ရုရှားအစိုးရကို ဝေဖန်သူ အလက်ဇီနာဗယ်ညီကို ဥရောပလွှတ်တော်က နှစ်စဉ် ချီးမြှင့်နေကျ လူ့အခွင့်အရေးဆု ပေးအပ်ချီးမြှင့်တဲ့အတွက် မြောက်အတ္တလန္တိတ်စစ်ရေးမဟာမိတ်အဖွဲ့ နေတိုးရဲ့ အကြီးအကဲ ယန်း စတော့တန်ဘာ့ဂ်က ကြိုဆိုလိုက်ပါတယ်။
“ရုရှားနိုင်ငံအတွင်း အားကောင်းတဲ့အသံနဲ့ ဒီမိုကရက်တစ်တန်ဖိုးတွေကို ထောက်ပံ့ရာမှာ နှစ်ပေါင်းများစွာ ပါဝင်ခဲ့တဲ့ အရေးပါတဲ့ အခန်းကဏ္ဍကို အသိအမှတ်ပြုဖို့ အရေးကြီးတယ်လို့ ကျနော် ထင်တယ်” လို့ နေတိုးအတွင်းရေးမှူးချုပ်က သတင်းစာရှင်းလင်းပွဲမှာ ပြောကြားခဲ့ပြီး နာဗယ်ညီကို လွှတ်ပေးဖို့လည်း တောင်းဆိုလိုက်ပါတယ်။
အသက် ၄၅ နှစ်အရွယ် နာဗယ်လ်ညီဟာ ၂၀၂၀ ခုနှစ် ဩဂုတ်လအတွင်း အဆိပ်ခတ်ခံရပြီး အာရုံကြော အဆိပ်ခတ်ခံရတာလို့ အနောက်နိုင်ငံတွေက ပြောပါတယ်။
သူဟာ လွတ်ငြိမ်းချမ်းသာခွင့် ချိုးဖောက်မှုအတွက် ထောင်ဒဏ် ၂ နှစ်ခွဲ ပြစ်ဒဏ် ကျခံနေရပါတယ်။
နာဗယ်လ်ညီကို အဆိပ်ခတ်ထောင်ချတဲ့အတွက် ရုရှားအရာရှိတွေကို ဥရောပသမဂ္ဂက ဒဏ်ခတ်ခဲ့ပါတယ်။
ထောင်ကျခံနေရတဲ့ ဘဲလာရုစ် အတိုက်အခံ ခေါင်းဆောင်နဲ့ တက်ကြွလှုပ်ရှားသူ မာရီယာ ကိုလက်စ်နီကိုဗာဟာ ကိုးကြိမ်မြောက် ဗားဆလက်ဟာဗဲ လူ့အခွင့်အရေးဆုကို စက်တင်ဘာ ၂၇ ရက်က ရရှိခဲ့ပါတယ်။
လူ့အခွင့်အရေးကို ခုခံကာကွယ်ရာမှာ လူ့အဖွဲ့အစည်းအတွင်း ထူးချွန်ပြောင်မြောက်အောင် ဆောင်ရွက်နိုင်သူတွေကို ဂုဏ်ပြုတဲ့အနေနဲ့ ဒီဆုကို ပေးတာပါ။
စထရပ်စ်ဘာ့ဂ်မြို့မှာ ရှိတဲ့ ဥရောပကောင်စီ လွှတ်တော်အစည်းအဝေးအတွင်း ဆောင်းဦးစုံညီ အစည်းအဝေး ပထမနေ့မှာ စတာလင်ပေါင် ၆ သောင်းကို ဆုချလိုက်တာပါ။
ကိုလက်စ်နီကိုဗာရဲ့ ညီမဖြစ်သူက အစ်မကိုယ်စားဆုကို လက်ခံရယူခဲ့ပါတယ်။ စက်တင်ဘာလက ကိုလက်စ်နီကိုဗာဟာ သူ့ရဲ့ နိုင်ငံရေးလှုပ်ရှားမှုတွေကြောင့် ထောင်ဒဏ် ၁၁ နှစ် ပြစ်ဒဏ်စီရင်ခံရလို့ အနောက်နိုင်ငံတွေက ဘဲလာရုစ်အစိုးရကို ပြစ်တင် ဝေဖန်ခဲ့ကြပါတယ်။
အသက် ၃၉ နှစ်အရွယ် ကိုလက်စ်နီကိုဗာဟာ မနှစ်က ဘဲလာရုစ်သမ္မတ အလက်ဇန်းဒါး လူကာရှန်ကို ကို ဆန့်ကျင်တဲ့ လူထုဆန္ဒပြပွဲကို ဦးဆောင်သူတွေထဲက တယောက်ပါ။ သမ္မတဟာ ၂၇ နှစ်တာ အုပ်ချုပ်ရေးကို မနှစ်က အကြီးဆုံးဆန့်ကျင်တာ ခံခဲ့ရပါတယ်။
