ရန်ကုန်၊ မရမ်းကုန်းမြို့နယ်၊ ၃ ရပ်ကွက်၊ မင်းဓမ္မလမ်း အမျိုးသားပြန်လည်သန်စွမ်းရေး ဆေးရုံအနီးမှာ ဧပြီ ၁၉ ရက် ဒီနေ့မနက် ၁၁ နာရီခွဲက အသက် ၇၀ အရွယ် အဘိုးအိုတဦး နေအပူရှိန်ကြောင့် လဲကျသေဆုံးသွားတယ်လို့ ရပ်ကွက်နေသူတွေဆီက သိရပါတယ်။

အပြင်ကနေ နေအိမ်ကိုပြန်လာတဲ့ အသက် ၇၀ အရွယ် အဘိုးအိုဟာ မင်းဓမ္မလမ်း အမျိုးသားပြန်လည်သန်စွမ်းရေးဆေးရုံအနီးမှာ လဲကျသေဆုံးသွားတာလို့ ရပ်ကွက်နေသူတဦးက ဒီဗွီဘီကို ပြောပါတယ်။

“သေတဲ့အဘကြီးက ၆ ရပ်ကွက်မှာနေတယ်လို့ ပြောတယ်။ သေချာတော့မသိဘူး။ ရပ်ကွက်ကလူကြီးတွေ ပရဟိတအဖွဲ့တွေ ဖုန်းဆက်တယ်။ သူတို့လာတော့ နေအပူရှိန်ကြောင့်သေတယ်လို့ ပြောတယ်။”

ရပ်မိရပ်ဖတွေရဲ့ ဖုန်းဆက်မှုကြောင့် လဲကျသေဆုံးတဲ့ အဘိုးအိုကို အဖြူရောင်အသင်း နာရေးကူညီမှုယာဥ်နဲ့ မြောက်ဥက္ကလာပဆေးရုံကြီးကို ပို့ဆောင်ပေးခဲ့တယ်လို့ အုပ်ချုပ်ရေးနဲ့ နီးစပ်သူတဦးက ဒီဗွီဘီကို ပြောပါတယ်။

“ပရဟိတအဖွဲ့ကို ဖုန်းဆက်ခေါ်တော့ မြန်မာ့ကြယ်ဖြူ လူမှုကူညီရေးအသင်းကလာတယ်။ သူတို့စစ်ဆေးကြည့်တော့ ဆုံးနေပြီ။ အသက်လည်းကြီးပြီး နေကလည်းပြင်းတော့ အပူရှိန်ကြောင့် ဆုံးတယ်ပြောတယ်။ သူတို့ကနေပြီး အဖြူရောင်အသင်း နာရေးယာဥ်နဲ့ ဆေးရုံကိုပို့ပေးတယ်။ သေတဲ့သူက ဒီနားရပ်ကွက်ကပဲ။”

ပြီးခဲ့တဲ့ ဧပြီ ၁၀ ရက် နေ့လယ် ၁ နာရီခွဲကလည်း ဗဟန်းမြို့နယ် ဦးစံဖေရပ်ကွက်မှာ စက်ဘီးစီးပြီးပြန်လာတဲ့ အမျိုးသားတဦး လဲကျသေဆုံးခဲ့တဲ့ ဖြစ်စဥ်လည်း ရှိပါတယ်။

ဒါ့အပြင် ဒဂုံဆိပ်ကမ်းမြို့နယ် ၉၄ ယုဇနဥယျာဥ်အိမ်ရာမှာ ဧပြီ ၁၀ ရက် မနက်ပိုင်းက နေအပူရှိန်ကြောင့် သားအမိနှစ်ဦး အသက်ရှူကျပ်ပြီး သေဆုံးခဲ့ပါတယ်။

ရန်ကုန်တိုင်း မှော်ဘီမြို့နယ်မှ အဖွဲ့လိုက်စက်ဘီးစီးပြီးပြန်လာတဲ့ အမျိုးသားတဦး ဒီနေ့ နေ့လယ် ၁ နာရီက ဗဟန်းမြို့နယ် ဆရာစံရပ်ကွက် သာယာဝတီလမ်းမှာ လဲကျသေဆုံးသွားတယ်လို့ ရပ်ကွက်နေသူတွေက ပြောပါတယ်။

ဒီနေ့မနက်က အမျိုးသားတဦးဟာ အသိမိတ်ဆွေတွေနဲ့ မှော်ဘီမြို့နယ်ကို စက်ဘီးစီးထွက်ခဲ့ပြီး အပြန်  ဆရာစံရပ်ကွက် သာယာဝတီလမ်းမှာ လဲကျခဲ့တာလို့ ရပ်ကွက်နေသူတဦးက ဒီဗွီဘီကို ပြောပါတယ်။

"လဲကျပြီး မသေသေးဘူး၊ ဆေးရုံကိုပို့ဖို့ ရပ်ကွက်လူကြီးတွေ ပရဟိတအသင်းကို ဖုန်းဆက်ခေါ်ပြီး ဆေးရုံကိုပို့တယ်၊ ဆေးရုံရောက်မှ ဆုံးသွားတာ။"

သေဆုံးသူမှာ ဗဟန်းမြို့နယ် ရွှေတောင်ကြား ၂ ရပ်ကွက် ကုက္ကိုင်းရိပ်သာလမ်းမှာနေထိုင်တဲ့ ဦးတင်ထွဋ်ဆိုသူ စက်ဘီးစီးဝါသနာရှင်ဖြစ်ပြီး ပန်းနာရင်ကြပ်ရောဂါအခံရှိတယ်လို့ ရပ်ကွက်အုပ်ချုပ်ရေးနဲ့နီးစပ်သူတဦးက ဒီဗွီဘီကို ပြောပါတယ်။

"သူက ပန်းနာရင်ကြပ်ရှိတဲ့လို့ ပြောတယ်၊ နေလည်းအရမ်းပူနေတော့ ဦးနှောက်သွေးကြောပြတ်သွားတာဖြစ်မယ်။"

လဲကျသွားတဲ့ ဦးတင်ထွဋ်ကို မေတ္တာအလင်းလူမှုကူညီရေးအသင်းက လူနာတင်ယာဥ်နဲ့ ရန်ကုန်ပြည်သူ့ဆေးရုံကြီးကို ပို့ဆောင်ပေးခဲ့ရာ ဆေးရုံရောက်ရှိချိန်မှာ သေဆုံးသွားခဲ့တာ ဖြစ်ပါတယ်။

မြန်မာနိုင်ငံအတွင်း ဒီနှစ် ဧပြီလရဲ့ နေ့အပူချိန်ဟာ အရင်နှစ်တွေထက် မြင့်တက်ကြောင်း မိုးလေဝ

သနှင့် ဇလဗေဒဦးစီးဌာနရဲ့ ထုတ်ပြန်ချက်အရသိရပါတယ်။