ဘားမားကမ်ပိန်းယူကေအဖွဲ့ရဲ့ လူ့အခွင့်အရေးလှုပ်ရှားမှုမန်နေဂျာ နန့်ဇိုယာဖန်းဟာ  ဖေဖော်ဝါရီ ၁ ရက်က ဗြိတိန်ဘုရင် ချားလ်စ်နဲ့ ခဏတာ စကားပြောခွင့်ရခဲ့ပြီး လက်ရှိ မြန်မာနိုင်ငံနဲ့ ကရင်ပြည်နယ်မှာ ဖြစ်ပျက်နေတဲ့ အကြောင်းအရာတွေကို တင်ပြ ပြောဆိုခဲ့ပါတယ်။

ဗြိတိန်အစိုးရရဲ့ နိုင်ငံတကာဖွံ့ဖြိုးတိုးတက်ရေးဌာနကနေတဆင့် ဗြိတိန်ဘုရင် ချားလ်စ်ရဲ့ ဖိတ်ကြားမှုနဲ့ လန်ဒန်မြို့ ဘက်ကင်ဟန်နန်းတော်မှာကျင်းပတဲ့  ဗြိတိန်နိုင်ငံ လူမှုအသိုင်းအဝိုင်းကို အကျိုးပြုတဲ့ အရှေ့နဲ့ အရှေ့တောင်အာရှဒေသက လူမျိုးစုတွေနဲ့ တွေ့ဆုံတဲ့ ဧည့်ခံပွဲတခုမှာ အခုလို ဗြိတိန်ဘုရင်နဲ့ တွေ့ဆုံခဲ့တာပါ။

ဒီလိုဧည့်ခံပွဲကို တက်ခွင့်ရတဲ့အတွက် အရမ်းဝမ်းသာပီတိဖြစ်မိသလို ဗြိတိန်အစိုးရနဲ့ ဗြိတိန်ဘုရင်ကနေပြီး သူတို့ရဲ့လှုပ်ရှားမှုတွေကို အသိအမှတ်ပြုတဲ့အတွက်ကြောင့် ဖြစ်တယ်လို့ နန့်ဇိုယာဖန်းက ကရင်မီဒီယာတခုမှာ ပြောပါတယ်။

“ဗြိတိန်ဘုရင်ကို ကျမအနေနဲ့ ဒီ မြန်မာနိုင်ငံရဲ့ အခြေအနေတွေ၊ အထူးသဖြင့် မြန်မာစစ်အာဏာရှင်တွေရဲ့ လူထုအပေါ် အကြမ်းဖက်မှုတွေ၊ တိုက်ခိုက်ညှဉ်းပန်းနှိပ်စက်မှုတွေကို တင်ပြခွင့်ရလို့ ဝမ်းသာတယ်။ ဘုရင့်အနေနဲ့ကတော့ မြန်မာနိုင်ငံရဲ့အခြေအနေကို ကောင်းကောင်းသိတယ်။ သူက မြန်မာနိုင်ငံအကြောင်း စိတ်ဝင်တစား စောင့်ကြည့်နေတယ် ဆိုတာကို ပြောတယ်။ ကျမတော့ သူ့ကို ကျေးဇူးတင်တယ်။ နောက်ပြီးတော့လည်း ဘုရင့်အနေနဲ့ ကရင်လူမျိုးအကြောင်းကို ကောင်းကောင်းသိတဲ့အကြောင်း ပြောပါတယ်။”

အရင် မင်းသားဘဝကလည်း လူ့အခွင့်အရေးလှုပ်ရှားသူ နန့်ဇိုယာဖန်းကို ဗြိတိန်ဘုရင် ချားလ်စ်က တကြိမ်တွေ့ဆုံခဲ့ပြီး ဒီတကြိမ်မှာလည်း လူ့အခွင့်အရေးလှုပ်ရှားသူ နန့်ဇိုယာဖန်းကို မှတ်မိကြောင်း ဘုရင်ချားလ်စ်က ပြောဆိုခဲ့တယ်လို့ နန့်ဇိုယာဖန်းက ပြောပါတယ်။

