တန်ဆောင်တိုင်ကာလ ရောက်ရင် မြန်မာနိုင်ငံမှာ ကထိန်ပွဲ၊ တန်ဆောင်တိုင် မီးပုံးပျံပွဲတွေ ကျင်းပသလို အိမ်နီးချင်း ထိုင်းနိုင်ငံမှာလည်း လွိုင်ကထုန် (Loy Krathong) လို့ ခေါ်တဲ့ ထိုင်းရိုးရာ မီးဖောင်မျှောပွဲကို ကျင်းပလေ့ရှိပါတယ်။ ပြီးခဲ့တဲ့နှစ်က COVID-19 ကပ်ရောဂါကြောင့် နိုင်ငံ အတော်များများမှာ လူစုလူဝေးနဲ့ ပွဲလမ်းသဘင်တွေ မကျင်းပနိုင်ခဲ့ပါဘူး။
ဒီနှစ်မှာတော့ ထိုင်းနိုင်ငံ၊ ဘန်ကောက်မြို့ အပါအဝင် ချင်းမိုင် လွိုင်ကထုန်ပွဲကို နိုဝင်ဘာ ၇ ရက်နေ့ကနေ ၉ ရက်နေ့အထိ ခမ်းခမ်းနားနား ကျင်းပသွားမှာပါ။ ချင်းမိုင်မြို့ဟာ ထိုင်းနိုင်ငံ အနောက် မြောက်ပိုင်းမှာ တည်ရှိပြီး ယခင်ကတော့ ချင်းမိုင်ကို ဇင်းမယ်လို့ ရှေးမြန်မာတွေ ခေါ်ဝေါ်ကြပါတယ်။
မြန်မာနိုင်ငံရဲ့ ပထဝီမြေ၊ ရာသီဥတု ဆင်တူတဲ့ ချင်းမိုင်ဟာ နိုဝင်ဘာလ တန်ဆောင်တိုင်ကာလ ရောက်ရင် အေးချမ်းတဲ့ ဆောင်းအငွေ့အသက်နဲ့ လှပခမ်းနားတဲ့ လွိုင်ကထုန်ပွဲကို နှစ်စဉ် ကျင်းပလေ့ရှိပြီး ဒီပွဲကို နိုင်ငံခြားသား ခရီးသွားတွေနဲ့ ပြည်တွင်း ခရီးသွားတွေ အများဆုံး လာရောက် လည်ပတ်ကြပါတယ်။
“လွိုင်ကထုန်ပွဲ” ဆိုတာ မီးဖောင်မျှောပွဲပါ။ “လွိုင်” ဆိုတာ မျှောချခြင်း၊ “ကထုန်” ဆိုတာ ပန်းဆီမီး ထည့်ထားတဲ့ပန်းလို့ အဓိပ္ပာယ် ရပါတယ်။ ထိုင်းနိုင်ငံက လွိုင်ကထုန်ပွဲကို လွန်ခဲ့တဲ့ နှစ်ပေါင်း ၇၀၀ ကျော် ဆုခိုထိုင်းခေတ် တတိယမြောက် ဘုရင်မင်းဆက် ရာမ်ခမ်းဟိုင်ဘုရင် လက်ထက်မှာ စတင် ကျင်းပခဲ့ပါတယ် သိရပါတယ်။
“နိုဝင်ဘာ ၈ ရက်နေ့နဲ့ ၉ ရက်နေ့မှာ ချင်းမိုင် လွိုင်ကထုန်ပွဲမှာ ပန်းတွေနဲ့ လှည့်လည်ပြီး လှည်းတွေမှာ အလှဆင်ရတယ်။ အကတွေနဲ့ ပုံဖော်တယ်။ အဲ့လို ပြိုင်ပွဲတွေ ရှိတယ်။ မြန်မာ့ရိုးရာနဲ့ သိပ်မတူတာက မီးပုံးပျံ ပြိုင်ပွဲတွေဘာတွေ မရှိဘူး။ အရင် လွိုင်ကထုန်ပွဲတွေမှာတော့ မီးပုံးပျံတွေ လွှတ်တယ်။ ဒီနှစ်မှာတော့ အိမ်တွေဘာတွေ မီးလောင်မှာစိုးလို့ လွှတ်ခွင့်မပေးဘူး” လို့ ချင်းမိုင်မြို့ ဒေသခံတဦးက ပြောပါတယ်။
မြန်မာနိုင်ငံမှာတော့ အာဏာသိမ်း စစ်ကောင်စီက ရန်ကုန်၊ နေပြည်တော်၊ ပဲခူး၊ တောင်ကြီး၊ လားရှိုးနဲ့ ပြင်ဦးလွင်မြို့တွေမှာ တန်ဆောင်တိုင် မီးပုံးပျံပွဲတွေ ကျင်းပဖို့ စီစဉ်နေပြီး ပြည်သူလူထု ပူးပေါင်း ပါဝင်မှု နည်းတာကြောင့် ၎င်းတို့ကို အားပေး ထောက်ခံသူတွေနဲ့သာ ပွဲလမ်းသဘင်တွေကို စည်ကားသယောင် ကျင်းပဖို့ လုပ်ဆောင်နေပါတယ်။
