စစ်ကိုင်းတိုင်း၊ ထီးချိုင့်မြို့နယ်၊ လေသာကျေးရွာ ဘုန်းတော်ကြီးကျောင်းဝင်းအတွင်းမှာ စစ်ကောင်စီ တပ်သားအလောင်းတလောင်းကို ဒီဇင်ဘာ ၂ ရက် ဒီနေ့မနက် ၈ နာရီလောက်က တွေ့ရှိတယ်လို့ ဒေသခံတွေက ပြောပါတယ်။

သေဆုံးနေတဲ့အလောင်းဟာ စစ်ကောင်စီ တပ်မ ၈၈ က ဖြစ်ပြီး သေဆုံးရတဲ့ အကြောင်းရင်းကို သေချာမသိရပေမဲ့ အလောင်းကိုတော့ ရွာသားတွေက ကောင်းကောင်းမွန်မွန် မီးရှို့သင်္ဂြိုဟ်ပေးခဲ့တယ်လို့  ဆိုပါတယ်။

ထီးချိုင့်ဒေသခံရွာသားတဦးက “ကျနော်တို့ ရွာတွေကို နိုဝင်ဘာ ၂၅ ရက်ကစပြီး စစ်ကြောင်းထိုး ရွာတွေကို မီးရှို့နေတာ များလှပြီဗျ။ တိုက်ပွဲကလည်း PDF တွေနဲ့လည်း ဖြစ်တယ်ဗျ။ စစ်ကောင်စီကတော့ သူတို့ရှုံးပြီဆို တိုက်လေယာဉ်တွေနဲ့ ၃ ရက် ပစ်တာတွေလည်း လုပ်ခဲ့ကြတယ်။ ဒီ‌နေ့ကတော့ စစ်ကောင်စီတွေ ရွာထဲကထွက်သွားပြီလို့ သိရတာနဲ့ ရွာထဲကို ရှင်းလင်းရေးလုပ်ရာကနေ ဒီ စစ်(--)အလောင်း မြှုပ်ထားခဲ့တာ တွေ့ရတယ်။ အဆင့်ကတော့ ဘယ်အဆင့်မှန်းမသိဘူး။ လက်မောင်းမှာကတော့ အရစ် ၂ ရစ်နဲ့ တပ်မ ၈၈ ဆိုတဲ့ စာသားလည်းပါတယ်။ အဲ့အလောင်းကိုတော့ ရွာသားတွေက မီးရှို့သင်္ဂြိုဟ်ပေးလိုက်တယ်” လို့ ပြောပါတယ်။

ထီးချိုင့်မြို့နယ်အတွင်း စစ်ကောင်စီတပ်က မီးရှို့နေတာကြောင့် ကျေးရွာ ၅ ရွာကျော် မီးလောင်ခဲ့ရပြီး ဒေသခံထောင်နဲ့ချီ မီးဘေးသင့်ခဲ့ပါတယ်။

အခုလို ဒုက္ခရောက်နေတာကြောင့် ကူညီမှုတွေ ပေးကြဖို့လည်း ထီးချိုင့်ဒေသခံတွေက မေတ္တာရပ်ခံထားပါတယ်။

စစ်ကိုင်းတိုင်း၊ ထီးချိုင့်မြို့နယ် လေသာရွာကို စစ်ကောင်စီတပ်ဖွဲ့တွေနဲ့ ပူးပေါင်း ရှမ်းနီတပ်မတော်တို့က ဒီနေ့ ညနေ ၄ နာရီဝန်းကျင်လောက် မီးရှို့ဖျက်ဆီးနေတယ်လို့ ဒေသခံတွေက ပြောပါတယ်။ 

“အရင်ရက်က တိုက်ပွဲဖြစ်ပွားတဲ့ လေသာရွာကို ညနေ ၄ နာရီဝန်းကျင်လောက်မှာ စပြီးမီးရှို့နေတယ်၊ ရှမ်းနီနဲ့ စကစ အင်အား ၁၅၀ လောက်မယ်၊ မီးတော့ အခုလောင်နေသေးတယ်။ ပြီးတော့ ဒဏ်ရာရတဲ့သူ (စကစ) တွေကို ထီးချိုင့်မြို့ထဲ သွားပို့တဲ့ စစ်ကြောင်းကို ပ.က.ဖ တွေ လိုက်ပြီး တိုက်ခိုက်ခဲ့တယ်၊ ထိခိုက်ကျဆုံးဘယ်လို့ ရှိတယ်ဆိုတာတော့ မသိရသေးဘူး” လို့ ထီးချိုင့်မြို့နယ်က ပြည်သူတဦးက ပြောပါတယ်။

နိုဝင်ဘာ ၂၇ ရက်နေ့က စစ်ကောင်စီတပ်ဖွဲ့ဝင်တွေနဲ့ ပြည်သူကာကွယ်ရေးတပ်ဖွဲ့ဝင်တွေကြား ဖြစ်ပွားခဲ့တဲ့ တိုက်ပွဲ့တွေကြောင့် လေသာရွာအပါအဝင် ကျေးရွာ ၁၅ ရွာလောက်က ပြည်သူတွေ ထွက်ပြေးတိမ်းရှောင်နေရတယ်လို့ ဆိုပါတယ်။

လွန်ခဲ့တဲ့ရက်တွေကလည်း လေသာရွာအနီးက ဆူးပင်ချောင်၊ အလယ်တောနဲ့ အင်ဂျင်းပင်ကျေးရွာ သုံးရွာကို စစ်ကောင်စီတပ်က မီးရှို့ဖျက်ဆီးခဲ့ပြီး လက်ရှိအချိန်ထိ တပ်ဖွဲ့‌ဝင်အင်အား ၁၅၀ လောက် လေသာရွာတကြောမှာ စစ်ကြောင်းထိုးလှုပ်ရှားနေတယ်လို့ သိရပါတယ်။

ထီးချိုင့်မြို့နယ်ထဲမှာ နိုဝင်ဘာ ၂၇ နဲ့ ၂၈ ရက်နေ့တွေက တိုက်ပွဲပြင်းထန်ခဲ့ပြီး စစ်ကောင်စီလေတပ်က နှစ်ရက်ဆက်တိုက် ဂျက်တိုက်လေယာဥ်နဲ့ ၆ ကြိမ်ထက်မနည်း လာ ရောက်ဗုံးကြဲတိုက်ခိုက်ခဲ့တယ်လို့ ဒေသခံတွေက ပြောပါတယ်။