စစ်ကောင်စီတပ်က ကရင်ပြည်နယ် လေးကေ့ကော်ဒေသကို လေကြောင်းတိုင်ခတ်မှုကြောင့် ဒေသခံ နဲ့ PDF ၁၀ ယောက်လောက် ကျဆုံးခဲ့တယ်လို့ သိရပါတယ်။
ကရင်ပြည်နယ်၊ လေးကေ့ကော်ဒေသကို စစ်ကောင်စီတပ်က ဒီဇင်ဘာ ၂၅ ရက်နေ့ တနေကုန်နီးပါး မြေပြင်၊ ဝေဟင် ပစ်ခတ်မှုတွေကြောင့် လူ ၁၀ ယောက်လောက် ကျဆုံးပြီး အိမ်အဆောက်အဦတချို့လည်း ပျက်စီးခဲ့တယ်လို့ စစ်ဘေးရှောင်ပြည်သူတယောက်က ပြောပါတယ်။
လေးကေ့ကော်ဒေသ တိုက်ပွဲမှာ KNLA တပ်ဖွဲ့တွေနဲ့အတူ PDF အဖွဲ့တွေ ခုခံတိုက်ခိုက်ခဲ့ကြတယ်လို့ ဧရာ၀တီတိုင်း PDF တပ်ဖွဲ့ဝင်တယောက်က ပြောပါတယ်။
စစ်ကောင်စီဘက်က ရဟတ်ယာဉ် ၂ စီး၊ လေယာဉ် ၂ စီးအပါအဝင် မြေပြင်၊ ဝေဟင် တိုက်ခတ်ခဲ့တာဖြစ်ပြီး တိုက်ပွဲအတွင်း စစ်ကောင်စီဘက်က အကျအဆုံးတော့ မသိရသေးဘဲ PDF တပ်ဖွဲ့ဝင်အများစုအပါအဝင် ဒေသခံ ၁၀ ယောက်လောက် ကျဆုံးခဲ့တယ်လို့ သိရပါတယ်။
အဲ့ဒီ ထိခိုက်ကျဆုံးမှုနဲ့ တိုက်ပွဲအခြေအနေတွေကို ကရင်အမျိုးသားလွတ်မြောက်ရေးတပ်မတော် (KNLA) ဘက်ကတော့ သတင်းထုတ်ပြန်တာ မရှိသေးပါဘူး။
တိုက်ပွဲအတွင်း လာရောက်တိုက်ခိုက်တဲ့ စစ်ကောင်စီ ရဟတ်ယာဉ်တစ်စီးကို ပစ်ချလိုက်နိုင်တယ်လို့ PDF တပ်ဖွဲ့ဝင်က ပြောကြားခဲ့ပေမယ့် ဒီဗွီဘီက သီးခြားအတည်မပြုနိုင်သေးပါဘူး။
ကရင်ပြည်နယ် မြ၀တီမြို့နယ်၊ လေးကေ့ကော်ဒေသမှာ စစ်ကောင်စီက ဒီဇင်ဘာ ၁၅ ရက်ကစပြီး ထိုးစစ်ဆင်တိုက်ခိုက်လာတာ ၁၀ ရက် ရှိသွားပြီဖြစ်ပြီး ဒီဇင်ဘာ ၂၀၊ ၂၃၊ ၂၄ နဲ့ ၂၅ ရက်နေ့တွေမှာတော့ လေယာဉ်တွေနဲ့ ဗုံးကြဲတိုက်ခိုက်ခဲ့တာလို့ သိရပါတယ်။
ကရင်အမျိုးသား အစည်းအရုံးက နှစ်ဖက်တိုက်ပွဲပြင်းထန်နေတဲ့ လေးကေကော်ဒေသကို လေကြောင်းပျံသန်းမှု ကင်းမဲ့ဇုန် သတ်မှတ်ပေးဖို့ ကုလသမဂ္ဂကို ကြေညာချက်ထုတ် တောင်းဆိုထားပါတယ်။
စစ်ကောင်စီတပ်က လက်နှက်ကြီးနဲ့ ပစ်ခတ်မှုကြောင့် ထိုင်းနိုင်ငံဘက်ကိုကျခဲ့ပြီး အိမ်တလုံးပျက်စီးသွားတာကြောင့် ထိုင်းစစ်တပ်က ထိုင်းနယ်စပ်ဘက်မှာ စစ်ကျည်ကာ ကားကြီးနှစ်စီးနဲ့ ထိုင်းလုံခြုံရေးတင်းကြပ်စွာ ကင်းလှည့်စောင့်နေတယ်လို့ ထိုင်းသတင်းတွေအရ သိရပါတယ်။
လေးကေ့ကော်ကို ကျူးကျော်ဝင်ရောက်လာတဲ့ စစ်ကောင်စီတပ်နဲ့ KNLA ပူးပေါင်းတပ်ဖွဲ့တို့ ဒီဇင်ဘာ ၁၅ ရက်နေ့ကစတင်ပြီး နှစ်ဖက်တိုက်ပွဲတွေ ပြင်းထန်နေတဲ့အတွက် ဒေသခံပြည်သူ ၅၀၀၀ ကျော် ထိုင်းနိုင်ငံဘက်ကို ထွက်ပြေးခိုလှုံနေကြရပါတယ်။
