ရှမ်းပြည်နယ်တောင်ပိုင်း လင်းခေးနဲ့ ခိုလမ်မြို့နယ်ထဲမှာ မေလ ၈ ရက် မနေ့ညနေပိုင်းက မိုးသက်လေပြင်းကျပြီး ပရဟိတကျောင်းတိုက်နဲ့ ဘုန်းကြီးကျောင်းခေါင်မိုးတွေ လန်ထွက် ပျက်စီးကုန်ပါတယ်။

လင်းခေးမြို့နယ်ထဲမှာ မနေ့ညနေ ၄ နာရီနဲ့ ၅ နာရီကြား လေပြင်းတိုက်ခတ်တဲ့အတွက် ဝမ်ဟတ်တိုက်နယ် မကျိုင်းမွန်းကျေးရွာ လူငယ်ဖွံ့ဖြိုးရေး ပရဟိတကျောင်းက ကိုရင်လေးတွေအဆောင်၊ ကုဋီနဲ့ ရေချိုးခန်းခေါင်မိုးတွေ အချပ်လိုက်ကော၊ တပြင်လုံးပါ လွင့်ထွက်ပျက်စီးကုန်တယ်လို့  ဘုန်းကြီး ၁ ပါးက ဒီဗွီဘီကို မိန့်ပါတယ်။

“မနေ့က  ညနေ ၄ နာရီကျော်နဲ့ ၅ နာရီကြားမှာ တိုက်သွားတာပါ။ မိုးရေနည်းနည်းပါတယ်၊ မိုးသီးတော့မရှိဘူး၊ အဓိကက လေပြင်းတိုက်တာပါပဲ။ ကိုရင်လေးတွေနေတဲ့ ကျောင်းဆောင်ရယ်၊ ဇရပ်ရယ်၊ သိမ်ရယ်၊ ကုဋီရယ် ခေါင်မိုးတွေ လွင့်ထွက်ကုန်တယ်။ ဆုံးရှုံးမှုတန်ဖိုးက ကျပ်သိန်း ၁၇၀ လောက်ရှိမယ်လို့ ခန့်မှန်းတယ်။”

အဆိုပါ ပရဟိတကျောင်းတိုက်မှာ သံယာအပါးပေါင်း ၁၂၀ ရှိပြီး ပြီးခဲ့တဲ့ ဧပြီလဆန်းပိုင်းကလည်း မြေငလျင်ဒဏ် ခံရတဲ့အတွက် ပင်မကျောင်းဆောင် ပျက်စီးခဲ့တာကို ပြင်ဆင်လို့မှ မပြီးသေးခင် အခုလို လေပြင်းဒဏ် ထပ်ပြီးခံရတာလို့ ဆိုပါတယ်။

မနေ့ညနေပိုင်းမှာပဲ ရှမ်းပြည်တောင်ပိုင်း လွိုင်လင်ခရိုင် ခိုလမ်မြို့မှာလည်း မိုးသက်လေပြင်းတိုက်ခတ်ပြီး ရပ်ကွက် ၂ ထဲက သီရိမင်္ဂလာကျောင်းတိုက် ဆွမ်းစားဆောင် ခေါင်မိုးတွေ လန်ထွက်ကုန်တယ်လို့ အဆိုပါကျောင်းတိုက်ရှိ ဦးပဥ္စင်း၁ ပါးက မိန့်ပါတယ်။

“လေက တော်တော်ပြင်းတယ်၊ မိုးရေနဲ့ မိုးသီးနည်းနည်းပဲကျတယ်။ ဦးပဥ္စင်းတို့ ဆွမ်းစားကျောင်းဆောင် ခေါင်မိုးရော တုတ်တန်းတွေရော အကုန်ပျက်စီးတယ်။ ခေါင်မိုးက သွပ်ပြား အချပ် ၃၀ ကျော် လွင့်သွားတယ်။ တချို့က ကျောင်းတိုက်ကြီးရဲ့ ‌စောင်းတန်းကို သွားထိပြီး စောင်းတန်းပျက်စီးတာရှိတယ်။ မနေ့က ဆုံးရှုံးမှုတန်ဖိုး ကျပ်သိန်း ၈၀ လောက် ရှိမယ်လို့ ခန့်မှန်းတယ်။”

