မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသ၊ လှေခုတ်ရွာကို သြဂုတ် ၁၅ ရက်နေ့ နေ့လယ်ပိုင်းမှာ စစ်ကောင်စီတပ်က ထပ်မံ မီးရှို့ဖျက်ဆီးခဲ့တာကြောင့် အိမ်ခြေ ၁၅၀ ထက်မနည်း မီးလောင်ဆုံးရှုံးခဲ့ပြီး အသက် ၉၀ အရွယ် အဘွားအို ၁ ဦး မီးထဲပါသွားတယ်လို့ ဒေသခံတွေက ပြောပါတယ်။
ဆင်တဲရွာမှာ ညအိပ်တပ်စွဲခဲ့တဲ့ စစ်ကောင်စီတပ်ဟာ ဒီနေ့မနက် ၁၁ နာရီခွဲလောက်မှာ လှေခုတ်ကျေးရွာကို ထပ်မံမီးရှို့ဖျက်ဆီးခဲ့တာလို့ လှေခုတ်ရွာဒေသခံယောက်က ဒီဗွီဘီကို ပြောပါတယ်။
“စစ်(...)တွေဟာ သြဂုတ်လ ၁၃ ရက်နေ့ကတည်း ကလှေခုတ်ရွာကို ဝင်ရောက်မီးရှို့ခဲ့လို့ အိမ်ခြေ ၈၀ လောက်မီးလောင်ကျွမ်းခဲ့တယ်။ ဒီနေ့နဲ့ဆိုရင် ၁၅၀ ထက်မနည်းမီးလောင်သွားပြီ။ စစ်(...)တွေ ပြန်ဆုတ်သွားတော့ ရွာသားတချို့ ရွာထဲကိုပြန်ဝင်ပြီး နေကြတယ်။ အဘွားအိုကတော့ မပြေးနိုင်တော့လို့ နေအိမ်မှာ ချန်ထားခဲ့ရတာ။ မီးကတော့ ညနေပိုင်းအထိ လောင်နေတုန်းပဲဗျ။ ဘယ်သူမှလည်း သွားမငြိမ်းရဲကြဘူး။”
စစ်ကောင်စီတပ်ဖွဲ့ဟာ နေရင်း၊ မင်းရွာနဲ့ ဆင်တဲကျေးရွာတွေမှာ အင်အား ၂၀၀ လောက်နဲ့ အထိုင်ချပြီး ရွာတွေကို စစ်ကြောင်းထိုး မီးရှို့ဖျက်ဆီးနေကြသလို နောက်ထပ်လည်း လူအင်အား လက်နက်အင်အားတွေ ထပ်တိုးထားလို့ တိုက်ပွဲတွေ ပြင်းထန်လာနိုင်တယ်လို့ ကာကွယ်ရေးတပ်ဖွဲ့တွေက ပြောပါတယ်။
ရေလယ်ကျွန်းဒေသမှာ စစ်ဘေးရှောင်ပြည်သူ ၅၀၀၀ ကျော်လောက်ရှိနေပြီး စားနပ်ရိက္ခာ၊ ဆေးဝါး၊ အဝတ် အထည်၊ စောင် ခြင်ထောင်၊ အမိုး အကာနဲ့ ကျန်းမာရေး စောင့်ရှောက်မှုတွေ အရေးပေါ် အကူညီလိုအပ်နေတယ်လို့ ဒေသခံတွေက ပြောပါတယ်။
မကွေးတိုင်းဒေသကြီးအတွင်းမှာ စစ်တပ်အာဏာသိမ်းတဲ့ ဖေဖော်ဝါရီ ၁ ရက်နေ့ကနေ မေ ၃၁ ရက်နေ့အထိ အိမ်ခြေ ၃၀၅၅ လုံးကို စစ်ကောင်စီတပ်တွေက မီးရှို့ဖျက်ဆီးခဲ့ကြပြီး တနိုင်ငံလုံး အတိုင်းတာနဲ့ဆိုရင် အိမ်ခြေပေါင်း ၁၈၈၈၆ လုံးမီးရှို့ဖျက်ဆီးခံခဲ့ရတယ်လို့ Data For Myanmar က ဇွန်လ ၇ ရက်နေ့မှာ ထုတ်ပြန်ထားပါတယ်။
