စစ်တပ်အာဏာသိမ်းပြီးနောက် ကရင်ပြည်နယ်၊ ဘားအံမြို့ပေါ်နဲ့ အနီးအနားက ကျေးရွာတွေမှာ လောင်းကစားဝိုင်းတွေ ပိုမိုများပြားလာတယ်လို့ ဒေသခံတွေထံက သိရပါတယ်။
ဘားအံမြို့ပေါ်မှာညမထွက်ရအမိန့်ကို စစ်ကောင်စီက ထုတ်ပြန်ထားပေမဲ့ လောင်းကစားဝိုင်းတွေ ကတော့ ည ၇ နာရီဝန်းကျင်လောက်ကနေစပြီး မိုးလင်းပေါက်ထိရှိနေတာဖြစ်ပါတယ်။
ဒါ့အပြင် ဘားအံမြို့အနီးက လှိုင်းဘွဲ၊ ထီလုံရွာမွေးမြူရေးဇုန်၊ ရသေ့ပျံအနီးတဝိုက်၊ ဇွဲကပင်တောင်ခြေ၊ ကျောက်ကလပ်အနီးတဝိုက်၊ ရေတံခွန်အနီးအနားက ကျေးရွာတွေဘက်မှာ လောင်းကစားဝိုင်းတွေ ပိုမိုကျင်းပလာတယ်လို့ ဒေသခံတဦးက ပြောပါတယ်။
“အရင်ကနည်းတယ်၊ တောင်ခြေနားလောက်ပဲ။ အခုက နေရာတိုင်းလိုလို မာရှယ်လောထုတ်ထားလည်း အဲ့ပွဲက လူတွေကို ည ၁၀ နာရီကျော်လို့ အပြင်ရောက်နေတယ်ဆိုပြီး လာတော့ မဖမ်းဘူး။ ပွဲရှိရှိ မရှိရှိ တောင်ခြေဘက်မှာ အမြဲလုပ်နေကြတာလေ။ တခါတလေလည်း ပွဲကရှိတယ်။ ပွဲမဝင်ခင် အာဝါဒေးပွဲတွေက တလလောက်ကြိုပြီးတော့ ရောက်နေတာ။ ပွဲက သုံးရက်လောက်လုပ်ရင် အာဝါဒေးက တလလောက်လုပ်တယ်။”
အဆိုပါကျေးရွာတွေမှာ အရင်က အနီထောင်၊ အန်ဂလုံနဲ့ ဖဲလောင်းကစားတွေသာရှိပြီး အခုနောက်ပိုင်းမှာတော့ ငါးပစ်ဂိမ်းနဲ့ ကလေးတွေအတွက် အန်ဂလုံဝိုင်း အသေးစားတွေပါ ထည့်သွင်းကစားလာကြတဲ့အပြင် ကရင်နယ်ခြားစောင့်တပ် (BGF) တပ်ဖွဲ့တွေက လုံခြုံရေးယူထားပေးရတယ်လို့လည်း ဒေသခံကဆက်ပြောပါတယ်။
“ဒီမှာက ဘယ်အဖွဲ့ကနေပြီး ဦးဆောင်လုပ်တယ်ဆိုတာ မရှိဘူး။ အဲ့မှာ ပွဲကန်ထရိုက်ဆိုတာ ရှိတယ်။ သူက ဆိုင်ရာပိုင်ရာတွေနဲ့ညှိပြီး လုပ်ကြတာ။ ပွဲမှာ BGF နဲ့ တခြားအဖွဲ့တွေပေါ့၊ သူတို့က စောင့်ကြတာ။ တဝိုင်းကို ဘယ်လောက်ဆိုပြီး သူတို့အဖွဲ့တွေကို ပေးရတယ်။ ဘယ်လောက်မြတ်မြတ် ရှုံးရှုံး။ အဲ့ဒါ လုံခြုံရေးအပြည့်ယူပေးတယ် သူတို့က။ တခုခုဖြစ်ရင် သူတို့တာဝန်ယူမယ်ပေါ့။”
ဒါ့အပြင် မြဝတီမြို့မှာလည်း တိုက်ပွဲတွေ ဖြစ်ပွားနေကာ ညမထွက်ရအမိန့် ထုတ်ထားပေမဲ့ ကရင်နယ်ခြားစောင့်တပ် (BGF)၊ KNU/KNLA (PC) အဖွဲ့တွေက ဦးဆောင်ပြီးတော့ မြဝတီမြို့ထဲမှာ အာဝါဒေးပွဲတွေနဲ့ ပျော်ပွဲရွှင်ပွဲတွေ ဆက်လက်ကျင်းပနေပါတယ်။
ဘားအံမြို့မှာ ၂၀၂၁ ဖေဖော်ဝါရီ ၈ ရက်လောက်ကစပြီး ည ၁၀ နာရီကနေ မနက် ၄ နာရီအထိ အပြင်မထွက်ဖို့ စစ်ကောင်စီက အမိန့်ထုတ်ထားသလို အခုဧပြီလအတွင်းမှာလည်း ညမထွက်ဖို့ ကားတွေနဲ့ လိုက်ကြေညာတာရှိတယ်လို့ မြို့ခံတွေထံက သိရပါတယ်။