ဩဂုတ်လ ၂၅ ရက်နေ့ကို တိုင်းရင်းသားအားလုံးကို တောင်းပန်တဲ့ National Apology Day အဖြစ်သတ်မှတ်ပေးဖို့  လူ့အခွင့်အရေးတက်ကြွလှုပ်ရှားသူတွေကတောင်းဆိုလိုက်ပါတယ်။

ရိုဟင်ဂျာတွေကို စစ်တပ်က လူမျိုးတုံးသတ်ဖြတ်မှုစတင်ခဲ့တဲ့ ဩဂုတ် ၂၅ရက်နေ့ကို  ရိုဟင်ဂျာတွေနဲ့အဖိနှိပ်ခံတိုင်းရင်းသားအားလုံးကို တောင်းပန်တဲ့ National Apology Day အဖြစ်သတ်မှတ်ပေးဖို့ လူ့အခွင့်အရေးတက်ကြွလှုပ်ရှားသူတွေက အမျိုးသားညီညွတ်ရေးအစိုးရ NUG ကိုတောင်းဆိုလိုက်တာပါ။ 

၂၀၁၇ ခုနှစ်က ရခိုင်ပြည်နယ်မှာဖြစ်ပွားခဲ့တဲ့ ရိုဟင်ဂျာအမြောက်အမြားကို စစ်တပ်က သတ်ဖြတ်ခဲ့မှုအပြင် နိုင်ငံတစ်ဝန်း တိုင်းရင်းသားပြည်သူတွေကို စစ်တပ်က အနိုင်ကျင့်ခဲ့တာတွေနဲ့ပတ်သက်ပြီး NUG က အစိုးရတစ်ရပ်အနေနဲ့ တာဝန်ယူချိန်မှာ တရားမျှတမှုအတွက် အကူအညီပေးဖို့လိုတယ်လို့ လူ့အခွင့်အရေးတက်ကြွလှုပ်ရှားသူ ကိုသက်ဆွေဝင်းက ပြောပါတယ်။

"နိုင်ငံတကာမှာလည်း အစဉ်အဆက်အစိုးရတွေက ကျူးလွန်ခဲ့တဲ့ အမှားတွေကို နောက်အစိုးရတွေက ပြန်တောင်းပန်ပြင်ဆင်ခဲ့ကြတဲ့ သာဓကတွေ အများကြီးရှိခဲ့ပါတယ်။ အမှားကိုဝန်ခံတာဟာ ယဉ်ကျေးတဲ့လူ့အဖွဲ့အစည်းတစ်ရပ်ရဲ့ ဂုဏ်ရှိတဲ့ လက္ခဏာတစ်ရပ်ဖြစ်ပါတယ်။ ကျနော်တို့ နိုင်ငံမှာ နိုင်ငံရေးယဉ်ကျေးမှုအသစ်တစ်ခုကို စတင်မွေးဖွားတာလည်းဖြစ်ပါတယ်"လို့ လူ့အခွင့်အရေးတက်ကြွလှုပ်ရှားသူ ကိုသက်ဆွေဝင်းက ပြောပါတယ်။

National Apology Day ကျင်းပဖို့ ထောက်ခံသူတွေရဲ့လက်မှတ်တွေကိုလည်း လူ့အခွင့်အရေးသမားတွေက စုဆောင်းနေပြီး ဩဂုတ် ၁၉ရက်နေ့အထိ ပါဝင်လက်မှတ်ထိုးသူ ၁၂၀၀ ကျော်ရှိနေပြီဖြစ်ပါတယ်။

National Apology Day  လှုပ်ရှားမှုဟာ ရိုဟင်ဂျာလူမျိုးစုတစ်ခုတည်းအတွက် ဦးတည်တာမဟုတ်ဘဲ တိုင်းရင်းသားလူမျိုးစုအားလုံးအတွက် ရည်ရွယ်တယ်လို့ လူ့အခွင့် အရေးလှုပ်ရှားသူတွေက ပြောပါတယ်။

