ဂရိနိုင်ငံ အနောက်မြောက်ပိုင်း ၇ ဒသမ ၅ ကီလိုမီတာ အကွာက အန်တီကီသေရာ ကျွန်းမကြီးရဲ့ အရန်ကျွန်းလေးကနေ ထွက်လာတဲ့ လှေတစီး ပျက်ခဲ့အပြီး ရွှေ့ပြောင်းနေထိုင်သူ ၇ ယောက်ထက်မနည်း သေဆုံးတယ်။

တခြားလူ အယောက် ၉၀ လောက်ကို ကယ်ထားရတယ်လို့ ဂရိကမ်းရိုးတန်းစောင့်တပ်က အရာရှိတွေက ဒီဇင်ဘာ ၂၄ ရက်မှာ ပြောပါတယ်။

ရွှေ့ပြောင်းနေထိုင်သူတွေကို ကယ်ဆယ်ရေးဟာ ဒီဇင်ဘာ ၂၄ ရက်မှာ ပြီးဆုံးခဲ့ပြီး  အမျိုးသား  ၅၂ ယောက် အမျိုးသမီး ၁၁ ယောက်နဲ့ ကလေး ၂၇ ယောက်ကို ပရာဆိုနီစီကျွန်းလေးကနေ ကယ်ခဲ့တယ်လို့ အရာရှိတွေက ပြောပါတယ်။

ရှာဖွေရေးလုပ်ငန်းတွေ ဆက်လုပ်နေဆဲပါ။ လှေပျက်တာဟာ အေဂျီယံ ပင်လယ်အတွင်း ဒီသီတင်းပတ်ထဲမှာ ဒုတိယမြောက်ဖြစ်ပြီး ရွှေ့ပြောင်း နေထိုင်သူတွေကို တင်လာတဲ့ လှေတစီး ဖှိုလေဂန်ဒရိုစ်ကျွန်းရဲ့ ကမ်းလွန်မှာလည်း လှေတစီး နစ်မြုပ်ခဲ့ပြီး လူဒါဇင်ချီ ပျောက်ဆုံးနေပါတယ်။

ဒီလှေတွေဟာ တူရကီနိုင်ငံက ထွက်လာတာ ဖြစ်ပြီး အီတလီကို သွားဖို့ ရည်မှန်းထားတာ ဖြစ်ပုံရတယ်လို့ အရာရှိတွေက ပြောပါတယ်။

ဒီနှစ်ထဲမှာ ဥရောပကို ရောက်ဖို့ ကြိုးစားရင်း ပင်လယ်ထဲမှာ သေဆုံး၊ ပျောက်ဆုံးခဲ့တဲ့ လူပေါင်း အယောက် ၂၅၀၀ ကျော်တယ်လို့ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးက ခန့်မှန်းထားပါတယ်။