ကချင်လွတ်မြောက်ရေးအဖွဲ့ (ကေအိုင်အို) ဌာနချုပ် ရုံးစိုက်ရာ လိုင်ဇာအနီးတဝိုက်မှာ ကိုဗစ်-၁၉ ပိုးတွေ့အတည်ပြုလူနာ စတင်တွေ့ရှိလာသောကြောင့် ဇူလိုင် ၂၈ မှ စတင်ကာ လိုင်ဇာမြို့ကို အသွားအလာကန့်သတ် လော့ဒေါင်းပြုလုပ်လိုက်ပြီလို့ ကေအိုင်အိုဗဟို ကိုဗစ်ကာကွယ်ထိန်းချုပ်ရေးကော်မတီက ဇူလိုင် ၂၇ ရက်စွဲနဲ့ ကြေညာလိုက်ပါတယ်။
ဌာနချုပ်လိုင်ဇာအနီးရှိ ဂျေယန်စစ်ရှောင်စခန်းနဲ့ ဝေကြိုင်စစ်ရှောင်စခန်းတို့မှာ ပိုးတွေ့လူနာတွေ့ရှိခဲ့ပြီဖြစ်တာကြောင့် လိုင်ဇာမြို့တွင်းရှိ ပြည်သူတွေကို ဇူလိုင် ၂၈ မှ စတင်ကာ ကျန်းမာရေးစစ်ဆေးမှု အရှိန်အဟုန်မြှင့်လုပ်ဆောင်သွားမယ်လို့ ဆိုပါတယ်။
သက်ဆိုင်ရာက ကျန်းမာရေးစစ်ဆေးမှုတွေလုပ်ဆောင်နေစဉ် အပြင်မထွက်ဘဲ နေအိမ်မှ အလုပ်လုပ်ရန် Stay at Home စည်းကမ်းချက်တွေကို ပူးပေါင်းဆောင်ရွက်ရန်နဲ့ ပျက်ကွက်ပါက ထိရောက်စွာအရေးယူသွားမယ်လို့ သတိပေးထားပါတယ်။
လိုင်ဇာမြို့မှာ မနေ့က ပြည်သူတွေ အခြေခံစားသောက်ကုန် ၀ယ်ယူစုဆောင်းကြတာကြောင့် ကုန်ဈေးနှုန်း မြင့်တက်တာတွေရှိခဲ့ပေမဲ့ ဒီနေ့တော့ အသွားအလာမရှိသလောက် နည်းပါးသွားခဲ့တယ်လို့ လိုင်ဇာမြို့ခံတွေဆီက သိရပါတယ်။
ဓာတ်ပုံ - simasa kasa
ရှမ်းပြည်နယ်မြောက်ပိုင်း သိန္နီဆေးရုံကို ပထမဆုံး ပိုးတွေ့ လူနာ ၂ ဦး ရောက်ရှိလာပြီးနောက် ဇွန်လ ၂၁ ရက် ညနေပိုင်းမှ ဇွန်လ ၂၉ ရက်နေ့အထိ ဆေးရုံမှာ အသွားအလာကန့်သတ်ထား လော့ဒေါင်းချထားတယ်လို့ မြို့ခံတွေထံက သိရပါတယ်။
"ဟုတ်တယ်။ ဟုတ်တယ်။ ပိတ်ထားတယ်။ မနေ့ညနေကစ ပိတ်တယ်။ ဆေးရုံတက်နေတဲ့ အငြိမ်းစားဆရာမ တစ်ယောက် ဆီမှာပိုးတွေ့လို့ လားရှိုးဆေးရုံပို့ထားတယ်” လို့ သိန္နီမြို့ အရပ်ဘက်အဖွဲ့အစည်းတစ်ခုခေါင်းဆောင်က ပြောပါတယ်။
သိန္နီဆေးရုံက ဆရာဝန်အားလုံး ပိုးတွေ့ လူနာနဲ့ ထိစပ်လို့ ကွာရန်တင်းဝင်နေပြီး ဆေးရုံကို လော့ဒေါင်းလုပ်ထားတာတာလို့ သန္နီအနှိုင်းမဲ့ ကုသိုလ်လူမှုကူညီရေးအသင်းက ကိုစိုင်းဖက ပြောပါတယ်။
အငြိမ်းစား ကျောင်းဆရာမတစ်ယောက်နဲ့ EPC ရုံးက ဝန်ထမ်း စာရေးမတစ်ယောက် ကိုဗစ်-၁၉ ပိုးစစ်ဆေးတွေ့ရှိတာပါ။
"သူတို့ နေမကောင်းတာကြာမှ ဆေးရုံတက်တာ။ ဆေးရုံတက်တာ ကြာပြီကော။ ဆေးရုံတက်ရင်းနဲ့ လားရှိုးပို့လိုက်တဲ့အချိန်မှာ အဲပိုးတွေ့တာ။" လို့ ကိုစိုင်းဖက ရှင်းပြပါတယ်။
ကိုဗစ်-၁၉ ရောဂါပိုးရှိလူနာနဲ့ ထိတွေ့ခဲ့တဲ့ သိန္နီဆေးရုံမှ ကျန်းမာရေးဝန်ထမ်းတွေကို ကွာရန်တင်း လုပ်ထားပြီး ပိုးတွေ့လူနာတွေရဲ့ နေအိမ်တွေကိုလည်း အသွားအလာကန့်သတ်ထားပါတယ်။