ဒါ့အပြင် ခိုလမ်မြို့ရှိ ခရစ်ယာန်ကျောင်းလည်း လေပြင်းဒဏ်ခံရပြီး ပျက်စီးဆုံးရှုံးမှု အခြေအနေတော့ မသိရဘူးလို့ ဆိုပါတယ်။

လွိုင်လင်ခရိုင် နမ့်စန်မြို့နယ်ထဲမှာ မေလ ၇ ရက် နေ့လယ် ၂ နာရီလောက်ကလည်း လေပြင်းတိုက်ပြီး အမှတ် ၄ ရပ်ကွက် အထက(ခွဲ) စာသင်ကျောင်းနဲ့ နေအိမ် ၂ လုံး၊ နားလွယ်ရွာက နေအိမ် ၂ လုံး ပျက်စီးခဲ့သလို ထင်းရှူးမြိုင်ရွာက ဂေါ်ရခါးဘုရားကျောင်း အုတ်တံတိုင်းလည်း ပြိုကျပျက်စီးခဲ့တယ်လို့ မြန်မာနိုင်ငံမီးသတ်တပ်ဖွဲ့က ထုတ်ပြန်ထားပါတယ်။

ပြီးခဲ့တဲ့ရက်ပိုင်းက မြို့နယ်တချို့မှာ လေပြင်းတိုက်လို့ အိမ်တော်တော်များများ ပျက်စီးသွားခဲ့ပြီး လာမယ့်ရက်တွေမှာလည်း မြန်မာတနိုင်ငံလုံးနီးပါး လေပြင်းတိုက်ခတ်တာ၊ မိုးကြိုးပစ်၊ မိုးသီးကြွေတာတွေ ဖြစ်လာနိုင်တယ်လို့ မိုးလေဝသ ခန့်မှန်းချက်တွေက ဆိုပါတယ်။

မြန်မာနိုင်ငံရဲ့ မိုးလေဝသအခြေအနေတွေကို ခန့်မှန်းပေးနေတဲ့ ပညာရှင်တယောက်ဖြစ်သူ မစုစုစံကတော့ မုံရွာ၊ ဘုတလင်၊ မိတ္ထီလာ၊ မော်လူး၊ မော်ဟန်၊ မိုးညှင်း၊ မြစ်ကြီးနား၊ ဝိုင်းမော် စတဲ့မြို့တွေမှာ မုတ်သုံကြိုမိုးတွေရွာပြီး လျှပ်စီးမိုးကြိုး အန္တရာယ်ရှိတယ်လို့ သတိပေးထားပါတယ်။

မုတ်သုံလေမဝင်ခင်မှာ ရွာတဲ့မိုးကို မုတ်သုံကြိုမိုးလို့ခေါ်ပြီး နွေရာသီ ကုန်းတွင်းအပူချိန် မြင့်တက်လို့ မိုးတိမ်တောင်တွေ ဖြစ်လာတာလို့ ဆိုပါတယ်။

အမြင့်ပေ ၈,၀၀၀ ကနေ ၁၂,၀၀၀ မှာရှိတဲ့ လေအေးနဲ့ ထိတွေ့ကြတဲ့အခါ လျှပ်စီးလက်တာ၊ မိုးခြိမ်း မိုးကြိုးပစ်တာ၊ မိုးသီးကြွေတာ၊ ရုတ်တရက် လေပြင်းတိုက်တာ စတဲ့ အန္တရာယ်တွေ ရှိနိုင်ပြီး လာမယ့် ၂ ပတ်လောက်အတွင်း မုတ်သုံကြိုမိုးတွေ ရွာနိုင်တယ်လို့လည်း ခန့်မှန်းထားပါတယ်။

