မကွေးတိုင်း၊ ဆောမြို့နယ်မှာ မေ ၉ ရက် ညနေပိုင်းက မိုးသက်လေပြင်းကျရောက်ခဲ့ပြီး နေအိမ်အဆောက်အဦ ၁၈ လုံးလောက် ထိခိုက်ပျက်စီးကာ အဘွားအိုတယောက် ထိခိုက်ဒဏ်ရာ ရရှိခဲ့တယ်လို့ ဒေသခံတွေဆီကနေ သိရပါတယ်။

ဆောမြို့နယ်၊ ကြခတ်ကျေးရွာမှာ မေ ၉ ရက် ညနေ ၄ နာရီကျော်လောက်က အနောက်တောင်ဘက်ကနေ မည်းမှောင်လာပြီး မိုးသက်လေပြင်း ကျရောက်ခဲ့တာကြောင့် နေအိမ်အဆောက်အဦ ၁၈ လုံးလောက် ထိခိုက်ပျက်စီးခဲ့တယ်လို့ ကြခတ်ကျေးရွာ ဒေသခံ အမျိုးသမီးတယောက်က ဒီဗွီဘီကို ပြောပါတယ်။

အဲဒီလေပြင်းတိုက်ခတ်မှုကြောင့် လူနေအိမ် ၁၃ လုံးလောက် အမိုးလန်တာတွေ၊ ထိခိုက်ပျက်စီးတာတွေ ဖြစ်ခဲ့ပြီး စာသင်ကျောင်းအဆောက်အဦတွေ၊ ဘုန်းကြီးကျောင်းတွေ၊ ဇရပ် ၂ ခုနဲ့ဆိုရင် နေအိမ်အဆောက်အဦ ၁၈ လုံးလောက် ထိခိုက်ပျက်စီးခဲ့တယ်လို့ ဆိုပါတယ်။

တယောက်တည်းနေတဲ့ အဘွားအိုတယောက်ကတော့ အိမ်မှာနေရင်းနဲ့ တံခါးက လွင့်ပြီး ပြုတ်ကျလို့ မျက်ခွံအပေါ်နားမှာ တလက်မလောက် ကွဲသွားကာ ဒဏ်ရာအခြေအနေကတော့ မစိုးရိမ်ရဘူးလို့ ပြောပါတယ်။

လေဘေးသင့်ပြည်သူတွေနဲ့ စာသင်ကျောင်းမှာနေထိုင်တဲ့ စစ်ဘေးရှောင်ပြည်သူတွေကတော့ ထိခိုက်ပျက်စီးမှုမရှိဘဲ လွတ်တဲ့နေရာတွေမှာ နေထိုင်နေကြတယ်လို့ ဆိုပါတယ်။

ထိခိုက်ပျက်စီးသွားတဲ့ နေအိမ်တွေနဲ့ အဆောက်အဦတွေကိုတော့ ရွာသူရွာသားတွေ၊ ဆွေမျိုးသားချင်းတွေ ဝိုင်းဝန်းပြီး ပြုပြင်လုပ်ဆောင်နေကြတယ်လို့ ဒေသခံတွေဆီကနေ သိရပါတယ်။

ဧရာဝတီတိုင်း၊ အင်္ဂပူမြို့နယ်မှာ မေလ ၄ ရက်နေ့က လေပြင်းတိုက်ခတ်ခဲ့တာကြောင့် လူနေအိမ် ၆၄ လုံး ပျက်စီးတာတွေဖြစ်ပေါ်ခဲ့တယ်လို့ ဒေသခံတွေဆီက သိရပါတယ်။

ကုန်းပြင်ကျေးရွာအုပ်စုအတွင်းက ကျီးပင်ကျေးရွာ၊ ကုန်းပြင်ကျေးရွာ၊ ထုံးပေါ်ကျေးရွာ၊ ကျောက်တလုံး ကျေးရွာနဲ့ ကမ်းနားစုကျေးရွာတွေမှာ ရုတ်တရက် လေပြင်းတိုက်ခတ်ပြီး လူနေအိမ်တွေ ပျက်စီးခဲ့ပေမယ့် သေဆုံး ဒဏ်ရာရတာမျိုးတော့ မရှိဘူးလို့ မီးသတ်တပ်ဖွဲ့ကနေ သိရပါတယ်။

“ ရုတ်တရက်တိုက်တော့ အကုန်လုံး အမိုးလန်ကုန်တာ၊ သတင်းရတော့ ချက်ချင်းထွက်ပြီး ရှာဖွေ ကယ်ဆယ်ရေးတွေလုပ်ပေးခဲ့ပါတယ်၊ လူသေဆုံးတာမျိုးတော့ မရှိပါဘူး”လို့ တိုင်းမီးသတ်တပ်ဖွဲ့ဝင် တစ်ဦးက ပြောပါတယ်။

ရုတ်တရက် လေပြင်းတိုက်ခတ်မှုကြောင့် ကျီးပင်ကျေးရွာမှာ ၄၇ လုံး၊ ကုန်းပြင်ကျေးရွာမှာ ၄ လုံး၊ ထုံးပေါ်ကျေးရွာ ၆ လုံး၊ ကျောက်တလုံး ကျေးရွာမှာ ၂ လုံးနဲ့ ကမ်းနားစုကျေးရွာမှာ ၅ လုံး အမိုးလန် ပြိုကျ ပျက်စီးတာတွေ ဖြစ်ပေါ်ခဲ့တာလို့ ဆိုပါတယ်။

သီးခြားလွတ်လပ်တဲ့ မိုးလေဝသပညာရှင်တွေကတော့ ဧရာဝတီတိုင်းနဲ့ ရခိုင်ပြည်နယ်ကို မေလ ဒုတိယပတ်အတွင်း မုန်တိုင်း ဝင်ရောက်လာနိုင်တာကြောင့် သတိထားနေထိုင်ဖို့အတွက်လည်း ကြိုတင်အသိပေးထားပါတယ်။