ပဲခူးတိုင်း၊ ပေါင်းတည်မြို့နယ်၊ သရက်ချဉ်ရွာ လောင်းကစားဝိုင်းကနေ လိုင်းကြေးကောက်ပြီး ပြန်လာတဲ့ ပေါင်းတည်မြို့မရဲစခန်းမှူးနဲ့အဖွဲ့ ဧပြီ ၂ ရက်က လမ်းခရီးမှာ တိုက်ခိုက်ခံရတယ်လို့ ဒေသခံထံက သိရပါတယ်။
အဲ့ဒီတိုက်ခိုက်မှုကြောင့် ပေါင်းတည်မြို့မရဲစခန်းမှူး အပါအဝင် ၃ ယောက် ထိခိုက်ဒဏ်ရာရရှိခဲ့ပြီး သေဆုံးမှုရှိမရှိတော့ ဆက်လက်စုံစမ်းနေဆဲဖြစ်ပါတယ်။
နတ်ပုတီးကျေးရွာသားတယောက်က “ပေါင်းတည်မြို့နယ် တနယ်လုံးထဲက ရွာတွေမှာ အလှည့်ကျနဲ့လုပ်နေတာ။ ဂျင်ဝိုင်း၊ ဂျုံးဂျုံးကျ၊ ဖဲဝိုင်းတွေက ရက်ရှည်လုပ်ချင်တဲ့ အဖွဲ့တွေကြတော့ ဘုရားပွဲလေးဘာလေး အကြောင်းပြလုပ်ပေါ့။ အခု သရက်ချဉ်ရွာမှာလည်း ဘုရားပွဲလုပ်တယ်။ အဲ့ဒီမှာ လောင်းကစားထည့်တယ်။ အဲ့ဒီအတွက် ပေါင်းတည်ရဲစခန်းတွေက လုံခြုံရေးယူပေးရတယ်။ လိုင်းကြေးတော့ ပေးရတာပေါ့။ အခု အဲ့ဒီကနေ လိုင်းကြေးယူသောက်စားပြီး ဆိုင်ကယ် ၅ စီး၊ ရဲ ၇ ယောက်၊ ပြန်လာတဲ့ မြို့မရဲစခန်းမှူးနဲ့အဖွဲ့ကို ည ၉ နာရီလောက်မှာ နတ်ပုတီးရွာနဲ့ သရက်ချဉ်ရွာကြားလမ်းမပေါ်မှာ ဒေသခံ ပြည်သူ့ကာကွယ်ရေးတပ်ဖွဲ့တွေက တိုက်ခိုက်သွားတာ။ စခန်းမှူး အပါအဝင် ထိခိုက်ဒဏ်ရာတွေတော့ အနည်းဆုံးဖြစ်သွားတယ်” လို့ ပြောပါတယ်။
ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ (PPDF) တပ်ရင်း-၃၆၀၁၊ တပ်ခွဲ-၃ နဲ့ တပ်ခွဲ-၄ တို့က နန်းထိုက်အောင်စစ်ဆင်ရေးအဖြစ် မိုင်းဆွဲတိုက်ခိုက်ခဲ့တာဖြစ်ပါတယ်။
PPDF တပ်ရင်း-၃၆၀၁ ရဲ့ သတင်းပြန်ကြားရေးတာဝန်ခံက “အခုက ပြည်သူတွေကို လောင်းကစားဘက်ကို လှည့်ထားတာ။ PDF မဖြစ်ရင် ပြီးရောဆိုပြီး တနယ်လုံးကလူတွေကို လောင်းကစားသမားတွေဖြစ်အောင် လုပ်ထားတာ။ အခုဆိုရင် ကျွဲတလင်း၊ ဥနှဲစမ်း၊ ပဒင်းပင်၊ ချောက်လုံးပြူး၊ မှန်တန်း၊ ကျွှဲတဲကြီး စတဲ့ရွာတွေမှာလည်း အလှည့်ကျလုပ်တယ်။ အခုဟာကလည်း လယ်ပြင်က ရွာဘုရားသေးသေးလေးကို ဘုရားပွဲလုပ်တာ။ အဲ့ဒါကို သတင်းကြိုရနေလို့ လမ်းကနေစောင့်ပြီး မိုင်းဆွဲတိုက်ခိုက်ခဲ့တာ” လို့ ဒီဗွီဘီကို ပြောပါတယ်။
ထိခိုက်ဒဏ်ရာရသွားတဲ့ ရဲ ၃ ယောက်ကို သရက်ချဉ်ရွာက ကျန်းမာရေး ကူညီစောင့်ရှောက်မှုကားနဲ့ ပြည်ဆေးရုံကြီးကိုအရေးပေါ် သယ်ဆောင်သွားပြီး ရဲစခန်း အဝင်အထွက်တွေပါ တင်းကျပ်ထားတယ်လို့ ပေါင်းတည်ရဲစခန်းအနီး နေသူတယောက်ထံက သိရပါတယ်။
အခုလို တိုက်ပွဲသတင်းတွေ၊ ထိခိုက်သေဆုံးမှု သတင်းတွေနဲ့ ပတ်သက်ပြီး စစ်ကောင်စီဘက်က ဖြေကြားလေ့မရှိသလို သတင်းထုတ်ပြန်တာလည်း မရှိသေးပါဘူး။