စစ်ကောင်စီဩဇာခံ မိုးလေဝသဌာနကတော့ နေပြည်တော်၊ မန္တလေးတိုင်း၊ မကွေးတိုင်း၊ ပဲခူးတိုင်း၊ တနင်္သာရီတိုင်း၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်နဲ့ မွန်ပြည်နယ်တို့မှာ မိုးတိမ်တောင်ဖြစ်တာ အားကောင်းနေတယ်လို့ ဧပြီ ၂၄ ရက် ညနေပိုင်းမှာ ထုတ်ပြန်ထားပါတယ်။

မိုးတိမ်တောင်တွေ ရွေ့လျားရာတလျှောက်မှာ မိုးရွာတာနဲ့အတူ လေပြင်းတိုက်တာ၊ မိုးကြိုးပစ်တာ၊ မိုးထစ်ချုန်းတာ၊ လျှပ်စီးလက်တာနဲ့ မိုးသီးကြွေတာတို့ ဖြစ်နိုင်တယ်လို့လည်း ဆိုပါတယ်။

ဧပြီ ၂၂ ရက် မနက်ပိုင်းက ညောင်ဦးမြို့နယ်၊ သပွတ်စုကျေးရွာမှာ လေပြင်းတိုက်ခတ်လို့ လူနေအိမ် ၂ လုံး အမိုးလန် ပျက်စီးခဲ့ပြီး ညနေပိုင်းမှာလည်း ပျဉ်းမနားမြို့နယ်က အောင်ချမ်းသာကျေးရွာ၊ သကြားစက်ကျေးရွာ၊ ဈေးကုန်းကျေးရွာ၊ ဆင်သေကျေးရွာ၊ သနပ်ပင်ဆိပ်ကျေးရွာနဲ့ ရွာကောက်ရပ်ကွက်တို့မှာ လေပြင်းတိုက်လို့ သစ်ပင်ကြီးတွေ လဲကျခဲ့သလို အိမ်နဲ့ ကျောင်းတွေ ပျက်စီးခဲ့ပါတယ်။

လယ်ဝေးမြို့နယ်ထဲမှာလည်း ဧပြီ ၂၃ ရက် ညနေပိုင်းက လေပြင်းတိုက်လို့ လက်ပံခုန်ကျေးရွာ၊ ကွမ်းခြံကျေးရွာ၊ ချောင်းခွကျေးရွာ၊ ဇောင်ချမ်းကုန်းကျေးရွာ၊ သဲကောလေးကျေးရွာတို့မှာ အိမ်တချို့ ပျက်စီးခဲ့ပါတယ်။ လယ်ဝေးမြို့နယ်ထဲက ကျေးရွာ ၂ ရွာမှာ ဧပြီ ၂၁ ရက် ညနေပိုင်းက လေဆင်နှာမောင်းတိုက်လို့ လူ ၆ ယောက် သေဆုံးပြီး ရွာလုံးကျွတ်နီးပါး ပျက်စီးသွားပါတယ်။

နေပြည်တော်၊ ဥတ္တရသီရိမြို့နယ်ထဲမှာလည်း မင်းကုန်းကျေးရွာ၊ မရမ်းခုံကျေးရွာ၊ အောင်ချမ်းသိမ်းကျေးရွာ၊ ဘုရားတောင်ကျေးရွာတို့မှာ လေပြင်းတိုက်လို့ အိမ်ခြေ ၂၀ လောက်နဲ့ ဝန်ထမ်းအိမ်ရာ အဆောင်တခုတို့ ပျက်စီးခဲ့ပါတယ်။

