ဒွန်းနက်စ်နဲ့ လူ့ဟန့်ခ်ဒေသမှာ ယူကရိန်းတပ်တွေက ရုရှားတပ်တွေကို နောက်ပြန်လန်သွားအောင် ၇ ကြိမ် တိုက်ခိုက်နိုင်ခဲ့တယ်လို့ ယူကရိန်းစစ်တပ် ပြောရေးဆိုခွင့်ရှိသူက ပြောပါတယ်။ တချိန်တည်းမှာ ဒေသတွင်းမှာ ရုရှားတပ်ဟာ လက်နက်တွေနဲ့ စစ်သုံးပစ္စည်းတွေကို တိုးမြှင့်ချနေတယ်လို့ ယူကရိန်းစစ်တပ် ပြောခွင့်ရသူ အလက်ဇန်ဒါးစူပန်က ပြောပါတယ်။
ဒွန်းနက်စ်နဲ့ လူ့ဟန့်ခ်ဒေသမှာ ယူကရိန်းစစ်တပ်က ရုရှားတင့်ကား ၁၀ စီး၊ သံချပ်ကာကား ၈ စီး၊ စစ်မြေပြင်သုံးကား ၈ စီး၊ အမြောက်စနစ်တခုကို ဖျက်ဆီးပစ်နိုင်ခဲ့တယ် ဆိုပါတယ်။
ရုရှားတပ်ဟာ ကြိုတင်တွက်ဆထားကြတဲ့အတိုင်းပဲ ယူကရိန်းအရှေ့ပိုင်းကို ဧပြီ ၁၉ ရက်ကစလို့ အင်အားအလုံးအရင်းနဲ့ ပြန်လည်တိုက်ခိုက်နေပြီး ယူကရိန်းဘက်က ဒါကို စစ်ပွဲရဲ့ ဒုတိယအဆင့်လို့ ပြောပါတယ်။
