမှာ လူ ၁၈ ယောက်ကို ဖမ်းဆီးခဲ့ပြီး ပြင်သစ်ရဲက ကိုးယောက်နဲ့ ဒတ်ခ်ျရဲက ခြောက်ယောက်ကို ဖမ်းဆီးခဲ့ပါတယ်။ ဒါ့အပြင် ရဲတပ်ဖွဲ့ဟာ အသက်ကယ်အင်္ကျီ ၁,၂၀၀ ကျော်၊ ရော်ဘာလှေ ၁၅၀ လောက်နဲ့ အင်ဂျင်စက်တပ်လှေ ၅၀ အပြင် ယူရိုငွေ ထောင်သောင်းမက များပြားတဲ့ ငွေသားတွေ၊ သေနတ်တွေနဲ့ မူးယစ်ဆေးဝါးတွေကိုလည်း သိမ်းဆည်းရမိခဲ့ကြောင်း ယူရိုပိုလ်က ပြောပါတယ်။

ဒီကွန်ရက်ဟာ လွန်ခဲ့တဲ့ ၁ နှစ်ခွဲအတွင်း ဗြိတိန်ကို တရားမဝင် ရွှေ့ပြောင်းနေထိုင်သူ အယောက် တသောင်းလောက်ကို ခိုးသွင်းနိုင်ခဲ့ပြီး သူတို့ရဲ့ ရာဇဝတ်မှုကနေ ယူရို ၁၅ သန်းအထိ ဝင်ငွေရရှိခဲ့ကြောင်း ယူရိုပိုလ်က ပြောပါတယ်။

လှေငယ်တွေကို အသုံးပြုပြီး ရွှေ့ပြောင်းအခြေချသူတွေကို လွှဲပြောင်းပေးတဲ့ ဒီလို ရွှေ့ပြောင်း မှောင်ခိုသမားတွေကို ပစ်မှတ်ထားတဲ့ အကြီးမားဆုံး စစ်ဆင်ရေးလို့ ပြောလို့ရကြောင်း ယူရိုပိုလ်ရဲ့ ပြောရေးဆိုခွင့်ရှိသူ Ton van Lierop က ရိုက်တာကို ပြောကြားခဲ့ပါတယ်။

ဒီဂိုဏ်းဟာ ပြင်သစ်ကနေ ဗြိတိန်ကို လှေငယ်တွေနဲ့ လူမှောင်ခိုကူးတဲ့ အလှုပ်ရှားဆုံး ရာဇဝတ်ဂိုဏ်းတွေထဲက တခုဖြစ်ကြောင်း ရဲအရာရှိတွေက ပြောပါတယ်။