ရှမ်းပြည်နယ်၊ ဟိုပုံးမြို့နယ်က ကုန်းသာကျေးရွာမှာလည်း လေပြင်းကြောင့် လူနေအိမ်တချို့ ပျက်စီးပြီး ပဲခူးတိုင်း ရွှေတောင်မြို့နယ်မှာ ဧပြီ ၂၂ ရက် ညပိုင်းက ရုတ်တရက် လေပြင်းတိုက် မိုးရွာခဲ့လို့ သရက်တောရပ်ကွက်၊ ကျီးသဲကျေးရွာအုပ်စု၊ သာစီကုန်းကျေးရွာအုပ်စု၊ ဆည်ကြီးကုန်းကျေးရွာအုပ်စု၊ မြို့မကျေးရွာအုပ်စု၊ ဒုရင်ဒုဘို ကျေးရွာအုပ်စု၊ နွားခြံကုန်းကျေးရွာအုပ်စု၊ သရက်သုံးပင်ကျေးရွာအုပ်စုတို့မှာ လူနေအိမ် ၆ လုံး ပြိုကျခဲ့ပြီး လူနေအိမ် ၅၀ လောက် ပျက်စီးခဲ့သလို အထည်စက်ရုံ ဂိုဒေါင်တခုလည်း အမိုးလန် ပျက်စီးခဲ့ပါတယ်။

မကွေးတိုင်း၊ စလင်းမြို့နယ်ထဲမှာ ဧပြီ ၂၁ ရက် ညနေပိုင်းက လေပြင်းတိုက်ခတ် မိုးရွာခဲ့လို့ ရပ်ကွက် ၁၀ ခု၊ ကျေးရွာ ၁၀၀ ကျော်မှာ အိမ်ပေါင်း ၅၀ ကျော် ပြိုကျပျက်စီးပြီး အိမ်ပေါင်း ၆၀၀ ကျော် အမိုးလန် ပျက်စီးခဲ့ပါတယ်။ နတ်မောက်မြို့နယ်မှာလည်း ရပ်ကွက် ၇ ခုနဲ့ ကျေးရွာ ၂၀ မှာ အိမ်ပေါင်း ၃၀၀ လောက် ပျက်စီးခဲ့ပါတယ်။

မန္တလေးတိုင်းထဲမှာလည်း ဧပြီ ၂၄ ရက် မနက်ပိုင်းက လေပြင်းတိုက်ခတ်လို့ အောင်မြေသာစံမြို့နယ်မှာ လူနေအိမ်တွေ၊ လျှပ်စစ်မီးတိုင်တွေနဲ့ စာသင်ကျောင်း၊ စေတီတို့ ပျက်စီးခဲ့ပြီး အမရပူရမြို့နယ်မှာတော့ ပေါက်ချိုင်ကုန်းကျေးရွာ၊ ဂျိုရွာကျေးရွာ၊ ကန်ရိုးကျေးရွာ၊ မန်ကျည်းကိုင်းကျေးရွာအုပ်စုနဲ့ ဒေါင်းရွေးကျေးရွာအုပ်စုတို့မှာ နေအိမ်တချို့ ပျက်စီးခဲ့ပါတယ်။

မတ္တရာမြို့နယ်မှာလည်း တောင်ပြုံးကြီးကျေးရွာ၊ ဆူးကားကျေးရွာ၊ ပေါက်ဝဲကျေးရွာ၊ ဥဒေါင်းကျေးရွာနဲ့ သပြေသာကျေးရွာတို့မှာ လူနေအိမ်တွေနဲ့ စာသင်ကျောင်း၊ ပုသိမ်ကြီးမြို့နယ်၊ သရက်တစ်ပင်ကျေးရွာနဲ့ သပိတ်ကျင်းမြို့နယ်၊ ပေါက်တစ်ပင်ကျေးရွာတို့မှာ လူနေအိမ်တွေ၊ လျှပ်စစ်မီးတိုင်တွေနဲ့ စေတီတွေ အမိုးလန်၊ ပြိုကျပျက်စီးခဲ့ပါတယ်။

တံတားဦးမြို့နယ်က သာယာအေးကျေးရွာမှာလည်း မူလတန်းကျောင်းတကျောင်း ပျက်စီးသွားပါတယ်။