မန္တလေးတိုင်း၊ မိုးကုတ်မြို့မှာ မီတာမဆောင်တဲ့ရပ်ကွက် ကျေးရွာတွေကို မီးဖြတ်တာကြောင့် ဒေသခံတွေက မီတာဆောင်ကြပေမဲ့ တရက်ကို လျှပ်စစ်မီး ၁ နာရီသာလာတာကြောင့် ဒေသခံတွေ အခက်အခဲ ဖြစ်နေတယ်လို့ ပြောပါတယ်။
ကိစ္စကုတ်ရပ်ကွက်ကို မီတာမဆောင်လို့ဆိုပြီး နိုဝင်ဘာလအတွင်းက ရက် ၂၀ လျှပ်စစ်မီးဖြတ်တောက်ခဲ့ကာ မီတာဆောင်ပြီးတဲ့ နောက်မှာလည်း မီး ၁ နာရီဝန်းကျင်သာ လာတယ်လို့ ရပ်ကွက်နေပြည်သူတဦးက ပြောပါတယ်။
“ခု မီးလာတာ ခဏပဲ၊ ထမင်းဟင်းလည်း ချက်စားလို့မရဘူး။ ဖုန်းအားတောင် သွင်းလို့မရဘူး။ မီးလာရင်လည်း မီးအားကမငြိမ်တော့ ဖုန်းပျက်မှာတောင် ကြောက်ရတယ်။ အပြင်သွားနေတဲ့အချိန် မီးလာရင် ပြန်လာရင် အားကိုမသွင်းရဘူး။”
စစ်ကောင်စီတပ်က မီတာမဆောင်တဲ့ ရပ်ကွက်တွေကို ဆက်တိုက်မီးဖြတ်ပြီး မီတာဆောင်တဲ့ ရပ်ကွက်ကိုပဲ မီးပေးတာကြောင့် မီတာမဆောင်ချင်ပေမဲ့ ဒေသခံတွေက ဆောင်နေကြရတယ်လို့ ပြောပါတယ်။
အမည်မဖော်လိုတဲ့ ဒေသခံတဦးက “ရပ်ကွက်လူကြီးတွေကလည်း မီတာမဆောင်တဲ့အိမ် နည်းတယ်ဆိုရင် မေးလာရင် ဖြေကြမှာ၊ အဲ့တော့ ကိုယ့်အိမ်တအိမ်ပဲ မီတာမဆောင်ရင် ပြဿနာဖြစ်မှာလည်း ကြောက်တယ်။ မီတာဆောင်ပြန်တော့လည်း မီးကမလာဘူး။ သူတို့က နောက်ဆုံး လုံးဝမီးမပေးတော့ဘူး၊ ပိုက်ဆံတော့ ရအောင်ကောက်မယ် ဆိုသလိုမျိုး လုပ်နေတာ” လို့ ပြောပါတယ်။
မီတာခဆောင်ရမှာတွေလည်း များတာကြောင့် စားဝတ်နေရေး အဆင်မပြေတဲ့ မိသားစုတွေ အနေနဲ့လည်း မီတာဆောင်ဖို့ အခက်အခဲတွေ ရှိနေတယ်လို့ ပြောပါတယ်။
မိုးကုတ်မြို့မှာ စစ်ကောင်စီတပ်က လျှပ်စစ်မီးတွေ ဖြတ်တောက်ထားတဲ့အပြင် အင်တာနက်လိုင်းလည်း မရတာကြောင့် ဒေသခံတွေအနေနဲ့ သတင်းမှန်လည်း မရရှိဘူးလို့ ပြောပါတယ်။
“အခုက ဘယ်သူမှမတင်ကြတော့ မြို့ထဲသတင်းဆို ဘာမှကို မသိရဘူး။ အင်တာနက်လိုင်းကလည်း မရဘူး။ အရင်က တင်ပေးနေသူတွေလည်း ဖမ်းခံရသူတွေက ဖမ်းခံရဆိုတော့ တင်ပေးမယ့်သူ မရှိကြတော့ဘူး” လို့ ဒေသခံတဦးက ပြောပါတယ်။