မကွေးတိုင်းဒေသကြီး ရေစကြိုမြို့နယ် လှေခုတ်ကျေးရွာကို ဇန်နဝါရီလ ၁၂ ရက်နေ့မနက်ပိုင်းမှာ စစ်ကောင်စီတပ်တွေနဲ့ ပျူစောထီးတွေက မီးရှို့ဖျက်ဆီးနေကြတယ်လို့ ဒေသခံတွေဆီကနေ သိရပါတယ်။
ရေစကြိုမြို့နယ် ရေလယ်ကျွန်းဒေသလှေခုတ်ကျေးရွာကို ဒီကနေ့မနက် ၉ နာရီလောက်ကစပြီး စစ်ကောင်စီတပ်နဲ့ ပျူစောထီတွေပေါင်းပြီးတော့ မီးရှို့ဖျက်ဆီးနေကြတာလို့ ဒေသခံတစ်ယောက်က ဒီဗွီဘီကိုပြောပါတယ်။
စစ်ကောင်စီတပ်တွေဟာ မနေ့က ညနေ ၄ နာရီလောက်မှာ လက်နက်ကြီးလက်နက်ငယ်တွေနဲ့ ပစ်ခတ်ဝင်ရောက်လာပြီး ညအိပ်စခန်းချက ဒီကနေ့မနက်ပိုင်းမှာတော့ နေအိမ်တွေကို မီးရှို့ ဖျက်ဆီးနေကြတာလို့ ဆိုပါတယ်။
“စစ်ကောင်စီတပ်တွေနဲ့ ပျူစောထီးတွေ ဝင်လာတာကြောင့် တစ်ရွာလုံးနီးပါးထွက်ပြေးနေကြရတာဗျ။ ဘေးပတ်ဝန်းကျင်ရွာတွေကနေ မီးခိုးလုံးတွေ မီးတောက်တွေလှမ်းမြင်နေရာတာ။ နေအိမ် ဘယ်နှလုံးလောက် မီးရှို့ ဖျက်ဆီးခံရတယ်ဆိုတာကိုတော့ အတိကျအတည် မပြုနိုင်သေးဘူး” လို့ ဒေသခံက ပြောပါတယ်။
လှေခုတ်ရွာနဲ့ ရေယှားကျေးရွာကြားမှာ မနေ့က ညနေ ၃ နာရီလောက်မှာလည်း စစ်ကောင်စီတပ်သားအင်အား၅၀ လောက်နဲ့ မြင်းခြံ MG-6 ပြောက်ကျားတပ်၊ YLK-ပြောက်ကျားတပ်ညီနောင်မဟာမိတ်နှစ်ဖွဲ့ နဲ့ တိုက်ပွဲ ဖြစ်ပွားရာ စစ်ကောင်စီဘက်က ၆ ယောက်လောက် သေဆုံးပြီးတော့ ၂၀ လောက်ဒဏ်ရာရရှိသွားတယ်လို့ YLK-ပြောက်ကျားတပ်ဖွဲ့ကနေ သိရပါတယ်။
နှစ်ဘက် အပြန်အလှန်တိုက်ပွဲအတွင်းမှာ ညီနောင်မဟာမိတ်တပ်ဖွဲ့ ဘက်က ရဲဘော်တစ်ယောက် ထိခိုက်ဒဏ်ရာရရှိခဲ့ပေမယ့် မစိုးရိမ်ရဘူးလို့ ဆိုပါတယ်။
စစ်ကောင်စီတပ်ဘက်က ကျေးရွာတွေကို မီးရှို့ ဖျက်ဆီးတာနဲ့ ပတ်သက်လို့ အမြဲတမ်းငြင်းဆိုလေ့ ရှိသလို နှစ်ဘက်တိုက်ပွဲအတွင်းမှာ ထိခိုက်သေဆုံးတာနဲ့ ပတ်သက်လို့ သတင်းထုတ်ပြန်ထားတာ မတွေ့ရသေးပါဘူး။
