ရန်ကုန်တိုင်း၊ သာကေတမြို့နယ်မှာ မတ်လ ၃၀ ရက် ညနေပိုင်းက လျှပ်စစ်ဝန်ထမ်းတဦး လမ်းဘေးဓာတ်တိုင်ပြုပြင်စဉ် ဓာတ်လိုက်သေဆုံးသွားပါတယ်။
သာကေတမြို့နယ်၊ အမှတ် ၆ ရပ်ကွက်၊ ရွှေပြည်သာလမ်းမနဲ့ ဝေဇယန္တာလမ်းမကြီးအနီး မီးကြိုးပြုပြင်ဖို့ လျှပ်စစ်ဝန်ထမ်းတဦး ဓာတ်တိုင်ပေါ်တက်သွားပြီး ဓာတ်လိုက်သေဆုံးခဲ့တာ ဖြစ်ကြောင်း ဒေသခံတွေဆီက သိရပါတယ်။
“ညနေ ၆ နာရီလောက်မှာ ရွှေပြည်သာလမ်းမကြီးနဲ့ ဝေဇယန္တာလမ်းမကြီးထောင့်က ဓာတ်တိုင်ပေါ်ကို မီးကြိုးတွေတက်ပြင်နေရင်း ဓာတ်တိုင်ပေါ်မှာပဲ ဓာတ်လိုက်သေဆုံးသွားတာ။ ဘယ်သူမှလည်း တက်မဖြုတ်ရဲဘူး။ လူနာတင်ကားတွေလာပြီး မှပဲ သေဆုံးသူအလောင်းကို တက်ဖြုတ်ရတယ်” လို့ ရွှေပြည်သာလမ်းမကြီးအနီး နေထိုင်သူတဦးက ပြောပါတယ်။
ဓာတ်မီးကြိုးပြုပြင်စဉ် ဓာတ်လိုက်သေဆုံးခဲ့တဲ့ လျှပ်စစ်ဝန်ထမ်းဟာ အသက် ၃၀ ဝန်းကျင် အမျိုးသားတဦးဖြစ်ပြီး သာကေတမြို့နယ် လူမှုကူညီရေးအသင်းအဖွဲ့တွေက ဓာတ်တိုင်ပေါ်ကနေ ဖြုတ်ချသယ်ယူပြီး သင်္ဃန်းကျွန်း စံပြဆေးရုံ ပို့ဆောင်ပေးထားပါတယ်။
ရခိုင်ပြည်နယ်၊ မြောက်ဦးမြို့နယ်၊ တိမ်ညိုကျေးရွာမှာ မတ် ၁၂ ရက် ည ၇ နာရီလောက်က ထရန်စဖော်မာ တည်ဆောက်ဖို့ ရောက်နေတဲ့ ရန်ကုန်နဲ့ ပဲခူးတိုင်းက လျှပ်စစ်ဝန်ထမ်း နှစ်ယောက် ခိုက်ရန်ဖြစ်ပွားခဲ့ပြီး ဓားနဲ့ထိုးရာမှာ တယောက် သေဆုံးသွားတဲ့အတွက် ပြစ်မှုကျူးလွန်သူကို ရက္ခိုင့်အမျိုးသားအဖွဲ့ချုပ်(ULA)က ဖမ်းဆီးအရေးယူထားတယ်လို့ ဒေသခံတွေက ပြောပါတယ်။
အဲဒီ လျှပ်စစ်ဝန်ထမ်းနှစ်ဦးက အရက်ဆိုင်ကအပြန် တည်းခိုတဲ့အိမ်မှာ စကားများရာကနေ အခုလိုဖြစ်ပွားခဲ့တာဖြစ်တယ်လို့လည်း တိမ်ညိုအုပ်ချုပ်ရေးမှူးက ပြောပါတယ်။
သူတို့ ၂ ယောက်ဟာ မတ် ၁၄ ရက်က မကွေးကနေ မြောက်ဦးဘက်ကို ထရန်စဖော်မာ တည်ဆောက်ဖို့ ရောက်နေကြတာဖြစ်ပြီး ဓားထိုးမှု ကျူးလွန်ခဲ့သူက ရန်ကုန်တိုင်းက လျှပ်စစ်ဝန်ထမ်းဖြစ်ကာ သေဆုံးသွားသူကတော့ ပဲခူးတိုင်းက လျှပ်စစ်ဝန်ထမ်းဖြစ်တယ်လို့ ဒေသခံ တဦးက ဆိုပါတယ်။
ULA/AA အနေနဲ့ အုပ်ချုပ်ရေး၊ တရားစီရင်ရေး ယန္တရားတွေကို ရခိုင်ပြည် တခုလုံး လွှမ်းခြုံနိုင် အောင် ကြိုးပမ်းနေတယ်လို့လည်း ဖေဖော်ဝါရီ ၂၇ ရက်မှာကျင်းပတဲ့ သတင်းစာရှင်းလင်းပွဲမှာ ULA/AA ရဲ့ ပြောရေးဆိုခွင့်ရှိသူ ဦးခိုင်သုခက ပြောဆိုထားပါတယ်။
