ကွယ်လွန်သူ ဒိုင်ယာနာမင်းသမီး လူမြင်ကွင်းမှာ နောက်ဆုံးဝတ်ဆင်ခဲ့တဲ့ ငွေငန်းကန်သာ လက်ဝတ်ရတနာ တစုံစာကို ဇွန် ၂၇ ရက်မှာ အမေရိကန်နိုင်ငံ နယူးယောက်မြို့မှာ လေလံတင်ရောင်းချမှာပါ။
၁၉၉၇ ခုနှစ် ဇွန်လမှာ လန်ဒန်မြို့တော်က တော်ဝင် အဲလ်ဘတ်ခန်းမမှာ ကွယ်လွန်သူ မင်းသမီး ဒိုင်ယာနာက သူ့ရဲ့ ရတနာတစုံကို နောက်ဆုံး လူသိရှင်ကြား ဝတ်ဆင်လာချိန်မှာ Swan Lake Suite လို့ခေါ်တဲ့ ရတနာတစုံဟာ အဖိုးမဖြတ်နိုင် ဖြစ်လာခဲ့ပါတယ်။
Guernsey လေလံပွဲစီစဉ်ရေး အိမ်တော်ရဲ့ ဥက္ကဋ္ဌ အာလန် အက်တီဂါက“ဒီလည်ဆွဲက သူ့အတွက်လုပ်ထားပြီး အဲဒီ့ပွဲအတွက် လုပ်ပေးထားတာပါ။ ညနေခင်း အထူးပွဲအပြီးမှာ လက်ဝတ်ရတနာရောင်းချသူ ဂါးရဒ်နဲ့ အင်္ဂလန်နိုင်ငံရဲ့ တော်ဝင်သရဖူ လက်ဝတ်ရတနာကုန်သည်က နားကပ်မလုပ်ရသေးလို့ လည်ဆွဲကို ပြန်ပို့ခဲ့တယ်” လို့ ပြောပါတယ်။
Guernsey ဟာ စိန်နဲ့ ပုလဲလည်ဆွဲတွေ၊ နားကပ်တွေ အစုံလိုက်အတွက် လေလံတင် ရောင်းချမှုကို သက်ပီးယဲဟိုတယ်မှာ တည်ခင်းကျင်းပမှာ ဖြစ်ပါတယ်။
၁၉၉၈ ခုနှစ်က NBA ဖိုင်နယ်ပွဲစဉ်မှာ ဘတ်စ်ကက်ဘော ဂန္ထဝင်ကစားသမားဟောင်းကြီး မိုက်ကယ် ဂျော်ဒန် ဝတ်ဆင်ခဲ့တဲ့ Air Jordon 13 အားကစားဖိနပ် နှစ်ရံဟာ လေလံတင် ရောင်းချခဲ့သမျှထဲမှာ တန်ဖိုးအကြီးဆုံးဖိနပ်တွေ ဖြစ်လာနိုင်တယ်လို့ မျှော်မှန်းထားပါတယ်။
အဲဒီထဲက ဖိနပ်တရံတည်းတင် ဒေါ်လာ ၂ သန်းကနေ ၄ သန်းကြား ရရှိနိုင်တယ်လို့ ခန့်မှန်းထားပြီး ဒီလိုမြင့်မားတဲ့ ခန့်မှန်းဈေးနီးပါးအတိုင်း ကမ်းလှမ်းမှုတခု ရရှိထားတယ်လို့လည်း သိရပါတယ်။
လေလံတင်ရောင်းချမယ့် Sotheby ကုမ္ပဏီ အကြီးအကဲ ဘရန် ဝက်တာက “လေလံတင်ရောင်းချမှုကို ဖွင့်လှစ်ခဲ့ချိန်မှာပဲ အမေရိကန်ဒေါ်လာ ၁ ဒသမ ၈ သန်းနဲ့အတူ ကမ်းလှမ်းမှုတခု ရရှိထားပြီး အများသူငါကို ရောင်းချခဲ့ဖူးသမျှ အားကစားဖိနပ်တွေထဲမှာ ကမ္ဘာ့စံချိန်ချိုးနိုင်လိမ့်မယ်” လို့ မှတ်ချက်ပေးပါတယ်။
မိုက်ကယ်ဂျော်ဒန် အနေနဲ့ ၃၇ မှတ်အထိ သွင်းယူပေးနိုင်ခဲ့တဲ့ ၁၉၉၈ ခုနှစ် NBA ဖိုင်နယ်ပွဲစဉ်တွေထဲက ပွဲစဉ် ၂ ခုမှာ ဒီဖိနပ်တွေကို ဝတ်ဆင်ခဲ့တာဖြစ်ပြီး ဂျော်ဒန်ရဲ့ ငွေမင်ရောင်လက်မှတ်လည်း ပါဝင်တာကြောင့် ထူးခြားပါတယ်။ ဘရန် ကတော့ ဒါတွေဟာ ဒီဖိနပ်တွေကို ရှားပါးစေတဲ့ အချက်ဖြစ်တယ်လို့ ဆိုပါတယ်။
ဒုတိယအကြိမ်မြောက် လက်ရှိ လေလံတင်ရောင်းချနေတဲ့အထဲမှာ မိုက်ကယ်ဂျော်ဒန် အပါအဝင် တခြားဘတ်စ်ကက်ဘော အကျော်အမော်တွေရဲ့ အမှတ်ရဖွယ်ရာ အားကစားပစ္စည်းမျိုးစုံပါဝင်ပြီး ဂန္ထဝင်ဘောလုံးစတား ပီလီနဲ့အတူ အမေရိကန်ဘောလုံး အားကစား နယ်ပယ်ထဲက နာမည်ကျော်တွေရဲ့ ပစ္စည်းတွေလည်း ပါဝင်ပါတယ်။
ဒီပစ္စည်းတွေအတွက် လေလံတင်ရောင်းချမှုကို လာမယ့် ဧပြီ ၁၁ ရက် မတိုင်ခင်အထိ ဖွင့်လှစ်ထားမှာ ဖြစ်ပါတယ်။
