ရုရှားလွှတ်တော်ဥက္ကဋ္ဌ ဗယီးချစ္စလက် ဗိုလိုဒင်ဟာ အီရန်လွှတ်တော်ဥက္ကဋ္ဌ မိုဟမ်မဒ် ဘာကာ ကာလီဘတ်ဖ်နဲ့ ဇန်နဝါရီ ၂၃ ရက်က အီရန်မြို့တော် တီဟီရန်မှာ တွေ့ဆုံခဲ့ပါတယ်။

ရုရှားလွှတ်တော်ကော်မတီ အကြီးအကဲတွေက နှစ်နိုင်ငံလွှတ်တော်တွေအကြား ဆက်ဆံရေး တိုးတက်မှုကို ဆွေးနွေးဖို့ စီစဉ်ထားတဲ့ အီရန်နဲ့ ရုရှားကြား တတိယအကြိမ် ပူးပေါင်းဆောင်ရွက်မှု အစည်းအဝေးကိုတက်ဖို့ အီရန်နိုင်ငံဆီ နှစ်ရက်ကြာခရီးစဉ်မှာ ဗိုလိုဒင်နဲ့အတူ လိုက်လာခဲ့တာပါ။

အီရန်လွှတ်တော်ဥက္ကဋ္ဌက သူတို့နိုင်ငံတွေအပေါ် အမေရိကန်က ချမှတ်ထားတဲ့ ပိတ်ဆို့အရေးယူမှုတွေဟာ အီရန်နှင့် ရုရှားဆက်ဆံရေးအတွက် အကြီးမားဆုံး ခြိမ်းခြောက်မှုနဲ့ ဖိအားဖြစ်တယ်လို့ အစည်းအဝေးအပြီး သတင်းစာရှင်းလင်းပွဲမှာ ပြောပါတယ်။

အနောက်နိုင်ငံက ချမှတ်ထားတဲ့ ပိတ်ဆို့အရေးယူမှုတွေဟာ အီရန်နဲ့ ရုရှားတို့ ပိုစည်းလုံးဖို့သာ အထောက်အကူဖြစ်တယ်လို့ ရုရှားလွှတ်တော်ဥက္ကဋ္ဌက ပြောပါတယ်။

သမ္မတ ဗလာဒီမာပူတင်ရဲ့ ရင်းနှီးတဲ့ ဗိုလိုဒင်က ယူကရိန်းအပေါ် အမေရိကန်နဲ့ နေတိုးရဲ့ ပံ့ပိုးကူညီမှုဟာ ကမ္ဘာကြီးကို ဆိုးရွားတဲ့စစ်ပွဲဆီ ဦးတည်နေတယ်လို့ သတိပေးခဲ့ပါတယ်။

ရုရှားရဲ့နယ်မြေတွေကို ခြိမ်းခြောက်နေတဲ့ ယူကရိန်းအစိုးရဆီ ထိုးစစ်အတွက် လက်နက်တွေ ပေးပို့တာဟာ ကမ္ဘာလုံးဆိုင်ရာ ကပ်ဆိုးကြီးဆီကို ဦးတည်သွားစေပြီး ခုခံကာကွယ်နိုင်စွမ်း မရှိတဲ့ အစုလိုက်အပြုံလိုက် ပျက်စီးမယ့် လက်နက်တွေ သုံးတာကို ဆန့်ကျင်သွားမယ်လို့လည်း သူကပြောပါတယ်။

အသက် ၅၈ နှစ်အရွယ် ဗိုလိုဒင်ဟာ ၂၀၁၆ ခုနှစ်ကတည်းက အောက်လွှတ်တော်ဥက္ကဋ္ဌဖြစ်ခဲ့ပြီး သမ္မတအုပ်ချုပ်ရေးမှာ အကြီးတန်းတာဝန် ယူထားသူဖြစ်ပြီး ပူတင်ရဲ့ လုံခြုံရေးကောင်စီအဖွဲ့ဝင်တဦးအနေနဲ့ သူဟာ သမ္မတဆီ ပုံမှန်ဝင်ရောက်ခွင့် ရှိနေပါတယ်။

