ဗြိတိန်မှာ နိုင်ငံရေးမတည်မငြိမ် ဖြစ်နေတာကြောင့် ဗြိတိန်နဲ့ လွတ်လပ်စွာကုန်သွယ်မှု သဘောတူညီချက်အတွက် နှောင့်နှေးမှုတွေ ရှိလာမှာကို စိုးရိမ်မိကြောင်း သြစတြေးလျဝန်ကြီးချုပ် အန်ထနီ အဲလ်ဘနိစ်က အောက်တိုဘာ ၂၁ ရက်မှာ ပြောလိုက်ပါတယ်။
ဒါကို အမြန်လုပ်ဆောင်ဖို့ ဝန်ကြီးချုပ် ထရပ်စ်နဲ့ ဆွေးနွေးခဲ့ပြီး သင့်လျော်တဲ့ လွှတ်တော်လုပ်ငန်းစဉ်တွေကို သက်ဆိုင်ရာလွှတ်တော်တွေမှာ ဖြတ်သန်းခဲ့ကြောင်းနဲ့ ဒီနှစ်မကုန်ခင် နိဂုံးချုပ်နိုင်အောင် ကြိုးစားဖို့ သေချာဆွေးနွေးခဲ့တယ်လို့ အဲလ်ဘာနိစ်က သတင်းထောက်တွေကို ပြောကြားခဲ့ပါတယ်။
အဲလ်ဘနိစ်က သူ ဝန်ကြီးချုပ်သက်တမ်း ၅ လအတွင်း အခုထိ ဗြိတိန်ဝန်ကြီးချုပ် ၂ ယောက်နဲ့ တွေ့ခဲ့ရကြောင်း၊ ဒီကိစ္စတွေ ပြီးသွားတဲ့ တချိန်မှာတော့ ၃ ယောက်မြောက် ဝန်ကြီးချုပ်နဲ့ ထပ်တွေ့ရဦးမှာပဲလို့ ပြောပါတယ်။
ယူကေရဲ့ နောက်ထပ် ဝန်ကြီးချုပ်ဖြစ်လာမယ့် ဘယ်သူပဲဖြစ်ဖြစ် ဒီကိစ္စကို ပြောဆိုရမှာပါလို့ သူက ဆိုပါတယ်။
နှစ်နိုင်ငံကြား လွတ်လပ်တဲ့ ကုန်သွယ်မှုသဘောတူညီချက်ကို ၂၀၂၁ ခုနှစ် ဒီဇင်ဘာလမှာ လက်မှတ်ရေးထိုးခဲ့ပြီး အချိန်တန်ရင် နှစ်နိုင်ငံကုန်သွယ်မှုကို ပေါင် ၁၀ ဘီလီယံ (ဒေါ်လာ ၁၃ ဒသမ ၃ ဘီလီယံ) ကျော် မြှင့်တင်ဖို့ ခန့်မှန်းထားတာ ဖြစ်ပါတယ်။