ရန်ကုန်တိုင်း၊ အင်းစိန်မြို့နယ်မှာ ဇွန် ၂၁ ရက်ကစတင်ပြီး လျှပ်စစ်အင်ဂျင်နီယာရုံးက မီတာပုံးတွေ ကြိုးလိုက်ဖြတ်ပြီး လျှပ်စစ်မီးလိုက် ဖြတ်နေတယ်လို့ ဒေသခံတွေက ပြောပါတယ်။
အင်းစိန်မြို့နယ်၊ မုဒိတာအိမ်ရာမှာ လျှပ်စစ်မီတာခပေးဆောင်ထားတဲ့ နေအိမ်ခန်းတွေရော မီတာခ မပေးဆောင်တဲ့ အိမ်ခန်းတွေကိုပါ မီးကြိုးတွေလိုက်ဖြတ်ချခဲ့တာလို့ အိမ်ရာဝင်းအတွင်း နေထိုင်သူတွေထံက သိရပါတယ်။
အိမ်ရာဝင်းအတွင်းနေထိုင်သူ အမျိုးသမီးတဦးက "ကျမတို့အိမ်က မီတာဆောင်ထားတယ်၊ ချလံတွေဘာတွေလည်း လာဖြတ်တဲ့သူတွေကို ပြတယ်။ မီတာခ လတိုင်းဆောင်နေတာကို မီးကြိုးဖြတ်ချသွားတယ်။ မီတာခမဆောင်တဲ့ အိမ်တွေကိုလည်း ဖြတ်တယ်" လို့ ပြောပါတယ်။
မီတာခ လစဉ်ဆောင်တဲ့အိမ်ဖြစ်စေ မဆောင်တဲ့အိမ်ဖြစ်စေ အင်းစိန် လျှပ်စစ်အင်ဂျင်နီယာရုံးက ဝန်ထမ်းတွေနဲ့ အရပ်ဝတ်တွေက မီးကြိုးတွေ လိုက်ဖြတ်နေတာလို့ ဆိုပါတယ်။
လျှပ်စစ်ဝန်ထမ်းတဦးက “ကျနော်တို့ကို ရုံးက မီးသွားဖြတ်ဆိုလို့ဖြတ်တာ။ ဆောင်တဲ့အိမ်ကော မဆောင်တဲ့အိမ်ကောဖြတ်ဆိုလို့ ဖြတ်တာ။ ရုံးမှာပဲ ရှင်းလို့ရမယ်။ ကျနော်တို့ကတော့ မသိဘူး” လို့ ပြောပါတယ်။
မီတာခမပေးဆောင်ရသူတွေအနေနဲ့ အင်းစိန်လျှပ်စစ်အင်ဂျင်နီယာရုံးမှာ မီတာခ သွားရောက်ပေးဆောင်ရပြီး မီတာကြိုး ပြန်တပ်တဲ့အတွက်လည်း အခကြေးငွေ ပေးဆောင်ရတယ်လို့လည်း သိရပါတယ်။
အိမ်ရာဝင်းအတွင်းနေထိုင်သူ အမျိုးသားတဦးက “အင်းစိန်လျှပ်စစ်အင်ဂျင်နီယာရုံးမှာ အကြာကြီး တန်းစီပြီးစောင့်ရတယ်။ ရုံးရှေ့မှာ မနက် ၆ နာရီလောက်ကတည်းက တန်းစီတဲ့လူက မနည်းဘူး။ မီတာခဆောင်ပြီးသွားလည်း ဒဏ်ကြေးငွေဆောင်ရသေးတယ်။ မပြီးသေးဘူး။ မီးဖြတ်ခံထားရတဲ့ အိမ်တွေက လူတွေ ဗိုလ်ကြီးနဲ့သွားတွေ့ဆိုပြီး ဗိုလ်ကြီးကို မီးဖြတ်ထားကြောင်း သွားပြောရတယ်။ မီးပြန်တပ်ပေးတဲ့သူကို ၅,၀၀၀ ပေးရတယ်” လို့ ပြောပါတယ်။
မီတာကြိုးတွေ လိုက်လံဖြတ်ချခဲ့တဲ့ အင်းစိန်လျှပ်စစ်အင်ဂျင်နီယာရုံး ခေါင်မိုးပေါ်မှာ ဇွန် ၁၆ ရက် မနက်ပိုင်းက မပေါက်ကွဲသေးတဲ့ လက်ပစ်ဗုံးတလုံး တွေ့ရှိခဲ့ပါသေးတယ်။