မကွေးတိုင်းဒေသကြီးလွှတ်တော် ဥက္ကဋ္ဌ ဦးတာကို ဒီဇင်ဘာလ ၂၁ ရက်နေ့မှာ စစ်ကောင်စီရဲ့ တရားရုံးက ထောင်ဒဏ် ၃ နှစ်ချမှတ်လိုက်တယ်လို့ အမှုလိုက်ပါအကျိုးဆောင်ပေးနေတဲ့ ရှေ့နေဆီကနေ သိရပါတယ်။

တိုင်းဒေသကြီးလွှတ်တော်ဥက္ကဋ္ဌ ဦးတာကို စလင်းမြို့နယ် သရက်ကုန်းကျေးရွာ လျှပ်စစ်မီးလင်းရေး အောင်ပွဲ အခမ်းနားကို တက်ရောက်ရာမှာ ကိုဗစ် စည်းကမ်တွေကို ဖောက်ဖျက်တယ်ဆိုပြီး စလင်းမြို့နယ်တရားရုံးမှာ မကွေးတိုင်းလဝက ဦးစီအရာရှိ ဦးသိန်းနိုင်ဦးက သဘာဝဘေးအန္တရာယ်စီမံခန့်ခွဲမှု ဥပဒေပုဒ်မ ၂၅ နဲ့ တရားစွဲဆိုပြီး စစ်ကောင်စီက ထောင်ဒဏ် ၃ နှစ်ချမှတ်လိုက်တယ်လို့ တရားလွှတ်တော်ရှေ့နေ ဦးအောင်နိုင်က ပြောပါတယ်။

“အဲဒီအမှုက ပထမ သတင်းပေးတိုင်ချက်နဲ့ ထွက်ဆိုချက်တွေ ကွဲလွဲနေတဲဗျ။ သူတို့စွဲထားတာက ၂၀၂၀ စက်တင်ဘာလ ၂၈ ရက်နေ့က သရက်ကုန်းကျေးရွာ လျှပ်စစ်မီးလင်းရေး အခမ်းအနားဆိုပြီး စွပ်စွဲထားတာ။ တကယ်တမ်းစစ်ဆေးပေါ်ပေါက်တာက သရက်ကုန်းကျေးရွာမှာ စာသင်ကျောင်းဆောင်တည်ဆောက်ဖို့အတွက် ကိုဗစ်စည်းမျည်းစည်းကမ်းနဲ့အညီ ပန္နက်ချခဲ့တာလို့ ချေပထားတယ်။”

အဲဒီကျေးရွာဘက်နဲ့ စလင်မြို့နယ်ကို ကိုဗစ်-၁၉ စည်းကမ်း တင်းကြပ်ချမှတ်ထားတဲ့ ကာလလည်း မဟုတ်သလို အခမ်းအနားပြီးတော့လည်း အဲဒီရွာမှာ ကိုဗစ်ရောဂါဖြစ်ပွားတာလည်းမရှိခဲ့ဘဲ ဓာတ်ပုံသက်သေတွေအရ တစ်ယောက်နဲ့ တစ်ယောက် ၆ ပေ အကွာကနေ ပန္နက်ချနေတဲ့ ပုံတွေပဲ တွေ့ရတယ်လို့ ဆိုပါတယ်။

ဦးတာကတော့ ဒီအမှုမှာ ပြစ်ဒဏ်မချဘူးလို့ ထင်ထားပေမယ့် ထောင်ဒဏ် ၃ နှစ်ချမှတ်လိုက်တဲ့ အတွက် ကျေနပ်မှုမရှိတာကြောင့် ခရိုင်တရားရုံးကို အယူခံဆက်တက်သွားမယ်လို့ ဆိုပါတယ်။

မကွေးတိုင်းဒေသကြီး လွှတ်တော်ဥက္ကဋ္ဌ၊ ဝန်ကြီးချုပ်နဲ့ အစိုးရအဖွဲ့ ဝန်ကြီးတွေကို စစ်ကောင်စီက အဂတိလိုက်စားမှု တိုက်ဖျက်ရေဥပဒေနဲ့ အမှု ၈ မှုဖွင့်ပြီးတော့ တရားစွဲဆိုထားတယ်လို့ သိရပါတယ်။