ရန်ကုန်တိုင်းဒေသကြီး လှိုင်သာယာမြို့နယ် ဘုရင့်နောင်တံတားအဆင်း ရန်ကုန်-ပုသိမ် လမ်းမကြီးဘေး ကျူးကျော်တွေကို အောက်တိုဘာ ၂၈ ရက် မနက်မှာ စစ်ကောင်စီက အင်အားသုံးဖြိုဖျက်နေတယ်လို့ ဒေသခံတွေက ပြောပါတယ်။

ကျူးကျော်တွေ တစ်လအတွင်းဖယ်ပေးဖို့ အောက်တိုဘာ ၁၆ ရက်နေ့က အမိန့်ထုတ်ပြန်ခဲ့တာလို့ ဆိုပါတယ်။

ကျူးကျော်နေထိုင်သူတစ်ဦးက “မဖြစ်မနေဖယ်ပေးရမှာဆိုလည်း ဖယ်ပေးမှာပါ၊ ခုဟာက ဆောင်းဦးပေါက်ဆိုတော့ ရာသီက အေးလာ၊ နေစရာအိမ်က မရှိ၊ သက်ကြီးရွယ်အိုနဲ့ လူမမယ်ကလေးတွေ၊ သားသည်အမေတွေအတွက် အတော့်ကို နေထိုင်ရေး အခက်အခဲဖြစ်နေရတယ်” လို့ ပြောပါတယ်။ဒေသခံ မြင်တွေ့သူတစ်ဦးက “မနေ့ညကတည်းက ဘုရင့်နောင်တံတားကို ပိတ်လိုက်တယ်။ အင်အားသုံးပြီး ကျူးကျော် ဖယ်ရှားမယ်လို့ ကြားပေမယ့် မထင်ထားဘူး။ ဒီနေ့မနက်မှာတော့ စည်ပင်ရေ အမြှောက်ကား၊ စစ်ကား၊ ရဲကား၊ အချုပ်ကား၊ ဘူဒိုဇာတွေပါ ပါလာပြီး လွယ်လွယ်ဖယ်မပေးရင် အဓမ္မ ဖြိုဖျက်မယ့်သဘောရှိတယ်။ လမ်းမကြီးတွေနဲ့ လမ်းကြိုလမ်းကြားတွေပါမကျန် ကျူးတွေ ဖယ်ရှားပေးဖို့ လှည့်လည်ကြေညာတယ်လို့ ပြောပါတယ်။

ရန်ကုန်မြို့၊ လှိုင်သာယာက ကျူးကျော်တွေကို နေရာဖယ်ပေးဖို့ စစ်ကောင်စီက အတင်းအကျပ် ဖိအားပေးနေပေမဲ့ ထောင်နဲ့ချီတဲ့ ကျူးကျော်မိသားစုတွေဟာ  သွားစရာနေရာမရှိတဲ့အတွက် အခက်အခဲနဲ့  ကြုံတွေ့ကြပါတယ်။

ရန်ကုန်မြို့၊ လှိုင်သာယာ (အရှေ့ပိုင်း)မြို့နယ် ရန်ကုန်-ပုသိမ်လမ်းဘေးတလျှောက်က ကျူးကျော်တွေကို နေရာဖယ်ပေးဖို့ စစ်ကောင်စီက အောက်တိုဘာ ဒုတိယအပတ်မှာ ဖိအားတွေပေးခဲ့တာပါ။ အချိန်တစ်ပတ်အတွင်း နေရာဖယ်ပေးရမယ်လို့လည်း  စစ်ကောင်စီလက်အောက်ခံ မြို့နယ်၊ ရပ်ကျေးအုပ်ချုပ်ရေးမှူးတွေက သတိပေးစာတွေ ပေးပို့ခဲ့တာဖြစ်ပါတယ်။

ကျူးကျော်တွေဟာ နဂိုကတည်းက အလုပ်အကိုင်အတည်တကျမရှိသူတွေ ဖြစ်ပြီး အာဏာသိမ်းပြီးနောက်ပိုင်းမှာ ပုံမှန်အလုပ်မရှိသူ ပိုများခဲ့ပါတယ်။ စစ်ကောင်စီက နေရာဖယ်ပေးဖို့ ဖိအားပေးနေပေမယ့် သွားစရာနေရာမရှိသလို ပိုက်ဆံလည်းမရှိဘူးလို့ ကျူးကျော်တစ်ယောက်က ပြောပါတယ်။

ရန်ကုန်-ပုသိမ် ကားလမ်းမတလျှောက်မှာ ကျူးကျော်အိမ်ထောင်စု ထောင်နဲ့ချီရှိနေပြီး ၂၀၀၈ နာဂစ်ဖြစ်ပြီးနောက်ပိုင်း ဧရာဝတီတိုင်းကနေ ပြောင်းရွှေ့လာသူတွေ ဖြစ်ပါတယ်။ 

ကျူးကျော်တွေကို အန်အယ်လ်ဒီ အစိုးရလက်ထက်က စမတ်ကတ်တွေနဲ့ စာရင်းပြုစုထားပြီး နေစရာအတည်တကျ ဖန်တီးပေးဖို့ ကြိုးစားခဲ့ပါတယ်။

ရန်ကုန်တိုင်းမှာ စမတ်ကတ်ထုတ်ပေးခဲ့တဲ့ အိမ်ထောင်စု စုစုပေါင်း နှစ်သိန်းခွဲကျော်ရှိခဲ့ပြီး သူတို့ကို တန်ဖိုးနည်းအိမ်ရာတွေ ဝယ်ယူခွင့်ပေးဖို့ NLD အစိုးရက စီစဉ်ခဲ့ပါတယ်။ အခု စစ်ကောင်စီရဲ့ နှင်ထုတ်မှုကြောင့် အထုပ်ဆွဲပြီး လမ်းဘေးနေဖို့ နည်းလမ်းပဲရှိတော့တယ်လို့ ကျူးကျော်တစ်ယောက်က ပြောပါတယ်။

ကျူးကျော်တွေကို စစ်ကောင်စီက နေရာဖယ်ခိုင်းနေပေမယ့် အစားထိုးနေထိုင်ဖို့ နေရာစီစဉ်ပေးတာလည်း မရှိဘူးလို့ ကျူးကျော်တွေက ပြောပါတယ်။ ဒါ့အပြင် နိုင်ငံသားတွေဖြစ်ပေမဲ့ သူတို့မှာ လုံခြုံမှုမရှိတဲ့အတွက် အနာဂတ်ပျက်စီးတဲ့ အခြေအနေ ဖြစ်နေတယ်လို့လည်း ဆိုပါတယ်။

စစ်ကောင်စီက အာဏာသိမ်းထားချိန်ကို အခွင့်ကောင်းယူပြီး ရန်ကုန်တိုင်းနဲ့ မန္တလေးတိုင်းမှာရှိတဲ့  ကျူးကျော်နေထိုင်သူတွေကို လူသားချင်းစာနာမှုနဲ့ အကူအညီ တစုံတရာမပေးဘဲ ဖယ်ရှားဖို့ကြိုးစားနေတာ ဖြစ်ပါတယ်။