မက္ကဆီကိုနိုင်ငံ အလယ်ပိုင်းရှိ အပန်းဖြေအနားယူရာ စင်တာတစ်ခုမှာ ဧပြီ ၁၅ရက်က လက်နက် ကိုင်လူတစ်စုရဲ့ တိုက်ခိုက်မှုကြောင့် အရွယ်မရောက်သေးသူ ၁ ဦးအပါအဝင် လူ ၇ ဦး သေဆုံးကာ  ၁ဦး ဒဏ်ရာရတယ်လို့ ဒေသခံအာဏာပိုင်တွေက ပြောပါတယ်။

ဂွမ်နာဟွာတိုပြည်နယ် ကော့တာဇာမြို့မှာ ဒီတိုက်ခိုက်မှု ဖြစ်ပွားခဲ့ပြီး ဒါဟာ မူးယစ်ဆေးဝါး ရောင်းဝယ်ဖောက်ကားနိုင်ရေး လမ်းကြောင်းကို ထိန်းချုပ်နိုင်ဖို့ ရာဇဝတ်ဂိုဏ်းတွေအကြား တိုက်ပွဲဖြစ်ပွားရာ နေရာတစ်ခုလည်း ဖြစ်ပါတယ်။

ဒါ့အပြင် ဒီနယ်မြေဟာ နိုင်ငံရဲ့ အကြမ်းဖက်မှုအများဆုံးနေရာတွေထဲက တစ်ခုဖြစ်သလို ဆီခိုးယူမှုနဲ့ ပြန်ပေးဆွဲမှုလိုမျိုး တခြားရာဇတ်ဝတ်မှုတွေနဲ့လည်း ပြည့်နှက်လို့ နေပါတယ်။

ဒီဖြစ်ရပ်အတွင်း သေဆုံးသွားသူတွေထဲမှာ အသက် ၇ နှစ်အရွယ် ကလေးငယ်တစ်ဦး အပါအဝင် အမျိုးသား ၃ ဦး နဲ့ အမျိုးသမီး ၃ ဦး ပါဝင်ပြီး အပြင်းအထန် ဒဏ်ရာရရှိသွားသူကတော့ ဆေးကုသမှုခံယူနေရတယ်လို့ သိရပါတယ်။

ကော့တာဇာမြို့ရဲ့ လုံခြုံရေးဆိုင်ရာ အတွင်းရေးမှူးက ဒီလက်နက်ကိုင်တွေဟာ စနေနေ့ ညနေ ၄ နာရီခွဲ ဝန်းကျင်လောက်မှာ အခင်းဖြစ်ရာကို ရောက်လာခဲ့ပြီး အခုလို တိုက်ခိုက်ခဲ့တာ"လို့ ထုတ်ပြန်ပါတယ်။

ဒီရာဇဝတ်သားတွေကို ရှာဖွေနိုင်ဖို့ ရဟတ်ယာဉ်တစ်စင်းနဲ့အတူ လုံခြုံရေးတပ်ဖွဲ့တွေအပြင် စစ်တပ်ကိုပါ စစ်ဆင်ရေးအတွင်း ဖြန့်ကြက်နေရာချထားတယ်လို့ သိရပါတယ်။

ပြီးခဲ့တဲ့ မတ်လ အလယ်ပိုင်းတုန်းကလည်း အလားတူ ဂွမ်နာဟွာတို ပြည်နယ်ရဲ့ အပက်စီယို အယ်လ် ဂရန်ဒေမြို့ငယ်လေးက ဘားတစ်ခုမှာ လက်နက်ကိုင်တိုက်ခိုက်မှုကြောင့် လူ ၁၀ ဦး သေဆုံးခဲ့ရပါတယ်။

ဧရာဝတီတိုင်း၊  ပုသိမ်-ချောင်းသာ ကားလမ်းပေါ်မှာ မတ်လ ၁၉ ရက် မွန်းလွဲပိုင်းက ယာဥ်တိုက်မှုဖြစ်ပြီး  အိမ်စီးကားတစီးမီးလောင်မှုကြောင့် ကလေးတွေအပါအဝင်   လူ ၇ ယောက်  မီးလောင်သေဆုံးခဲ့တယ်လို့ အကူအညီပေးရေးအဖွဲ့တွေထံက သိရပါတယ်။

ကလပ်ချီရွာထိပ်နားမှာ ကံထူးအောင်ခရီးသည်တင်ကားနဲ့ အိမ်စီးကားတိုက်မိရာကနေ အိမ်စီးကားမီးလောင်ကာ လိုက်ပါလာတဲ့ အမျိုးသား ၃ ဦး၊ အမျိုးသမီး ၂ ဦးနဲ့ ကလေး ၂ ဦးအပြင် ခွေးတကောင်ပါသေဆုံးခဲ့တယ်လို့ ပရဟိတအသင်းအဖွဲ့ တဦးက ပြောပါတယ်။

"အားလုံး လူက ၇ ယောက်။ ကလေး ၂ ယောက်လည်း ပါတယ်။ ပြီးတော့ ခွေး ၁ ကောင်ပါ ပါသေတယ်။”

ယာဥ်တိုက်မှုဖြစ်ပြီးနောက် ကားရဲ့ဦးပိုင်းက စတင်မီးလောင်ခဲ့တာဖြစ်ပြီး တံခါးလော့ကျနေတာကြောင့် အထဲကလိုက်ပါလာသူတွေ  မီးလောင်သေဆုံးခဲ့တာလို့ ဆိုပါတယ်။

ကားတိုက်မှုဖြစ်တဲ့နေရာဟာ ကျေးရွာနဲ့အလှမ်းဝေးအပြီး အသွားအလာပြတ်တဲ့နေရာ ဖြစ်တာကြောင့် မီးကိုခက်ခက်ခဲခဲ အချိန်ကြာမြင့်စွာ မီးငြှိမ်းသတ်ခဲ့ရတယ်လို့ ဒေသခံတွေက ပြောပါတယ်။

ကားမီးလောင်မှုကြောင့် သေဆုံးခဲ့တဲ့သူတွေဟာ ဘယ်ဒေသကလာတဲ့  ဘယ်သူဘယ်ဝါတွေဆိုတာ ပိုတော့ ခုချိန်ထိမသိရသေးဘဲ စုံစမ်းနေရဆဲဖြစ်တယ်လို့ ဆိုပါတယ်။