ဧရာဝတီတိုင်း၊ မြောင်းမြမြို့နယ်မှာ လျှပ်စစ်မီးပြတ်တာတွေ များနေသလို နေအိမ်တွေကို သွယ်တန်းထားတဲ့ လျှပ်စစ်မီးကြိုးတွေလည်း ခိုးယူခံရလို့ ပျောက်ဆုံးမှုတွေ  ပိုမိုများလာတယ်လို့ မြို့ခံတွေက ပြောပါတယ်။

မြို့ပေါ်ရပ်ကွက်တွေက နေအိမ်တွေမှာ  သွယ်တန်းထားတဲ့ ဓာတ်ကြိုးတွေ မကြာခဏ ပျောက်ဆုံးနေပြီး ရဲတပ်ဖွဲ့အနေနဲ့လည်း ဖမ်းဆီးအရေးယူတာ မရှိဘူးလို့ ဒေသခံတွေက ပြောပါတယ်။

မြောင်းမြမြို့ခံတဦးက "မြို့ပေါ်မှာက မီးက လာရင်လည်း ခဏပဲ။ မလာတာက များတယ်။ ညဘက် မီးမလာတဲ့အချိန်ဆို မီးကြိုး ဖြုတ်ခိုးခံရတယ်။ မြို့ပေါ်မှာ သူခိုးတွေ များနေတာလည်း ရဲတပ်ဖွဲ့က သိတယ်။ အခိုးခံရလို့ တိုင်လည်း ရဲတပ်ဖွဲ့က ဖမ်းဆီးတာမရှိဘူး"လို့ ပြောပါတယ်။

နေအိမ်တွေကို သွယ်တန်းထားတဲ့ လျှပ်စစ်မီးကြိုးအပြင် ဆိုင်ကယ်၊ ဖုန်းနဲ့ နေအိမ် အသုံးအဆောင် ပစ္စည်းတွေလည်း မကြာခဏ ပျောက်ဆုံးနေလို့ မြို့နယ် ရဲစခန်းကို သွားရောက်တိုင်ကြားပေမဲ့ လိုက်လံ စုံစမ်းဖမ်းဆီးအရေးယူတာ မရှိဘူးလို့လည်း သိရပါတယ်။

မြောင်းမြမြို့မှာ လျှပ်စစ်မီးပုံမှန်မလာပေမဲ့  လျှပ်စစ်ရုံးကိုတော့  မီတာခ လစဉ်ပေးသွင်း နေရတယ်လို့ မြို့ခံတွေက ပြောပါတယ်။

ဧရာဝတီတိုင်း၊ ဘိုကလေးမြို့မှာ စစ်အာဏာသိမ်းပြီးနောက်ပိုင်း လျှပ်စစ်မီးပြတ်တောက်မှုတွေ များနေပြီး နေအိမ်တွေကို သွယ်တန်းထားတဲ့ လျှပ်စစ်မီးကြိုးတွေ အခိုးခံရမှုမကြာခဏ ဖြစ်ပွားနေတယ်လို့ ဒေသခံတွေထံက သိရပါတယ်။

မီးကြိုးဖြုတ်ခိုးခံခဲ့ရတဲ့ အမှတ် ၃ ရပ်ကွက်က နေအိမ်ပိုင်ရှင်တစ်ဦးက "လျှပ်စစ်မီးက ပြီးခဲ့တဲ့ အစိုးရလက်ထက်က ပျက်မယ့်အချိန်ဆို ဘိုကလေး လျှပ်စစ်အင်ဂျင်နီယာရုံးက လူမှုကွန်ယက် စာမျက်နှာမှာ ယဉ်ယဉ်ကျေးကျေး စကားလုံးတွေနဲ့ကြိုတင် အသိပေးကြေညာတယ်။ စစ်အာဏာသိမ်းပြီးတဲ့နောက် ဘာမှလည်းမကြေညာတော့ဘူး။ မီတာခ ကတော့ လစဉ်လာတယ်။ မီးမလာတာတွေများတော့ သူခိုးကလည်း အတင့်အတော်ရဲပြီး မီးကြိုးဖြုတ်ခိုးတယ်။ အသက် ၅၀ ကျော်ပြီ ဘိုကလေးမှာ မီးကြိုးဖြုတ်ခိုးခံရတာ စစ်ကောင်စီလက်ထက်မှကြားရတာ"လို့ ပြောပါတယ်။

ဘိုကလေးမြို့မှာ လျှပ်စစ်မီး  ပြတ်တောက်မှုများနေတဲ့အတွက်  အမှတ် ၃ ရပ်ကွက် အမှတ် ၁၀ ရပ်ကွက်က နေအိမ်တွေမှာ လျှပ်စစ်မီးကြိုး ဖြုတ်ခိုးခံရတာ နေအိမ် ၁၅ အိမ်ထက်မနည်းရှိနေပါပြီ။

အမှတ် ၁၀ ရပ်ကွက်မှာ နေထိုင်တဲ့ မီးကြိုးဖြုတ်ခိုးခံခဲ့ရသူ နေအိမ်ပိုင်ရှင်တစ်ဦးက "ပြီးခဲ့တဲ့ အပတ်က မီးကြိုးဖြုတ်ခိုးခံရတာ။ ဘယ်အချိန် ဖြုတ်ခိုးသွားမှန်းမသိဘူး။ မီးပျက်တဲ့ အချိန်ကများနေတော့ သူခိုးတွေ အကြိုက်ခိုးနေတာ။ ရဲစခန်း မတိုင်ဘူးလေ။ တိုင်လည်းဖမ်းပေးမယ့်သူတွေမှမဟုတ်တာ"လို့ ပြောပါတယ်။

ဘိုကလေးမြို့မှာ လျှပ်စစ်မီး ပုံမှန်လာပေမဲ့ စစ်ကောင်စီ လက်အောက်ခံ လျှပ်စစ်ရုံး Non CDMဝန်ထမ်းတွေက လစဉ် မီတာခ လိုက်လံကောက်ခံနေပါတယ်။