တိုက်ပွဲမှာ သေဆုံးသွားခဲ့ကြတဲ့ စစ်ကောင်စီတပ်က စစ်ဗိုလ်တွေရဲ့ ပခုံးပေါ်က ကြယ်ပွင့်တွေနဲ့ PDF လူငယ်တယောက်က ဒီဇိုင်းဆင်ဖန်တီးထားတဲ့ ဖိနပ်တရန်ကို အွန်လိုင်းကနေ လေလံတင်ရောင်းချခဲ့ရာ အမေရိကန်ဒေါ်လာ ၁၈,၅၀၀ နဲ့ အမြင့်ဆုံးလေလံအောင်သွားခဲ့တယ်လို့ သိရပါတယ်။
လေလံပွဲစီစဉ်သူက “အကောင့်တုပေါင်းစုံနဲ့ ဝိုင်းဝန်းနှောင့်ယှက်နေတဲ့ကြားက အကောင်းဆုံး ဖြတ်ကျော်ဖန်တီးနိုင်ခဲ့ပါတယ်။ လေလံဝင်ဆွဲပေးကြသူ အားလုံးကိုလည်း အထူးကျေးဇူးတင်ပါတယ်။ စစ်ခွေးတွေ ပခုံးပေါ်က တန်ဖိုး မရှိတဲ့ အစိတွေဟာ ဖိနပ်လို နေရာမှန်ကို ရောက်တဲ့အခါ ပြည်သူရဲ့ အမုန်းတရားနဲ့ ပေါင်းစပ်ပြီး $18500 တန်ဖိုးရှိ PDF ဖိနပ်အဖြစ် သမိုင်းဝင်ခဲ့ပါပြီ”လို့ ပြောပါတယ်။
ဒီလေလံပွဲကို ပန်ဆယ်လိုက ဦးဆောင်ပြုလုပ်နေတာဖြစ်ပြီး ကြမ်းခင်းဈေး အမေရိကန်ဒေါ်လာ ၅၀၀ နဲ့ မတ် ၂၁ ရက်မှာ စတင်ခဲ့တာဖြစ်ပြီး လေလံပွဲစတင်ချိန် နာရီပိုင်းအတွင်းမှာတင် ဒေါ်လာထောင်သောင်းချီပေးသူတွေ ရှိနေခဲ့တယ်လို့ ဆိုပါတယ်။
စစ်အာဏာရှင်ကို တိုက်ထုတ်မယ့် ပြည်သူ့ကာကွယ်ရေးတပ်(PDF) တွေကို ထောက်ပံ့ချင်သူတွေအနေနဲ့ ဒီဖိနပ်ကို လေလံဆွဲဖို့ ပန်ဆယ်လိုရဲ့ ဖေ့စ်ဘွတ်ခ်စာမျက်နှာကတဆင့် ဖိတ်ခေါ်ပြီး လေလံပွဲကျင်းပခဲ့တာ ဖြစ်ပါတယ်။
အာဏာဖီဆန်ရေးလှုပ်ရှားမှု (CDM) မှာ ပါဝင်တဲ့ ဝန်ထမ်းတယောက် ရေးဆွဲထားတဲ့ ဒေါ်အောင်ဆန်းစုကြည်ရဲ့ရုပ်ပုံ ပန်းချီကားတချပ်ကို လေလံတင်ရောင်းချခဲ့ရာမှာ ငွေကျပ် ၇၇ သိန်းနီးပါး ရရှိခဲ့တယ်လို့ သိရပါတယ်။
၂ ပေ × ၃ ပေအရွယ် အဆိုပါ ဆီဆေးပန်းချီကားကိုတော့ “မေတ္တာရေလျဉ်” လို့ အမည်ပေးထားပြီး ဒီအကြောင်းနဲ့ပတ်သက်ပြီး အမျိုးသားညီညွတ်ရေးအစိုးရ (NUG)၊ အမျိုးသမီး၊ လူငယ်နှင့် ကလေးသူငယ်ရေးရာဝန်ကြီးဌာန ဒုတိယဝန်ကြီး ဒေါ်အိသဉ္ဇာမောင်ရဲ့ တရားဝင် ဖေ့စ်ဘွတ်ခ်လူမှုကွန်ရက်ပေါ်ကတဆင့် ကြမ်းခင်းဈေး အမေရိကန်ဒေါ်လာ ၅၀၀ ကစတင် ဝယ်ယူနိုင်ကြောင်း မျှဝေထားခဲ့တာပါ။
အမျိုးသားညီညွတ်ရေးအစိုးရ (NUG)၊ အမျိုးသမီး၊ လူငယ်နဲ့ ကလေးသူငယ်ရေးရာဝန်ကြီးဌာန လက်အောက်မှာတော့ CDM ဝန်ထမ်း ၅၀၀ ကျော်ရှိနေတယ်လို့ NUG ဝန်ကြီးက ပြောပါတယ်။
လတ်တလောမှာတော့ ဒီပန်းချီကားရောင်းရငွေထဲကနေ ပန်းချီပို့ဆောင်ဖို့ သုံးခဲ့ရတဲ့ ငွေ ၁ သိန်းသုံးပြီးတော့ CDM ပန်းချီဆရာကို ဉာဏ်ပူဇော်ခ ၅ သိန်းပေးအပ်နိုင်ခဲ့ပြီး ကျန်ငွေကို CDM ဝန်ထမ်းတွေရဲ့ Manufacturers Project အတွက် ၃၀ ရာခိုင်နှုန်းနဲ့ Section အလိုက် ခက်ခဲသူ CDM တွေအတွက် သုံးစွဲနိုင်အောင် ၇၀ ရာခိုင်နှုန်း (၄၉ သိန်းတိတိ) ထောက်ပံ့ သုံးစွဲနိုင်ခဲ့တယ်လို့ ဆိုပါတယ်။
