မန္တလေးတိုင်း၊ စဉ့်ကိုင်မြို့နယ် မန္တလေး-ကျောက်ဆည်လမ်း စဉ့်ကိုင် ပေါ်တော်မူဘုရားအနီးမှာ အောက်တိုဘာလ ၃ ရက် နေ့လယ် ၂ နာရီ မိနစ် ၅၀ လောက်ပက ဘဏ်ကို မီတာခသွားသွင်းတဲ့ လျှပ်စစ်မန်နေဂျာ လိုက်ပါလာတဲ့ကား ပစ်ခတ်တိုက်ခတ်ခံခဲ့ရပါတယ်။
ပလိပ် လျှပ်စစ်ရုံးကနေ ဘဏ်ကို မီတာခသွားသွင်းတဲ့ ကားပေါ်မှာ လျှပ်စစ်မန်နေဂျာ၊ ပလိပ်စခန်းမှူးနဲ့ စစ်ကောင်စီတပ်သား ၃ ယောက် လိုက်ပါလာခဲ့ကြပြီး မဟာမိတ်တွေဖြစ်တဲ့ MN PDF မြို့ပြပြောက်ကျားအထူးတပ်ဖွဲ့၊ Truth Keeping Force - Amarapura၊ ဇာမဏီ ပြောက်ကျားတပ်ဖွဲ့တို့က တိုက်ခိုက်ခဲ့တာလို့ သိရပါတယ်။
ပြည်သူလူထုအား မီတာမဆောင်ပါက မီတာဘောက်တွေ ဖြုတ်မယ်လို့ ခြိမ်းခြောက်ပြီး အတင်းအကျပ် ကောက်ခံထားသော ပြည်သူချွေးနှဲစာဖြစ်တာကြောင့် စစ်ကောင်စီ အသုံးစရိတ် မဖြစ်စေရေး တိုက်ခိုက်ခဲ့တာလို့ MN PDF မြို့ပြပြောက်ကျားအထူးတပ်ဖွဲ့က ဆိုပါတယ်။
ပစ်ခတ်မှုမှာ ၃ မိနစ်လောက်ရှိကာ အပြန်အလှန် ပစ်ခတ်ခဲ့ကြပြီး ရှေ့ခေါင်းခန်းမှလိုက်ပါလာတဲ့ ပလိပ်စခန်းမှူး သေဆုံးကာ ကားပေါ်ပါ တခြားလူတွေလည်း ထိခိုက်မှုရှိနိုင်တယ်လို့ သိရပါတယ်။
အခြေအနေအရ အမြန်ပြန်ဆုတ်ခဲ့ရတဲ့အတွက် မီတာခငွေတွေနဲ့ လက်နက်အား မသိမ်းဆည်းနိုင်ခဲ့ဘဲ ပြည်သူ့ကာကွယ်ရေးအဖွဲ့ဝင်အားလုံး အန္တရာယ်ကင်းလုံခြုံရာကို ရောက်ရှိသွားပြီလို့ MN PDF မြို့ပြပြောက်ကျားအထူးတပ်ဖွဲ့ က ထုတ်ပြန်ထားပါတယ်။
ပစ်ခတ်တိုက်ခိုက်မှုကြောင့် ပလိပ်မြို့မှာ စစ်ကောင်စီတပ်သား အင်အားအလုံးအရင်းနဲ့ စစ်ဆေးနေပြီး အပြစ်မဲ့ပြည်သူတချို့ ဖမ်းဆီးခံခဲ့ရတယ်လို့ သိရပါတယ်။
ရန်ကုန်တိုင်း မြောက်ဒဂုံ ဘေလီတံတားအနီးမှာ ဇွန် ၂၉ ရက် ညပိုင်းက တောင်ဒဂုံမြို့နယ် လျှပ်စစ်အင်ဂျင်နီယာရုံးက လျှပ်စစ်မန်နေဂျာတဦး ကားမောင်းလာစဉ် သေနတ်နဲ့ ပစ်သတ်ခံခဲ့ရတယ်လို့ ဒေသခံတွေက ပြောပါတယ်။
လျှပ်စစ်မန်နေဂျာ ဗိုလ်ကြီးဟောင်း ဝင်းမြင့်ဇော်ဟာ ပင်လုံလမ်းဘက်ကနေ ဘေလီတံတားဘက်ကို ကားမောင်းနှင်လာစဉ် အမည်မသိ သေနတ်သမားက ပစ်ခတ်ခဲ့တဲ့အတွက် အခင်းဖြစ်နေရာမှာ သေဆုံးသွားတာလို့ ဘေလီတံတားအနီး နေထိုင်သူ အမျိုးသားတဦးက ပြောပါတယ်။
“ည ၈ နာရီလောက် ဘေလီမီးပွိုင့်ဘက်ကနေ Car Showroom ဘက်ကို အကွေ့မှာ အပစ်ခံလိုက်ရတာ။ ကားက လမ်းဘေးထိုးကျသွားတယ်။ သေနတ်သမားက ၆ ချက်လောက်ပစ်သွားတာ ပွဲချင်းပြီးပဲ။ ပထမတုန်းက သေနတ်နဲ့အပစ်ခံရတာ ဘယ်သူမှန်းမသိဘူး။ တောင်ဒဂုံဘက်က ကားသမားတွေ လာကြည့်ပြီးတော့မှ လျှပ်စစ်မန်နေဂျာ (ယခင်) ဗိုလ်ကြီးဟောင်းတဦးဆိုတာ သိရတာ။”
အမည်မသိ သေနတ်သမား ပစ်ခတ်မှုကြောင့် လျှပ်စစ်မန်နေဂျာ ဗိုလ်ကြီးဟောင်း ဝင်းမြင့်ဇော်ဟာ နောက်ကျော၊ ပါး၊ မေးစေ့ စတဲ့နေရာတွေကို သေနတ်ထိမှန်ပြီး အခင်းဖြစ်ရာမှာပဲ သေဆုံးခဲ့တာပါ။
သေနတ်ပစ်ခတ်မှု ဖြစ်ပွားအပြီး စစ်ကောင်စီတပ် အလုံးအရင်းနဲ့ ရောက်လာကာ အခင်းဖြစ်နေရာအနီးက ၄၆ လမ်းဆုံ၊ ဘေလီတံတား စတဲ့နေရာတွေကို ပိတ်ဆို့စစ်ဆေးခဲ့တယ်လို့ ဒေသခံတွေက ပြောပါတယ်။