  ရိုဟင်ဂျာဆိုတဲ့ အသုံးအနှုန်းကို မြန်မာအာဏာသိမ်းစစ်ကောင်စီက လက်မခံသလို ပြီးခဲ့တဲ့ အန်အယ်လ်ဒီအစိုးရလက်ထက်ကလည်း တရားဝင်သုံးစွဲခြင်းမရှိပါဘူး။ 

အမျိုးသားညီညွတ်ရေးအစိုးရက ဇွန်လ ၅ ရက်က ထုတ်ပြန်တဲ့ ကြေညာချက်မှာ ရိုဟင်ဂျာတွေကို အသိအမှတ်ပြုကြောင်းဖော်ပြထားပြီး NUG ရဲ့ရည်ရွယ်ချက်ဟာ ရခိုင်ပြည်နယ်အတွင်းနေထိုင်တဲ့ တခြားသောမျိုးနွယ်စုတွေကို ဖိနှိပ်ဖို့မဟုတ်ဘူးလို့ NUG လူ့အခွင့်အရေးဆိုင်ရာဝန်ကြီး ဦးအောင်မျိုးမင်းက ဇွန် ၆ရက်နေ့ သတင်းစာရှင်းလင်းပွဲမှာ ပြောဆိုထားပါတယ်။

မြန်မာနိုင်ငံအတွင်းမှာနေထိုင်သူအားလုံး တန်းတူညီမျှခွင့်ကို ခံစားခွင့်ရဖို့ NUG ကမူဝါဒထုတ်ပြန်တာလို့ ဆိုပါတယ်။

မြန်မာနိုင်ငံအတွက် ဖွဲ့စည်းပုံအခြေခံဥပဒေသစ်တစ်ခုကို NUG က ပြင်ဆင်ရေးဆွဲနေပြီး လုပ်ငန်းစဉ်ပြီးတာနဲ့ ၁၉၈၂ နိုင်ငံသားဥပဒေကိုပြင်ဆင်သွားမယ်လို့လည်း NUG က ထုတ်ပြန်ထားပါတယ်။

ရိုဟင်ဂျာတွေနဲ့ပတ်သက်တဲ့ မူဝါဒတွေကို NUG က ဒီအချိန်မှာ ချမှတ်ထုတ်ပြန်တာဟာ မြန်မာနိုင်ငံအတွင်း ဖြစ်ပေါ်နေတဲ့ လူမျိုးစုရေးရာပြဿနာတွေကို မူဝါဒချပြီးကိုင်တွယ်ဖို့ လိုအပ်တယ်လို့ယူဆတာကြောင့်ဖြစ်တယ်လို့ ဦးအောင်မျိုးမင်းကပြောဆိုထားပါတယ်။

အမျိုးသားညီညွတ်ရေးအစိုးရကတော့ လူသားတွေအပေါ်ကျူးလွန်တဲ့ ရာဇဝတ်မှု၊ စစ်ရာဇဝတ်မှု၊ လူမျိုးတုံးသတ်ဖြတ်မှုတွေနဲ့ စစ်ကောင်စီကို နိုင်ငံတကာတရားရုံး ICC မှာ တရားစွဲဆိုသွားမယ်လို့ NUG တရားရေးဝန်ကြီးဌာန ပြည်ထောင်စုဝန်ကြီး ဦးသိန်းဦး က ဇွန်လ ၂၅ရက်နေ့ သတင်းစာရှင်းလင်းပွဲမှာပြောဆိုထားပါတယ်။

ICC ကိုအမှုသက်သေတွေတင်သွင်းတဲ့အခါ အာဏာသိမ်းပြီး စစ်ကောင်စီကျူးလွန်ခဲ့တဲ့ စစ်ရာဇဝတ်မှုတွေကိုသာမက အရင်တုန်းက စစ်တပ်ကျူးလွန်ခဲ့တဲ့ ရာဇဝတ်မှုတွေကိုပါ နိုင်ငံတကာတရားရုံးကို ပူးတွဲတင်ပြနိုင်ဖို့ စီစဉ်နေတယ်လို့ ဝန်ကြီးဦးသိန်းဦးကပြောပါတယ်။