close

ဝန်ကြီးချုပ်မိုဒီ

close

January 26, 2023

ဝန်ကြီးချုပ်မိုဒီအကြောင်း မှတ်တမ်းရုပ်ရှင်ပြရန် စီစဉ်နေသည့် အိန္ဒိယကျောင်းသားများ ဖမ်းဆီးခံရ

ဝါဒဖြန့်မှုအဖြစ် အစိုးရက ပယ်ချခဲ့တဲ့ ဝန်ကြီးချုပ် နရင်ဒြာမိုဒီအကြောင်း ဘီဘီစီ မှတ်တမ်းရုပ်ရှင်ကို မပြသခင် အိန္ဒိယမြို့တော်မှာ ရဲတပ်ဖွဲ့က ကျောင်းသားတဒါဇင်ကျော်ကို ဇန်နဝါရီ ၂၅ ရက်မှာ ဖမ်းဆီးလိုက်ပါတယ်။

အိန္ဒိယ ကျောင်းသားများအဖွဲ့ချုပ် (SFI) က အိန္ဒိယရဲ့ ပြည်နယ်တိုင်းမှာ “India: The Modi Question” မှတ်တမ်းရုပ်ရှင်ကို ပြဖို့စီစဉ်နေတယ်လို့ SFI ရဲ့ အထွေထွေအတွင်းရေးမှူးက ရိုက်တာသတင်းဌာနကို ပြောခဲ့ပါတယ်။

ဗုဒ္ဓဟူးနေ့ညနေပိုင်းမှာ ဘီဘီစီ မှတ်တမ်းရုပ်ရှင်မပြခင် ခွင့်ပြုချက် ပေးမထားတဲ့ SFI ရဲ့ ကျောင်းသားစုဝေးပွဲတွေအတွက် မြို့တော် နယူးဒေလီရှိ ဂျမီယာမီလီယာ အစ္စလာမီယာ တက္ကသိုလ်က ဇန်နဝါရီ ၂၄ ရက်မှာ သတိပေးချက်ထုတ်ပြန်ခဲ့တယ်လို့ NDTV သတင်းဌာနက ဖော်ပြခဲ့ပါတယ်။

အဲဒီနောက် ရဲတပ်ဖွဲ့က ကျောင်းသားတဒါဇင်ကျော်ကို အဲဒီနေရာကနေ ဖမ်းဆီးထိန်းသိမ်းခဲ့တယ်လို့ ရုပ်သံလွှင့်ဌာနက ကြေညာပါတယ်။

ဒေလီရဲတပ်ဖွဲ့က ကျောင်းသားတွေကို ဆက်ပြီး ဖမ်းထားမထား ချက်ချင်း အတည်မပြုနိုင်သေးပေမဲ့ တက္ကသိုလ်မှာ အဓိကရုဏ်းထိန်းချုပ်ရေး ကိရိယာတွေ၊ ရဲနဲ့ လုံခြုံရေးတပ်ဖွဲ့ဝင်တွေ အပြင်းအထန် ချထားတယ်လို့ ပြောပါတယ်။

မှတ်တမ်းရုပ်ရှင်ပြသမှုနဲ့ ဇန်နဝါရီ ၂၆ ရက် အိန္ဒိယသမ္မတနိုင်ငံနေ့တို့ကြောင့် တရားဥပဒေစိုးမိုးရေးနဲ့ တည်ငြိမ်အေးချမ်းရေးတို့အတွက် တပ်ဖြန့်ချထားတာလို့ ရဲတပ်ဖွဲ့က ပြောပါတယ်။

“ဒါဟာ ဒီနိုင်ငံမှာ နိုင်ငံသားတိုင်းရဲ့ အခြေခံအခွင့်အရေး အမျိုးမျိုးကို လုံးလုံးလျားလျား ချိုးဖောက်မှုပါပဲ” လို့ ကျောင်းသား ဆာနမ်ဟူစိန်က ပြောပါတယ်။

အိန္ဒိယနိုင်ငံရဲ့ အိမ်နီးချင်းနိုင်ငံတွေကနေလာတဲ့ မွတ်စလင်တွေကို နိုင်ငံသားဖြစ်ခွင့်မရအောင် တားမြစ်ထားတဲ့ ဥပဒေသစ်ကြောင့် ဒီတက္ကသိုလ်မှာ ၂၀၁၉ ခုနှစ် ဒီဇင်ဘာလက ကျောင်းသူတွေ ဆန္ဒပြသူတွေနဲ့ ရဲတပ်ဖွဲ့ဝင်တွေပါတဲ့ အကြမ်းဖက်ပဋိပက္ခတွေ ဖြစ်ခဲ့ပါတယ်။

14 mins Ago

July 3, 2020

အိန္ဒိယနှင့်တရုတ်တပ်ဖွဲ့ ပဋိပက္ခဖြစ်ခဲ့သည့် ဟိမဝန္တာမြောက်ပိုင်းသို့  ဝန်ကြီးချုပ်မိုဒီ သွားရောက် 

အိန္ဒိယဝန်ကြီးချုပ်  နာရန်ဒြာမိုဒီဟာ    အိန္ဒိယနဲ့တရုတ် တပ်ဖွဲ့ဝင်တွေ   ပဋိပက္ခဖြစ်ခဲ့တဲ့  ဟိမဝန္တာ မြောက်ပိုင်း လာဒက်ဒေသကို ဇူလိုင်လ ၃  ရက်က ရဟတ်ယာဉ်နဲ့ သွားရောက်ခဲ့ပါတယ်။ အဲဒီပဋိပက္ခမှာ အိန္ဒိယတပ်ဖွဲ့ဝင် အယောက် ၂၀ သေဆုံးပြီး ၇၆ ယောက်ထက် မနည်း ဒဏ်ရာရခဲ့ပါတယ်။ တရုတ်တပ်ဖွဲ့ဝင်တွေ ကျူးကျော်တယ်လို့ အိန္ဒိယက ယူဆထားတဲ့ ဒီပဋိပက္ခအပေါ် တုံ့ပြန်မှုနဲ့ပတ်သက်ပြီး   ဝန်ကြီးချုပ် မိုဒီဟာ   ဝေဖန်ခံနေရပါတယ်။ အိန္ဒိယ-တရုတ် နယ်စပ် လာဒက်ဒေသကို သွားရောက်ရာမှာ    ဝန်ကြီးချုပ်  မိုဒီနဲ့အတူ  ကာကွယ်ရေးဦးစီးချုပ်နဲ့  ကြည်းတပ်ဦးစီးချုပ်တို့  အတူလိုက်ပါခဲ့တယ်လို့ တာဝန်ရှိသူတွေက ပြောပါတယ်။ လာဒက်ဒေသရောက်လာတဲ့  ဝန်ကြီးချုပ် မိုဒီဟာ  နီမူအရပ်က အိန္ဒိယတပ်ဖွဲ့ဝင်တွေနဲ့ တွေ့ဆုံခဲ့ပါတယ်။ ဇွန်လ ၁၅ ရက် ဂေါ်ဝမ်တောင်ကြားမှာ  ဖြစ်ခဲ့တဲ့ ပဋိပက္ခနဲ့ပတ်သက်လို့  အိန္ဒိယနဲ့ တရုတ် နှစ်ဘက်စလုံးက အပြန်အလှန် အပြစ်ဖို့ကြပါတယ်။ နျူးကလီးယားလက်နက်ပိုင်ဆိုင်ထားတဲ့ အိန္ဒိယနဲ့တရုတ် အိမ်နီးချင်း နှစ်နိုင်ငံဟာ နယ်စပ်တလျှောက် နှစ်နိုင်ငံ တပ်တွေကို ချထားပြီး ပဋိပက္ခ အရှိန်လျော့ရေးအတွက် စစ်ရေးနဲ့ သံတမန်ဆိုင်ရာ ဆွေးနွေးပွဲတွေ လုပ်နေတယ်လို့လည်း ရိုက်တာသတင်းမှာ ဖော်ပြပါတယ်။
3 years Ago
Up